Luda yã takada kũ Bisã yão NAANAA 1

NAANAA

Musa takada káaku

Adamu 1:1-5:32

Nuhu 6:1-11:32

Ibrahĩ 12:1-20:18

Isaaku 21:1-26:35

Yakubu 27:1-36:43

Yusufu 37:1-50:26

Andunia naanaa

1 Zaa káaku Luda musu kũ zĩtɛoo kɛ̀. 2 Gu da pãmɛ à kɛkɛnaro, gusira mɛ́ à da ísirala, akũ Luda Nini tɛn yàa kɛ í pìla. 3 Akũ Luda pì: Gupura kũ! Akũ gupura kũ̀. 4 À è gupura pìi kɛ̀ mana, akũ à gupura kɛ̃̀kↄ̃a kũ gusirao. 5 À tↄ́ kpà gupuranɛ fãnantɛ̃, gusira sↄ̃ gwãani. Gu sì gu dↄ̀, a gↄrↄ káakun gwe.

6 Akũ Luda pì: Sarapura gↄ̃ kú ínↄ dagura de à í pìnↄ kɛ̃kↄ̃a. 7 Akũ à sarapura kɛ̀ lɛ, à í kũ à kú sarapura gbáru kɛ̃̀kↄ̃a kũ í kũ à kú a musuo. 8 Akũ à tↄ́ kpà sarapura pìinɛ ludambɛ. Gu sì gu dↄ̀, a gↄrↄ pladen gwe.

9 Akũ Luda pì: Í kũ à kú zĩtɛ kakara gu dokↄ̃nↄ, gukori bo. Akũ à kɛ̀ lɛ. 10 À tↄ́ kpà gukori pìinɛ zĩtɛ, akũ a tↄ́ kpà í kũ à kàkaranɛ ísira. Akũ à è à kɛ̀ mana. 11 Akũ Luda pì: Lánↄ bↄtɛ zĩtɛ kũ sɛ̃̀ wɛ́denↄ kũ lí nɛ́denↄ, baadi kũ a burio. Akũ à kɛ̀ lɛ, 12 lánↄ bↄ̀tɛ zĩtɛ kũ sɛ̃̀ wɛ́denↄ kũ lí nɛ́denↄ, baadi kũ a burio. Akũ Luda è à kɛ̀ mana. 13 Gu sì gu dↄ̀, a gↄrↄ aakↄ̃den gwe.

14 Akũ Luda pì: Pↄ́ gupurakũrinↄ gↄ̃ kú musu ògↄ̃ fãnantɛ̃ kɛ̃kↄ̃a kũ gwãanio, ògↄ̃ wɛ̃̀ sèedanↄ kũ gↄrↄnↄ kũ wɛ̃̀nↄ mↄńnɛ. 15 Ògↄ̃ kú pↄ́ gupurakũrinↄ ũ musu de ògↄ̃ andunia pura kũ. Akũ à kɛ̀ lɛ. 16 À pↄ́ gupurakũri zↄ̃kↄ̃nↄ kɛ̀ mɛ̀n pla, a kũ à gbãna dìgↄ̃ kí ble fãnantɛ̃, a kũ à busɛ dìgↄ̃ kí ble gwãani. À susunɛnↄ kɛ̀ dↄ. 17 À ń pɛ́pɛ musu de ògↄ̃ andunia pura kũ 18 ògↄ̃ kí ble fãnantɛ̃ kũ gwãanio, ògↄ̃ gupura kɛ̃kↄ̃a kũ gusirao. Akũ à è à kɛ̀ mana. 19 Gu sì gu dↄ̀, a gↄrↄ siikↄ̃den gwe.

20 Akũ Luda pì: Pↄ wɛ̃̀ndidenↄ í pa yɛ́rɛrɛ, bãnↄ dagula musu ògↄ̃ vura sarapuran. 21 Akũ à pↄ́ wɛ̃̀ndide kũ òdi í panↄ kɛ̀ kũ kpↄ̀ gbɛ̃̀ntɛ̃nↄ pínki, baadi kũ a burio. À bãnↄ kɛ̀ pínki dↄ, baadi kũ a burio. Akũ à è à kɛ̀ mana. 22 À arubarikaa dàńgu à pì, ògↄ̃ nɛ́ i ògↄ̃ kɛ dasi, kpↄ̀nↄ ísira pa, bãnↄ kɛ dasi zĩtɛ. 23 Gu sì gu dↄ̀, a gↄrↄ sↄↄroden gwe.

24 Akũ Luda pì: Pↄ́ wɛ̃̀ndidenↄ bↄtɛ zĩtɛ, bɛ pↄ́kãdenↄ kũ pↄ́ kũ òdi táa o kũ kùaonↄ kũ nↄ̀bↄsɛ̃ntɛnↄ, baadi kũ a burio. Akũ à kɛ̀ lɛ. 25 Luda nↄ̀bↄsɛ̃ntɛnↄ kɛ̀ baadi kũ a burio. À bɛ pↄ́kãdenↄ kɛ̀ baadi kũ a burio. À pↄ́ kũ òdi táa o kũ kùaonↄ kɛ̀ baadi kũ a burio. Akũ à è à kɛ̀ mana.

26 Akũ Luda pì: Ò bisãsiri kɛ ó taka ũ, ògↄ̃ de lán ó bà, ògↄ̃ kí ble kpↄ̀nↄa kũ bãnↄ kũ bɛ pↄ́kãdenↄ kũ nↄ̀bↄsɛ̃ntɛnↄ kũ pↄ́ kũ òdi táa o kũ kùaonↄ pínki. 27 Akũ Luda bisãsiri kɛ̀ a zĩda taka ũ. A zĩda takan à ń kɛ́ a ũ. À ń kɛ́ gↄ̃gbɛ̃ kũ nↄgbɛ̃o. 28 À arubarikaa dàńgu à pìńnɛ: Àgↄ̃ nɛ́ i àgↄ̃ kɛ dasi àgↄ̃ andunia pa àgↄ̃ gbãna blea. Àgↄ̃ kí ble kpↄ̀nↄa kũ bãnↄ kũ pↄ́ wɛ̃̀ndide kũ òdi táa o zĩtɛnↄ pínki. 29 Akũ Luda pì: Pↄ́ wɛ́de kũ ò kú zĩtɛnↄn ma kpàáwa á pↄ́ble ũ pínki kũ lí nɛ́denↄ pínki. 30 Ma sɛ̃̀nↄ kũ lánↄ kpà pↄ́ wɛ̃̀ndidenↄa pínki ń pↄ́ble ũ, nↄ̀bↄnↄ kũ bãnↄ kũ pↄ́ kũ òdi táa o kũ kùaonↄ pínki. Akũ à kɛ̀ lɛ. 31 Luda pↄ́ kũ à kɛ̀nↄ è pínki, à kɛ̀ mana swáswa. Gu sì gu dↄ̀, a gↄrↄ suddoden gwe.