4
1 Zaakũ gɛ̃na kámmabokin kũ Luda a lɛ́ sɛ̀ kpɛ́ kun, ò laakari kɛ, de ó gbɛ̃ke sún kurairo.
2 Zaakũ o baaru nna mà lán ń bàmɛ, ama yã kũ ò màa pìi àre vĩńnɛro, kũ odi ma kũ ludanaanikɛnaaoro yãi.
3 Ókↄ̃nↄ kũ o yã pìi sìnↄ, odì gɛ̃ kámmaboki pìn. Mↄ́kↄ̃nↄ sↄ̃ Luda pì:
Ma la dà kũ pↄfɛ̃o ma pì,
oni gɛ̃ ma kámmabokinlo,
À yã bire ò bee kũ à a zĩ mìi dɛ̀ zaa anduniakatɛna gↄrↄ,
4 zaakũ ò gↄrↄ supplade yã ò Luda yãn gukea ò pì, gↄrↄ supplade zĩ Luda kámma bò kũ zĩ kũ à kɛ̀ɛo pínki.
5 O mà tera à pì, oni gɛ̃ a kámmabokinlo.
6 Zaakũ gbɛ̃ kũ ò baaru nna pìi mà zaa káakunↄ dí gɛ̃nlo, kũ odi síro yãi, akũ a gɛ̃naa gↄ̃̀ gbɛ̃ pãndenↄnɛ.
7 Akũ Luda ɛ̀ra à gↄrↄ ke dìtɛ dↄ òdi pi Gbãra, abire gbɛra a gìi kɛ̀ akũ à Dauda gbà lɛ́, à ò lákũ ò ò nà tera:
Tó a a kòtoo mà gbãra,
àsun sãgbãna kɛro.
8 Tó Yↄsua gɛ̃̀ kũńwo kámmaboki pìn yã, de Luda dí gↄrↄ pãnde yã o kpɛkpɛro.
9 Àkũ mɛ́ à tò kámmaboki gↄ̃̀ Luda gbɛ̃nↄ pↄ́ ũ.
10 Zaakũ gbɛ̃ kũ à gɛ̃̀ Luda kámmabokin kámma bò kũ a zĩomɛ, lákũ Luda kámma bò kũ a zĩo nà.
11 Tó lɛmɛ, ò wɛ́ tã ò gɛ̃ kámmaboki pìn, de ó gbɛ̃ke sún gí Luda yã mai, à fu lán ń bàro yãi.
12 Luda yã bɛ̃nɛ, akũsↄ̃ à gbãna, a lɛ́ nna de fɛ̃nɛda kpa plaplala. Àdi ń zↄ̃ à gɛ̃ nɛ̀sɛɛ gũn ari ninin, àdi gɛ̃ mɛ̀pɛpɛkɛrɛkin ari wá bↄ́rↄgↄn, àdi laasun kũ nɛ̀sɛ yão gwagwa.
13 Luda pↄ́kɛna ke utɛnanɛro, a ke kpánɛ guiro. Luda kũ óni ó yãnↄ sɛ́tɛ ò onɛ dì pↄ́ sĩnda pínki e ari a bia.
Yesu de sa'orikinↄla
14 Zaakũ ó sa'oriki zↄ̃kↄ̃ kũ ludambɛ wɛ̃̀kↄ̃a ari Luda kĩnaa vĩ Luda Nɛ́ Yesu ũ, ògↄ̃ zɛ́ kũ o sɛ̀ yã kũna gíngin.
15 Zaakũ ó sa'oriki vĩ kũ ani fↄ̃ à ó wɛ̃nda dↄ̃ ó gbãnasarikɛ gũn. Ò a yↄ̃̀ ò gwà lán ó bà yã sĩnda pínki gũn, adi durunna kɛro.
16 Abire yãi ò na Luda Gbɛ̃kɛkɛnnɛri kíblegbaai kũ swɛ̃̀ɛo kpatɛna, de à ó wɛ́ gwa à gbɛ̃kɛ kɛwɛrɛ a gↄrↄa.