Luda yã takada kũ Bisã yão 1 YUHANA 1

YUHANA TAKADA KAAKU

Yã wɛ̃̀ndide

1 Yã kũ à kun zaa káaku kũ o a yã mà, akũ o a è kũ wɛ́o, o a gwà, o ↄ nàa, yã wɛ̃̀ndide pì baaruun ótɛn kpáárɛ. 2 Wɛ̃̀ndide pìi bò gupuraa, o a è, ókↄ̃nↄmɛ a sèedadenↄ ũ. Wɛ̃̀ndide pì kú De Luda kĩnaamɛ yã, akũ à bò à sùwá. A baaruun ótɛn kpáárɛ. 3 Yã kũ o mà, akũ o èen ótɛn oárɛ, de ákↄ̃nↄ se à le àgↄ̃ kú kũoo kↄ̃ gbɛ̃nↄ ũ, zaakũ ó kun kↄ̃ gbɛ̃nↄ ũ kũ De Ludaomɛ kũ a Nɛ́ Yesu Kirisi pìio. 4 Ótɛn yã dínↄ oárɛ de ó pↄnna le àgↄ̃ papana.

Luda bi gupuramɛ

5 Baaru kũ o mà a kĩnaa, ótɛn kpáárɛn dí: Luda bi gupuramɛ, gusira kú a kĩnaaro, bee fíti. 6 Tó o pì ó kú kãao kↄ̃ gbɛ̃nↄ ũ, akũ ó kú gusiran, ɛ́kɛn ótɛn to, ótɛn zĩ kɛ yãpuraaro. 7 Tó ó kú gupuran, lákũ Luda kú gupuran nà, gbasa ó kun kↄ̃ gbɛ̃nↄ ũ, a Nɛ́ Yesu aru dì ó durunna sĩnda pínki kɛ̃wá.

8 Tó o pì ó durunna vĩro, ótɛni ó zĩda kɛkɛmɛ, yãpura kúwáro. 9 Tó o ó durunnanↄ ò Ludanɛ, à náani vĩ, àdi yã kɛ a zɛ́a, ani ó durunna pìnↄ kɛ̃wá, ani yã bɛ̃̀nɛ pínki gowá. 10 Tó o pì ódi durunna kɛro, o Luda dìtɛ ɛ́kɛde ũmɛ, a yã kú ó swɛ̃̀ɛ gũnlo.