14
Ayuba yã'ona Ludanɛ
1 Bisãsiri dì bo nↄgbɛ̃ kĩnaamɛ,
a wɛ̃̀ndii kusu, àdigↄ̃ kun yãkete sariro.
2 Àdi pia lán lávu bà àdi kori kɛ,
àdi gɛ̃tɛ lán uraa bà àdi gì kɛro.
3 Gbɛ̃ dí takan ĩni wɛ́ dↄa
ǹ yãkpatɛ kɛ kãao yá?
4 Pↄ́ gbãsĩ ni fↄ̃ à pↄ́ gbãsĩsari i yá?
Ani sí kɛro.
5 N bisãsiri gↄrↄ dìtɛnɛ,
a mↄ lɛ́ kú n ↄĩ,
n a wɛ̃̀ lɛ́ dànɛ, ani fↄ̃ à vĩalaro.
6 Ǹ wɛ́ goa ǹ a tó gwe
ari a gↄrↄ lɛ́ papa lán zamalingakɛrii bà.
7 Lí dìgↄ̃ tãmaa vĩmɛ,
zaakũ tó ò zↄ̃̀, àdi ɛra à bↄ̀tↄ pá,
akũsↄ̃ a bↄ̀tↄ dufu pìi dì furo.
8 Bee tó a zĩni zĩ kũ̀ zĩtɛ gũn,
akũsↄ̃ a mukutu gà bùsun,
9 tó à í gbĩ mà, ani bↄ̀tↄ pá,
ani gã̀ bo lán lí kũ ò pɛ̀ɛ bà.
10 Tó gbɛ̃ gà sↄ̃, àdigↄ̃ wutɛna sↄ̀rↄrↄ,
àdi tá àdigↄ̃ kun doro.
11 Lákũ sɛ̀bɛ'i dì lago nà,
akũsↄ̃ swa'i dì baba à láka,
12 lɛn bisãsiri dì wútɛ lɛ àdi futɛ doro,
ari ludambɛ gɛ́ gɛ̃tɛo, ani vuro,
ani vu kũ i pìioro.
13 Tó ĩni ma utɛ gyãwãnn
ǹ ↄ kúma ari n pↄ gòma dé!
Tó ĩni gↄrↄ lɛ́ ditɛmɛnɛ gwe
gbasa ǹ dↄ ma yãn dé!
14 Tó gbɛ̃ gà, ani ɛra àgↄ̃ kun yá?
Tó lɛmɛ, manigↄ̃ wɛ́ dↄ ma vunaai
ma ↄsikanaa gũn gↄrↄ sĩnda pínki.
15 Ĩni lɛ́ zumai mani wemma,
ĩni makũ kũ má de n ↄzĩ ũ bɛgɛ kɛ.
16 Gↄrↄ birea n wɛ́ nigↄ̃ tɛ́ ma yãkɛnanↄi,
ama ĩni ma durunna yã da doro.
17 Ĩni ma taarinↄ ká bↄ̀kↄn ǹ yĩ ǹ ditɛ,
ĩni lá kú ma yãvãnikɛnaa pìnↄa.
18 Lákũ kpi dì gboro à fãkↄ̃a nà,
akũsↄ̃ sĩ̀sĩ musu gbɛ̀ gbɛ̃̀ntɛ̃ɛ dì sↄ̃sↄ̃,
19 lákũ swa'i dì gbɛ̀ lↄ́lↄ nà,
akũsↄ̃ í dì bùsu sɛ́tɛ à táo,
lɛn ndì bisãsiri tãmaa nɛnɛ lɛ.
20 Ndì gbãna mↄnɛ à tá, àdi su doro,
ndì tó a ãn litɛ à andunia tó.
21 Tó a nɛ́nↄ gↄ̃̀ gbɛ̃ bɛ̀ɛrɛdenↄ ũ, ani dↄ̃ro,
tó ò kɛ̀ gbɛ̃ fítinↄ ũmɛ sↄ̃, ani ero.
22 Wãwãn anigↄ̃ ma ado,
a zĩda pↄsiran àdigↄ̃ kɛ.