Luda yã takada kũ Bisã yão AYUBA 2

Setan Ayuba yↄ̃na a gɛ̃̀n plade

1 Zĩkea malaikanↄ ɛ̀ra ò sù ò zɛ̀ Dikiri arɛ, akũsↄ̃ Setan kú ń tɛ́. À zɛ̀ Dikiri arɛ, 2 akũ Dikiri a là à pì: N bo mámɛɛ? À wèa à pì: Matɛn gɛ́ matɛn su matɛn likara andunia gũmmɛ. 3 Akũ Dikiri pìnɛ: N ma zↄ̀bleri Ayuba è yá? A sára kú andunia gũnlo. Gbɛ̃ manamɛ, à taari vĩro. À ma vĩna vĩ akũsↄ̃ à gì yãvãnikɛnaai. Bee kũ n ma sã vùnɛ, ma kisira kpài pã, à kpɛ́ kun taari sari ari tera. 4 Akũ Setan pìnɛ: Ǹ kɛmɛnɛ mà kɛnnɛ. Pↄ́ kũ gbɛ̃ vĩ sĩnda pínki ani kpá a surabana yãi. 5 Ǹ n ↄ bo ǹ pá a mɛ̀ɛa ǹ gwa. Ani yã vãni onnɛ. 6 Akũ Dikiri pìnɛ: Tↄ̀! Ma a nànnɛ n ↄĩ, ama ǹ a wɛ̃̀ndi tó.

7 Setan gò Dikiri arɛ, akũ à bↄ̀bũnu zĩ̀ Ayubaa sɛna zaa a gɛ̀sɛɛa ari à gɛ̀ɛ pɛ́ a mìdangura. 8 Akũ Ayuba takaso sɛ̀ à gɛ̀ɛ à vùtɛ tubura, àtɛni a zĩda wao. 9 A nanↄ pìnɛ: Ĩnigↄ̃ kpɛ́ kun taari sari ari teran yá? Ǹ yã vãni o Ludanɛ ǹ ga. 10 Akũ à pìnɛ: Ntɛn yã o lán nↄgbɛ̃ yↄ̃nkↄ bà. Ónigↄ̃ yã mana le Luda ↄĩ ò gí a vãni lei yá? Yã pìnↄ gũn pínki Ayuba dí durunna kɛ a yã'onaa gũnlo.

Ayuba gbɛ̃nnanↄ suna a kĩnaa

11 Kũ Ayuba gbɛ̃nna gbɛ̃nↄn aakↄ̃nↄ kisira kũ à a lènↄ baaruu mà, ń baadi bò a bɛa ò kↄ̃ kàkara, akũ ò gɛ̀ɛ ò wɛ̃nda kɛ kãao ò a laakari kpátɛnɛ. Ń tↄ́nↄn dí: Temana gbɛ̃ Ɛlifaza, Sua gbɛ̃ Bilidada kũ Naamati gbɛ̃ Zofao. 12 Kũ ò a wĩna kɛ̀ zã̀zã, odi a dↄ̃ro, akũ ò ↄ́ↄ dↄ̀, ń baadi a uta gà à kɛ̃̀, akũ ò bùsuu dã̀ ò fã̀ musu ń mìla. 13 Akũ ò vùtɛ kãao zĩtɛ gↄrↄ suppla fãnantɛ̃ kũ gwãanio. Ń gbɛ̃ke dí yãke o kãaoro, zaakũ ò è lákũ a warikɛnaa kɛ̀ zↄ̃kↄ̃ manamana nà.