9
Yesu zĩ̀rinↄ zĩnaa
(Mat 10:5-15, Maa 6:7-13)
1 Yesu a ìba gbɛ̃nↄn kuri awɛɛplanↄ sìsiai, akũ à ń gbá gbãna kũ ikoo ò tãna buri sĩnda pínki go ḿma, ò gyãnↄ werekↄ̃aḿma.
2 Akũ à ń zĩ ò kpata kũ à bò Luda kĩnaa yã waazi kɛ, ò gyãrenↄ werekↄ̃a.
3 À pìńnɛ: Ásun pↄ́ke sɛ́ à gɛ́oro, gò ke bↄ̀kↄlokona ke zàna ke ↄgↄ ke uta mɛ̀n pla.
4 Ɔn kũ a kipan, àgↄ̃ kú gwe ari à gɛ́ boo wɛ̃tɛ pìi gũn.
5 Wɛ̃tɛ kũ odi gbãnakɛ kpáárɛnlo, à bon à lukutɛ̃ warawara á gbánↄa ń tona kũ Ludao sèeda ũ.
6 Akũ ò dà zɛ́n, ò kurè wɛ̃tɛ kũ wɛ̃tɛo, ò baaru nna kpàńnɛ, ò gyãnↄ wèrekↄ̃aḿma gu sĩnda pínki.
Hɛrↄdu bídikɛnaa
(Mat 14:1-12, Maa 6:14-29)
7 Kũ kína Hɛrↄdu yã birenↄ mà pínki, akũ à bídi kɛ̀, zaakũ gbɛ̃kenↄ tɛn pi Yahaya Da'itɛkɛri mɛ́ à fùtɛ bona gan.
8 Gbɛ̃kenↄ pì Iliasu mɛ́ à bò à sùḿma, gbɛ̃kenↄ pì dↄ annabi yãnↄ doke mɛ́ à vù.
9 Hɛrↄdu pì: Ma Yahaya mìi zↄ̃̀. Dín gbɛ̃ kũ ma a baaruu màa pì ũ sɛ́ɛ? Akũ àtɛn wɛtɛ ń wɛ́ kɛ pla.
Yesu pↄ́blekpana gↄ̃gbɛ̃ gbɛ̃nↄn dúbu sↄↄronↄa
(Mat 14:13-21, Maa 6:30-44, Yuh 6:1-14)
10 Kũ zĩ̀rii pìnↄ sù, akũ ò yã kũ ò kɛ̀nↄ gbã̀ Yesunɛ. Akũ à ń sɛ́tɛ ńtɛ̃nɛ à gɛ̀ɛ kũńwo wɛ̃tɛ kũ òdi pi Bɛtɛsaida.
11 Kũ pari dↄ̃̀, akũ ò pɛ̀tɛi. À gbãnakɛ kpàńyĩ, à kpata kũ à bò Luda kĩnaa yã òńnɛ, akũ à gbɛ̃ kũ ò ye ò ń werekↄ̃anↄ wèrekↄ̃a.
12 Kũ ifãntɛ̃ bùsa, zĩ̀ri gbɛ̃nↄn kuri awɛɛplanↄ nài ò pìnɛ: Ǹ gbɛ̃nↄ gbarɛ ò gɛ́ kipaki kũ pↄ́bleo wɛtɛ lakutu kũ bura kũ ò kú kãninↄ gũn, zaakũ sɛ̃̀ntɛ pↄ̀rↄtun ó kú la.
13 À pìńnɛ: Ákↄ̃nↄ à pↄ́ kpáḿma ò ble. Akũ ò pì: Burodi mɛ̀n sↄↄro kũ kpↄ̀ mɛ̀n plao ó vĩ. Séde ò gɛ́ pↄ́ble lú gbɛ̃ dínↄnɛ ń pínki.
14 Gↄ̃gbɛ̃nↄn kú gwe gbɛ̃nↄn dúbu sↄↄro taka. Akũ à pì a ìbanↄnɛ: À tó ò vutɛ gã̀ kũ gã̀ao gbɛ̃nↄn bupla akurikuri.
15 Akũ ò kɛ̀ lɛ, ò ń vútɛvutɛ ń pínki.
16 Akũ à burodi mɛ̀n sↄↄro kũ kpↄ̀ mɛ̀n pla pìnↄ sɛ̀ à a wɛ́ sɛ̀ musu à arubarikaa dàn. Akũ à lìlikↄ̃rɛ à kpà a ìbanↄa, ò kpàatɛtɛ gbɛ̃nↄnɛ.
17 Ò pↄ́ blè ò kã̀ ń pínki, akũ ò a kusu kũ ò gↄ̃̀nↄ sɛ̀tɛ tãnko kuri awɛɛpla pà.
Pita Yesu Arumasihukɛna onaa
(Mat 16:13-23, Maa 8:27-33)
18 Zĩkea kũ Yesu tɛn adua kɛ ado, a ìbanↄ sù ò a lè, akũ à ń lá à pì: Dín gbɛ̃nↄ dì pi má de a ũu?
19 Ò wèa ò pì: Gbɛ̃kenↄ dì pi Yahaya Da'itɛkɛriimɛ, gbɛ̃kenↄ dì pi Iliasu, gbɛ̃kenↄ dì pi dↄ annabi yãnↄ doke mɛ́ à vù.
20 Akũ à ń lá à pì: Ákↄ̃nↄ sↄ̃, dín adì pi má de a ũu? Pita wèa à pì: Luda gbɛ̃ Arumasihumɛ n ũ.
Yesu a ga kũ a vunaao yã'onaa
(Mat 16:21-28, Maa 8:31-9:1)
21 Akũ à gìńnɛ òsun yã pì o gbɛ̃ke maro.
22 Akũ à pì dↄ: Séde Bisãsiri Nɛ́ wɛ́tãmmana le manamana, gbɛ̃ zↄ̃kↄ̃nↄ kũ sa'orikinↄ kũ ludayãdannɛrinↄ ni gíi, oni a dɛ, a gↄrↄ aakↄ̃de zĩ ani vu.
23 Akũ à pìńnɛ ń pínki: Tó gbɛ̃ ye à kɛ ma ìba ũ, séde à gí a zĩda wɛ̃̀ndiii, àgↄ̃ a lígbãndurukpana sɛ́ lákũ gu dìgↄ̃ dↄ nà àgↄ̃ tɛ́omai.
24 Gbɛ̃ kũ à ye àgↄ̃ a wɛ̃̀ndi kũna ni kurai. Gbɛ̃ kũ à gì a wɛ̃̀ndiii ma yãi sↄ̃, ade nigↄ̃ wɛ̃̀ndi vĩ.
25 Tó gbɛ̃ andunia lè pínki, à a zĩda lilin kɛ̀o à kùra a wɛ̃̀ndiii, bↄ́ àreen ani lee?
26 Tó gbɛ̃ makũ kũ ma yão wé'i kũ̀, Bisãsiri Nɛ́ ni ade wé'i kũ gↄrↄ kũ ani su a gakuri gũn kũ a De gakurio kũ a malaikanↄ gakurio.
27 Yãpuran matɛn oárɛ, gbɛ̃kenↄ kú la kũ oni garo ari ò kína kũ Luda kà e.
Yesu linaa
(Mat 17:1-8, Maa 9:2-8)
28 Yã pì onaa gbɛra à kà azuma do taka bà, akũ à Pita kũ Yuhanao kũ Yamisio sɛ̀ à dìdi kũńwo kpia de à adua kɛ.
29 Kũ àtɛn adua kɛ, a ãnn lìtɛ a pↄ́kasanↄ kɛ̀ púu táitai.
30 Kãnto gbɛ̃nↄn planↄn kú kãao, Musa kũ Iliasuo, òtɛn yã o kũ Yesuo.
31 Ò bò ò sùa gakuri gũn, òtɛn andunia kũ ani tó zaa Yurusalɛmu yã o.
32 I Pita kũ a gbɛ̃nↄo sɛ̀. Kũ ò vù, ò Yesu gakuri è kũ gbɛ̃nↄn pla kũ ò zɛna a sarɛnↄ.
33 Kũ gbɛ̃nↄn pla pìnↄ tɛn kɛ̃kↄ̃a kũ Yesuo, Pita pìnɛ: Dikiri, à mana kũ ó kú la. Ò kuta dↄ mɛ̀n aakↄ̃, n pↄ́ mɛ̀n do, Musa pↄ́ mɛ̀n do, Iliasu pↄ́ mɛ̀n do. À dↄ̃ yã kũ átɛn oro.
34 Kũ àtɛn o lɛ, ludambɛ luku kìpa à dàńla. Kũ ò kú a gũn, vĩna ń kũ,
35 akũ ò kòtoo mà a gũn à pì: Ma Nɛ́ kũ ma a sɛ̀n dí. À a yã ma.
36 Kòtoo pì manaa gbɛra ò è Yesu mɛ́ à gↄ̃̀ gwe ado. A ìbaa pìnↄ ń lɛ́ kũ̀, odi yã kũ ò è o gbɛ̃ke ma gↄrↄ kũ̀aro.
Nɛ́gↄ̃gbɛ̃ tãnade werekↄ̃anaa
(Mat 17:14-18, Maa 9:14-27)
37 Kũ gu dↄ̀, ò kìpa kpi pìi musu, akũ gbɛ̃nↄ sù da Yesulɛ dasi.
38 Zàa gũn gↄ̃gbɛ̃ ke pũ̀tã à pì: Dannɛri, n yã nna! Ǹ ma nɛ́ gwa, zaakũ ma nɛ́ mɛ̀n do kũ má vĩn gwe.
39 Tãna dì futɛa, akũ àdi wiki lɛ́ kãnto. Àdi a pãtɛ àgↄ̃ bigiri kɛkɛ àgↄ̃ lɛ́'ifuta bↄtɛ, àdi wari dↄa àdi goa likalikaro.
40 Ma wɛ́ kɛ̀ n ìbanↄa ò pɛ́ tãna pìia à bo, akũ ò fùa.
41 Yesu pì: Gbãragbɛ̃ yakana ludanaanikɛrisarinↄ! Manigↄ̃ kú kãáo ari bↄrɛɛ? Manigↄ̃ mɛna kãáo ari bↄrɛɛ? Ǹ mↄ́ kũ n nɛ́ pìio la.
42 Ari nɛ́ pì gↄ̃ gɛ́ nai, akũ tãna pì a pã̀tɛ, àtɛn bigiri kɛkɛ. Akũ Yesu gì tãna pìinɛ à nɛ́ pìi wèrekↄ̃a, akũ à a kpà a dea.
43 Luda gbãna zↄ̃kↄ̃ yã pìi bò ń sarɛ ń pínki.
Yesu ɛra à a ga yã'onaa
(Mat 17:22-23, Maa 9:30-32)
Gbɛ̃nↄ lɛ́ wɛ̃̀ Yesu yãkɛnaa pínki, akũ à pì a ìbanↄnɛ:
44 Àgↄ̃ yã díkĩna kũna á nɛ̀sɛɛ gũn. Oni Bisãsiri Nɛ́ na gbɛ̃nↄnɛ ń ↄĩ tera.
45 Odi yã pìi dↄ̀rↄ dↄ̃ro, a mì utɛnańnɛ, ò fùa, akũ vĩna ń kũ ò yã pì gbɛkaa.
Denla yã
(Mat 18:1-5, Maa 9:33-37)
46 Akũ ò fùtɛ kũ lɛ́kpakↄ̃ao denakↄ̃la yã musu.
47 Yesu laasun kũ à kú ń nɛ̀sɛɛ gũn dↄ̃̀, akũ à nɛ́ fíti sɛ̀ à a zɛ̀ a sarɛ,
48 à pìńnɛ: Gbɛ̃ kũ à nɛ́ dí taka sì ma ìbakɛ yãi, makũmɛ à ma si. Gbɛ̃ kũ à ma si sↄ̃, ade gbɛ̃ kũ à ma zĩ sìmɛ. Gbɛ̃ kũ à a zĩda dìtɛ kĩana á tɛ́ mɛ́ à gbɛ̃ zↄ̃kↄ̃ ũ.
Gbɛ̃ kũ adi ibɛrɛ sɛ́ kãáoro bi a gbɛ̃ndomɛ
(Maa 9:38-40)
49 Akũ Yuhana pì: Dannɛri, o gbɛ̃ke è, àtɛn tãnanↄ goḿma kũ n tↄ́o, akũ o ginɛ, zaakũ ó gbɛ̃nlo.
50 Akũ Yesu pì: Ásun gínɛro, zaakũ gbɛ̃ kũ adi ibɛrɛ sɛ́ kãáoro bi á gbɛ̃ndomɛ.
Samaria bùsu lakutu gina Yesui
51 Kũ Yesu tana ludambɛ gↄrↄ kà kãni, à mìi pɛ̀ Yurusalɛmua.
52 Akũ à gbɛ̃nↄ gbàrɛ ò dòárɛ arɛ, akũ ò gɛ̀ɛ ò gɛ̃̀ Samaria bùsu lakutu ke gũn de ò soru kɛnɛ.
53 Akũ lakutude pìnↄ gì a síi kũ à mìi pɛ̀ Yurusalɛmua yãi.
54 Kũ a ìba kenↄ Yamisi kũ Yuhanao è lɛ, ò pì: Dikiri, ń ye ò pi tɛ́ bo ludambɛ à su à ń kakatɛn yá?
55 Akũ Yesu lìtɛ à kpã̀kɛ̃ńyĩ.
56 Akũ òtɛn gɛ́ lakutu pãndea.
Tɛna Yesui
(Mat 8:19-22)
57 Kũ ò tɛ́ zɛ́n, gↄ̃gbɛ̃ ke sù à pì Yesunɛ: Gu kũ ntɛn gɛ́n pínki, manigↄ̃ tɛ́nyĩ.
58 Yesu pìnɛ: Gbɛ̃gbonnↄ ń tò vĩ, bãnↄ ń sà vĩ. Bisãsiri Nɛ́ sↄ̃ à ĩampaki vĩro.
59 Yesu pì gbɛ̃ pãndenɛ: Ǹ mↄ́ ǹ tɛ́mai. Akũ gbɛ̃ pìi pì: Dikiri, ǹ tó ari ma de gɛ̀ɛ kpágui gĩa.
60 Yesu pìnɛ: Ǹ tó gɛ̀nↄ ń gɛ̀nↄ vĩ. Mↄkↄ̃n sↄ̃, ǹ gɛ́ kpata kũ à bò Luda kĩnaa yã waazi kɛ.
61 Gbɛ̃ pãnde pì dↄ: Manigↄ̃ tɛ́nyĩ Dikiri, ama ǹ tó mà gɛ́ lɛ́ za ma bedenↄa gĩa.
62 Yesu pìnɛ: Gbɛ̃ kũ swakure na a ↄĩ, tó àtɛn kpɛ gwa, ade dí kↄ̃ sɛ́ kũ kpata kũ à bò Luda kĩnaaoro.