4
Yerusɑlɛmu yɑ ko n wɑ̃ɑ
bɔri yɛndu sɔɔ
1 Sɑɑ gɑɑ sisi yè sɔɔ guu tèn mi Yinni Gusunɔn sɑ̃ɑ yerɑ rɑɑ gire,
tɑ koo guu ni nu tie bɛɛrɛ kerɑ.
Kpɑ bwese dɑbinu nu nɑ mi,
2 nu nɛɛ, i nɑ su dɑ Yerusɑlɛmuɔ Yinni Gusunɔn guurɔ
mi Isirelibɑ bɑ rɑ nùn sɑ̃,
kpɑ u sun win swɛɛ sɔ̃ɔsi su sĩ yi sɔɔ.
Min diyɑ u koo win woodɑ yɑrɑ kpɑ u gɑri gerumɑ.
3 U koo bwese dɑbinu siri,
ni nu dɑm mɔ nu nɑ tontonden di.
Kpɑ bwese ni, nu nin tɑkobibɑ bɔɔri nu kɑ tebonu seku.
Mɛyɑ nu koo nin yɑɑsi bɔɔri nu wobɑ so.
Bweseru gɑrɑ kun gɑru seesimɔ.
Bɑ ǹ mɑɑ tɑbun gɑri mɔ̀ ben suunu sɔɔ.
4 Bɑɑwure u ko n wɑ̃ɑ win gberu kpɑɑnɛɔ bɔri yɛndu sɔɔ.
Goo kun mɑɑ nùn nɑndɑsiɑmɔ.
Gusunɔ wɔllu kɑ tem Yinniwɑ u yeni geruɑ.
5 Bweseru bɑɑtere tɑ rɑ kɑ̃wɑ tu ten bũu mɛm nɔɔwɑ.
Adɑmɑ bɛsɛ, Gusunɔ bɛsɛn Yinniwɑ sɑ ko mɛm nɔɔwɑ sere kɑ bɑɑdommɑɔ.
Yinni Gusunɔwɑ u sɑ̃ɑ sunɔ
Yerusɑlɛmuɔ
6 Tɔ̃ru gɑrɑ sisi tè sɔɔ kon be bɑ mɛɛrɑ kuɑ mɛnnɑ,
kpɑ n be bɑ kpikiru suɑ sokusiɑmɑ,
be, be nɑ rɑɑ nɔni sɔ̃ɔwɑ mi.
7 Kon be bɑ mɛɛrɑ kuɑ mi mɛnnɑ.
Kpɑ be, bɑ n sɑ̃ɑ nɛn tɔmbun sukum mɛ mu tie.
Kpɑ n be, be bɑ rɑɑ kpikiru suɑ mi ko bwese dɑmgiru.
Kpɑ nɛ, Yinni Gusunɔ nɑ n sɑ̃ɑ ben sunɔ Siɔniɔ sere kɑ bɑɑdommɑɔ.
8 Wunɛ Yerusɑlɛmun guuru,
wunɛ wi ɑ sɑ̃ɑ nge wuu kɔ̃sobun diru,
ɑ tɔmbu kɔ̃su,
kɑɑ mɑɑ wunɛn bɛɛrɛ wɑ nge yellu.
Domi Yerusɑlɛmu yɑ koo kpɑm ko Isirelibɑn wuu mɑro.
Yerusɑlɛmugibun nɔni
swɑ̃ɑru kɑ ben yɑkiɑbu
9 Mbɑn sɔ̃nɑ i kuuki mɔ̀ bɛɛ Yerusɑlɛmugibu.
Mbɑn sɔ̃nɑ i tii tɛ̃birimɔ nge tɔn kurɔ wi kĩ u mɑ.
Mɑnɑ bɛɛn sunɔ u wɑ̃ɑ.
Mɑnɑ bɛɛn bwisi kɛ̃ɔbu bɑ dɑ.
10 Bɛɛ Yerusɑlɛmugibu, i wuri koowo
nge tɔn kurɔ wi u yiire u kĩ u mɑ.
Domi tɛ̃, i ko i yɑri Yerusɑlɛmun di.
Kpɑ i dɑ i n wɑ̃ɑ yɑkɑsɔ.
Bɑ koo kɑ bɛɛ dɑ sere Bɑbiloniɔ.
Adɑmɑ Yinni Gusunɔ u koo rɑ bɛɛ yɑkiɑmɑ min di.
Kpɑ u bɛɛ wɔrɑ bɛɛn yibɛrɛbɑn nɔmɑn di.
11 Tɛ̃, bwese dɑbinu nu mɛnnɑmɔ nu kɑ bɛɛ seesi.
Nu mɔ̀, su de ben wuu Yerusɑlɛmu ye, yu bɛɛrɛ biɑ, yu ko bɑnsu.
Kpɑ sɑ n su mɛɛrɑ.
12 Adɑmɑ tɔn be, bɑ ǹ yɛ̃ himbɑ ye Yinni Gusunɔ u yi win tɔmbun sɔ̃.
Bɑ ǹ win bwisikunu yɛ̃.
U kĩ u bu mɛnnɑ nge ɑlikɑmɑ ye bɑ subɑ mi bɑ rɑ ye so.
13 Yinni Gusunɔ u nɛɛ,
bɛɛ Yerusɑlɛmugibu, i seewo i bɛɛn yibɛrɛbɑ so nge ɑlikɑmɑ.
Kon de i n dɑm mɔ nge kɛtɛn kɔbɑ ye yɑ dɑm mɔ nge sisu.
Mɑ yen nɑɑ konnu nu dɑm mɔ nge sii gɑndu.
I ko i bwese dɑbinu munkuwɑ.
Kpɑ i ben ɑrumɑni geɑ mwɑ i nɛ Gusunɔ tem kpuron Yinni yiiyɑ.
14 Adɑmɑ bɛɛ Yerusɑlɛmugibu,
i bɛɛn tɑbu kowobu mɛnnɑmɑ.
Wee bɑ bɛɛ tɑrusi.
Mɑ bɑ bɛɛn sinɑ boko soomɔ bɑɑnɔ kɑ bokunu.