Luda yã takada kũ Bisã yão MAAKU 9

1 Akũ à pìńnɛ: Yãpuran matɛn oárɛ, gbɛ̃kenↄ kú la kũ oni garo ari ò kína kũ Luda kà e, àtɛn su kũ gbãnao.

Yesu linaa

(Mat 16:24-17:13, Luk 9:23-36)

2 Gↄrↄ suddo gbɛra Yesu Pita kũ Yamisio kũ Yuhanao sɛ̀ à dìdi kũńwo kpi leia ńtɛ̃nɛ. Akũ à lì ń wára, 3 a pↄ́kasanↄ tɛn tɛ́ kɛ púu táitai. Gbɛ̃ke kú andunia gũn kũ ani fↄ̃ à a pura kũ lɛro. 4 Akũ Iliasu kũ Musao bò ò sùḿma, òtɛn yã o kũ Yesuo. 5 Akũ Pita pì Yesunɛ: Dannɛri, à mana kũ ó kú la. Ò kuta dↄ mɛ̀n aakↄ̃, n pↄ́ mɛ̀n do, Musa pↄ́ mɛ̀n do, Iliasu pↄ́ mɛ̀n do. 6 À dↄ̃ yã kũ átɛn oro, zaakũ vĩna ń kũ manamana. 7 Ludambɛ luku kìpa à dàńla, akũ ò kòtoo mà a gũn à pì: Àkũmɛ ma Nɛ́ mɛ̀n do légelege yenyĩde ũ. À a yã ma. 8 Kãnto kũ ò gu gwàgwa, odi gbɛ̃ke e doro, sé Yesu ado.

9 Kũ òtɛn kipa kpi pìia, akũ Yesu pìńnɛ òsun yã kũ ò èe pì o gbɛ̃ke maro ari Bisãsiri Nɛ́ vuna gan. 10 Ò yã pì kũna, ama òtɛn kↄ̃ lala òtɛn pi: Vuna gan yã bire de deramɛɛ? 11 Akũ ò a là ò pì: Bↄ́ yã mɛ́ à tò ludayãdannɛrinↄ dì pi Iliasu mɛ́ ani su káakuu? 12 À wèḿma à pì: Iliasu ni su káaku yãpuramɛ, ani yã sĩnda pínki kɛkɛ a gbɛ̀n, ama à kɛ̀ dera ò kɛ̃̀ Luda yãn ò pì, Bisãsiri Nɛ́ ni wɛ́tãmma le manamana ari ò gíii? 13 Ama matɛn oárɛ Iliasu sù kↄ̀, akũ ò kɛ̀nɛ ń pↄyeinaaamɛ, lákũ ò a yã ò Luda yãn nà.

Yesu nɛ́gↄ̃gbɛ̃ tãnade werekↄ̃anaa

(Mat 17:14-21, Luk 9:37-42)

14 Kũ ò sù ń gbɛ̃ kparanↄ kĩnaa, ò è pari likańyĩ, ludayãdannɛrinↄ tɛn lɛ́kpakↄ̃a kɛ kũńwo. 15 Kũ pari Yesu è, a yã bò ń sarɛ, akũ ò bàa lɛ̀ ò gɛ̀ɛ ò fↄ kpàa gↄ̃̀nↄ ń pínki. 16 Akũ à a ìbanↄ là à pì: Bↄ́ lɛ́kpakↄ̃an átɛn kɛ kũńwo lɛɛ? 17 Akũ gↄ̃gbɛ̃ ke wèa zàa gũn à pì: Dannɛri, ma sunnɛ kũ ma nɛ́omɛ, tãna mɛ́ à a nɛ́nɛ nàtɛ. 18 Tó à dìdia, àdi a pãtɛ zĩtɛ, àdigↄ̃ lɛ́'ifuta bↄtɛ, àdigↄ̃ saka só, àdi gbãgbã sↄ̀rↄrↄ. Ma pì n ìbanↄnɛ ò pɛ́ tãna pìia à bo, akũ ò fùa. 19 Akũ Yesu pìńnɛ: Gbãragbɛ̃ ludanaanikɛrisarinↄ! Manigↄ̃ kú kãáo ari bↄrɛmɛɛ? Manigↄ̃ mɛna kãáo ari bↄrɛmɛɛ? À mↄ́mɛnɛ kũ nɛ́ pìio la.

20 Kũ ò sùnɛ kãao, kũ tãna pì Yesu è gↄ̃̀nↄ, akũ à nɛ́ pìi yĩ̀gãyĩgã à a pã̀tɛ zĩtɛ bèn. Akũ àtɛn gbigiri kɛ àtɛn lɛ́'ifuta bↄtɛ. 21 Yesu nɛ́ pì de là à pì: Zaa bↄrɛmɛ à kúo lɛɛ? À wèa à pì: Zaa a nɛ́ fíti zĩmɛ. 22 Àdigↄ̃ a zu tɛ́ kũ ío gũn baala'i, àdigↄ̃ ye à a dɛ. Tó ĩni fↄ̃ ǹ pↄ́ke kɛ ǹ ó wɛ̃nda gwa, ǹ kpáwái. 23 Yesu pìnɛ: N pì, tó mani fↄ̃ yá? Bee pↄ́ sĩnda pínki dì sí kɛ gbɛ̃ kũ à ma náani vĩnɛ. 24 Akũ nɛ́ pì de wiki lɛ̀ gↄ̃̀nↄ à pì: Má n náani vĩ. Ǹ n náani kũ àtɛn kĩama karamɛnɛ. 25 Kũ Yesu è zà tɛn nakaraḿma, à gì tãna pìinɛ à pì: Tãna sãto kpáturuku, ma ònnɛ ǹ go nɛ́ pìia. Ǹsun gɛ̃ a gũn doro. 26 Akũ tãna pì wiki lɛ̀ à a yĩ̀gã pãsĩpãsĩ, akũ à gòa. Nɛ́ pìi gↄ̃̀ wútɛna lán gɛ̀ɛ bà ari gbɛ̃ daside pì à gàmɛ. 27 Akũ Yesu a kũ̀ a ↄa à a fùtɛ à zɛ̀.

28 Kũ Yesu gɛ̃̀ ↄnn, akũ a ìbanↄ a gbɛ̀ka gusarɛ ò pì: À kɛ̀ dera ódi fↄ̃ ò pɛ́ tãna pìia à boroo? 29 Akũ à wèḿma à pì: Adi taka dì sí boro, sé kũ aduakɛnaao.

Yesu ɛra à a ga kũ a vunaao yã'onaa

(Mat 17:22-23, Luk 43-45)

30 Kũ ò bò gwe, akũ ò pã̀ Galilinɛ. Yesu ye ògↄ̃ a kúki dↄ̃ro, 31 zaakũ àtɛn yã da a ìbanↄnɛmɛ. À pìńnɛ: Oni Bisãsiri Nɛ́ na gbɛ̃nↄnɛ ń ↄĩ ò a dɛ, a gↄrↄ aakↄ̃de zĩ ani futɛ. 32 Odi a yã pìi dↄ̀rↄ dↄ̃ro, akũ vĩna ń kũ ò yã pì gbɛkaa.

Tɛna Yesui lán nɛ́ fíti bà

(Mat 18:1-9, Luk 9:46-50)

33 Akũ ò kà Kapɛnamu. Gↄrↄ kũ à kú bɛ, à a ìbanↄ là à pì: Bↄ́ lɛ́kpakↄ̃an átɛn kɛ zɛ́ gũnn? 34 Akũ ò yĩtɛna, zaakũ òtɛn lɛ́kpakↄ̃a kɛ zɛ́ gũn deńla yã musumɛ. 35 Akũ à vùtɛ à gbɛ̃nↄn kuri awɛɛpla pìnↄ sìsiai à pì: Tó gbɛ̃ ye à kɛ gbɛ̃ káaku ũ, ade gↄ̃ gbɛ̃ kpɛde ũ, àgↄ̃ gbɛ̃ sĩnda pínkinɛ zĩ̀ri ũ. 36 À nɛ́ fíti sɛ̀ à a zɛ̀ ń arɛ, akũ à a sɛ̀ à a kpà a kùla à pìńnɛ: 37 Gbɛ̃ kũ à nɛ́ dínↄ do sì ma ìbakɛ yãi, makũmɛ à sì. Gbɛ̃ kũ à ma si sↄ̃, makũmɛ à sì madoro, gbɛ̃ kũ à ma zĩn à sì.

Gbɛ̃ kũ adi ibɛrɛ kpá kũooro bi ó gbɛ̃mɛ

(Luk 9:49-50)

38 Akũ Yuhana pìnɛ: Dannɛri, o gbɛ̃ke è, àtɛn tãnanↄ goḿma kũ n tↄ́o, akũ o ginɛ, zaakũ ó gbɛ̃nlo. 39 Akũ Yesu pì: Àsun gínɛro, zaakũ gbɛ̃ke ni fↄ̃ à daboyã kɛ kũ ma tↄ́o à ɛra à ma tↄ́ vãni sí doro. 40 Gbɛ̃ kũ adi ibɛrɛ kpá kũooro bi ó baakpɛmɛ. 41 Yãpuran matɛn oárɛ, gbɛ̃ kũ à á gba ímina kũ á kun Kirisi pↄ́ ũ yãi, ade ni kura a láadairo.

42 Tó gbɛ̃ tò nɛ́ kũ ò ma náani vĩ dínↄ doke sã̀tɛ, anigↄ̃ sã̀na adenɛ ò wísilↄgbɛ zↄ̃kↄ̃ dↄ a wakalɛ ò a zu sɛ̀bɛɛ gũn. 43-44 Tó n ↄ mɛ́ àdi tó ǹ fu, ǹ zↄ̃ ǹ zukũna. À sã̀nannɛ ǹ gɛ̃ wɛ̃̀ndii gũn kũ ↄ kusuo de n gↄ̃ kũ ↄ mɛ̀n plaola ǹ gɛ̃ tɛ́ kũ àdi garo gũn gyãwãn. 45-46 Tó n gbá mɛ́ àdi tó ǹ sãtɛ, ǹ zↄ̃ ǹ zukũna. À sã̀nannɛ ǹ gɛ̃ wɛ̃̀ndii gũn ɛrɛ ũ de n gↄ̃ kũ gbá mɛ̀n plaola ò n zu tɛ́n. 47 Tó n wɛ́ mɛ́ àdi tó ǹ fu, ǹ bo. À sã̀nannɛ ǹ gɛ̃ kpata kũ à bò Luda kĩnaa gũn kũ wɛ́ doo de n gↄ̃ kũ wɛ́ mɛ̀n plaola ò n zu tɛ́n, 48 gu kũ ń kↄ̀kↄbirii dì lákaro, tɛ́ pìi dì garo.

49 Tɛ́ ni mɛ̀ ũ gbɛ̃ sĩnda pínkia lákũ òdi pↄ́ kɛkɛ kũ wisio nà. 50 Wisi bi pↄ́ manamɛ, ama tó a nna tà, deran oni kɛ nà à gↄ̃ wisi ũ dↄↄ? À tó wisi gↄ̃ kú á gũn, ánigↄ̃ nna kũ kↄ̃o.