Luda yã takada kũ Bisã yão MATIU 16

Farisinↄ manafiki

(Maa 8:11-21, Luk 12:54-56)

1 Farisinↄ kũ Sadusinↄ sù Yesu kĩnaa de ò a yↄ̃ ò gwa, akũ ò a gbɛ̀ka à sèeda ke kɛńnɛ kũ Luda gbãnao ò e. 2 Akũ Yesu wèḿma à pì: Tó ifãntɛ̃ gɛ̃̀ kpɛ́n adì pi, ludambɛ ni kɛ̃kↄ̃a, zaakũ à tɛ̃ra kũ̀. 3 Tó kↄnkↄmɛ adì pi, legũ ni ma gbãra, zaakũ ludambɛ de tɛ̃ɛ gɛ̃̀nɛgɛ̃nɛ. Á ludambɛ wɛ́ dↄ̃kↄ̃nɛ, ama ádi fↄ̃ à gↄrↄ díkĩna sèeda dↄ̃ro. 4 Gbãragbɛ̃ vãni ludanaanikɛrisarinↄ mɛ́ òdi sèedaa gbɛkama, ama mani sèeda ke kɛńnɛro, sé Inusa pↄ́. Akũ à ń tó gwe à tà.

5 Kũ a ìbanↄ bikũ̀ bara gwe, burodi zàna yã sã̀ńgu. 6 Akũ Yesu pìńnɛ: Àgↄ̃ á zĩda kũna dↄ̃! À laakari kɛ Farisinↄ kũ Sadusinↄ lùbɛnɛɛi. 7 Akũ òtɛn pikↄ̃nɛ: Kũ ódi burodi sɛ́ro yãin à ò lɛ. 8 Yesu dↄ̃̀ḿma, akũ à ń lá à pì: Ludanaanikĩanadenↄ, bↄ́yãin átɛn pikↄ̃nɛ kũ á burodi vĩro yãimɛɛ? 9 Ari tera adi dↄ̃roo? Burodi mɛ̀n sↄↄro kũ ma kpà gbɛ̃nↄn dúbu sↄↄronↄa yã dí dↄáguroo? Á sɛ̀tɛ tãnko mɛ̀n ũgbamɛɛ? 10 Burodi mɛ̀n suppla kũ ma kpà gbɛ̃nↄn dúbu siikↄ̃nↄa sↄ̃, a sɛ̀tɛ tãnko mɛ̀n ũgbamɛɛ? 11 Bↄ́yãin adi dↄ̃ kũ burodi yãn mádi oárɛroroo? À laakari kɛ Farisinↄ kũ Sadusinↄ lùbɛnɛɛi! 12 Akũ ò dↄ̃̀ sà adi kɛ lùbɛnɛɛn àtɛn ońnɛ ò laakari kɛiro, Farisinↄ kũ Sadusinↄ yãdannɛnaamɛ.

Pita Yesu Arumasihukɛna onaa

(Maa 8:27-33, Luk 9:18-22)

13 Kũ Yesu kà Sizaria Filipi bùsun, akũ à a ìbanↄ là à pì: Dín gbɛ̃nↄ tɛn pi Bisãsiri Nɛ́ de a ũu? 14 Ò wèa ò pì: Gbɛ̃kenↄ dì pi Yahaya Da'itɛkɛriimɛ, gbɛ̃kenↄ dì pi Iliasu, gbɛ̃kenↄ dì pi dↄ Ilimia ke annabi yãnↄ dokemɛ n ũ. 15 Yesu pì: Ákↄ̃nↄ sↄ̃, dín adì pi má de a ũu? 16 Simↄ Pita wèa à pì: Arumasihumɛ n ũ, Luda Wɛ̃̀ndide Nɛ́. 17 Akũ Yesu pìnɛ: Arubarikademɛ n ũ, Inusa nɛ́ Simↄ! Zaakũ adi kɛ bisãsiri mɛ́ à yã bire dànnɛro, ma De kũ à kú musumɛ. 18 Matɛn onnɛ: Pitamɛ n ũ, gbɛ̀si pìn mani ma sↄsi kátɛa, gyãwãn gbãna ni zĩ̀ blearo. 19 Mani kpata kũ à bò Luda kĩnaa mↄ̀nɛnↄ kpámma. Pↄ́ kũ n yĩ̀ zĩtɛ yĩna musu. Pↄ́ kũ n pòro zĩtɛ porona musu. 20 Akũ Yesu a ìbanↄ sã fĩ̀ńnɛ de òsun o gbɛ̃kenɛ kũ Arumasihun a ũro.

Yesu a ga kũ a vunaao yã'onaa

(Maa 8:31-38, Luk 9:22-26)

21 Zaa gↄrↄ kũ̀a Yesu tɛni a Yurusalɛmu gɛna bↄkↄtɛ a ìbanↄnɛ à pì, séde à wɛ́tãmma le manamana gbɛ̃ zↄ̃kↄ̃nↄ kũ sa'orikinↄ kũ ludayãdannɛrinↄ ↄĩ, oni a dɛ, a gↄrↄ aakↄ̃de zĩ áni vu. 22 Akũ Pita gɛ̀ɛ kãao kpado, àtɛn gínɛ à pì: Kai Dikiri! Abirekũ ni n lero! 23 Akũ Yesu lìtɛ à pì Pitanɛ: Ǹ gomɛnɛ gwe Setan! Ń ye ǹ zɛ́ zↄ̃mɛnɛmɛ. N laasun bi Luda pↄ́nlo, bisãsiri pↄ́mɛ.

24 Akũ Yesu pì a ìbanↄnɛ: Tó gbɛ̃ ye à kɛ ma ìba ũ, séde à gí a zĩda wɛ̃̀ndiii, à a lígbãndurukpana sɛ́ à tɛ́omai. 25 Gbɛ̃ kũ à ye àgↄ̃ a wɛ̃̀ndi kũna ni kurai. Gbɛ̃ kũ à gì a wɛ̃̀ndiii ma yãi sↄ̃, ade mɛ́ anigↄ̃ wɛ̃̀ndi vĩ. 26 Tó gbɛ̃ gↄ̃̀ à andunia vĩ pínki, tó à kùra a wɛ̃̀ndiii, bↄ́ àreen ani lee? Bↄ́n gbɛ̃ ni le à a wɛ̃̀ndi lilin kɛoo? 27 Zaakũ Bisãsiri Nɛ́ ni ɛra à su a De gakuri gũn kũ a malaikanↄ, ani fĩna bo baadinɛ a yãkɛnaaa.

28 Yãpuran matɛn oárɛ, gbɛ̃kenↄ kú gu dín oni garo ari ò Bisãsiri Nɛ́ e, àtɛn su kína ũ.