16
Fↄkpammanaa
1 Matɛni ó dãre Febe, Kɛnkɛrɛa sↄsi gbɛ̃nↄ zĩ̀ri naárɛ á ↄĩ.
2 À a sí Dikiri gũn, lákũ à mana Luda gbɛ̃nↄ kɛ kũ kↄ̃o nà. À kpái kũ pↄ́ kũ à yei á kĩnaao pínki, zaakũ à kpà gbɛ̃nↄi dasi kũ makũo se.
3 À fↄ kpá Pirisila kũ Akilaooa. Ma zĩkɛri dakenↄmɛ Kirisi Yesu zĩ gũn.
4 Ò sì ò ń zĩda da kari gũn ma yãi. Adi kɛ makũmɛ madoro, buri pãnde sↄsinↄ gbɛ̃nↄ tɛni ń sáabu kpá pínki dↄ.
5 À fↄ kpá sↄsi gbɛ̃ kũ òdigↄ̃ kↄ̃ kakara ń ↄnnnↄa.
À fↄ kpá ma gbɛ̃ yenyĩde Ɛpɛnɛtua, àkũ kũ à Kirisi náani kɛ̀ Asia bùsun káaku.
6 À fↄ kpá Mariamaa, àkũ kũ à zĩ kɛ̀árɛ manamana.
7 À fↄ kpá Andarↄniku kũ Yuniaooa. Ma buri dake kũ ò ó dá kpɛ́siran lɛɛlɛnↄmɛ. Ò tↄ́ bò Luda zĩ̀rinↄ tɛ́, akũsↄ̃ ò kú Kirisi gũn ma ã.
8 À fↄ kpá Ampliatu kũ à de ma gbɛ̃ yenyĩde ũ Dikiri gũnwa.
9 À fↄ kpá Ubanu kũ à de ó zĩkɛri dake ũ Kirisi zĩ gũnwa kũ ma gbɛ̃ yenyĩde Satakio.
10 À fↄ kpá Apɛlɛ kũ à zɛna gbãna Kirisi gũnwa.
À fↄ kpá Arisitↄbulu bedenↄa.
11 À fↄ kpá ma Yuda dake Hɛrↄdiↄ̃a.
À fↄ kpá Nasisu bede kũ ò kú Dikiri gũnnↄa.
12 À fↄ kpá Tirifɛna kũ Tirifosaooa. Nↄgbɛ̃ pìnↄ dì zĩ kɛ Dikirinɛ manamana.
À fↄ kpá Pɛsia. Nↄgbɛ̃ yenyĩde pì zĩ kɛ̀ Dikirinɛ manamana.
13 À fↄ kpá Rufu kũ à bò ado Dikiri zĩ gũnwa kũ a da kũ matɛn gwa ma da ũo.
14 À fↄ kpá Asinkiritua kũ Flɛgↄ̃o kũ Ɛmɛsio kũ Patarobao kũ Ɛmao kũ ń Yesude dake kũ ò kú lɛɛlɛnↄ ń pínki.
15 À fↄ kpá Filↄlↄgua kũ Yuliao kũ Nɛrɛuo kũ a dãreo kũ Ɔlimpao kũ Luda gbɛ̃ kũ ò kú lɛɛlɛnↄ ń pínki.
16 À fↄ kpákↄ̃a kũ Luda gbɛ̃nↄ lɛ́pɛmmanaao. Kirisi sↄsinↄ gbɛ̃nↄ fↄ kpàáwa ń pínki.
Lɛ́zammanaa
17 Ma gbɛ̃nↄ, matɛn oárɛ à laakari kɛ gbɛ̃ kũ ò bò yã kũ a dàda kpɛnↄi. Òdi gbɛ̃nↄ kɛ̃kↄ̃a ò gbɛ̃nↄ sãtɛ. À kɛ̃ḿma,
18 zaakũ gbɛ̃ bire takanↄ dì do ó Dikiri Kirisiiro, sé ń gbɛrɛ yã. Òdi taarisaridenↄ sãtɛ kũ lɛ́nnao kũ yãdↄ̃o.
19 Gbɛ̃ sĩnda pínki á mìnatɛna Dikirinɛ baaruu mà. Matɛn pↄnna kɛ á yã musu. Má ye àgↄ̃ yã mana ↄ̃ndↄ̃ vĩ àgↄ̃ wɛ́siradenↄ ũ yã vãni musu.
20 Luda Aafiade ni Setan dúgu zↄ̃ á gbá zĩtɛ tera. Ó Dikiri Yesu gbɛ̃kɛ kɛárɛ.
21 Ma zĩkɛri dake Timↄti kũ ma buri dakenↄ Lusiu kũ Yasↄ̃o kũ Sosipatao fↄ kpàáwa.
22 Makũ Tɛtiu kũ ma takada dí kɛ̃̀ fↄ kpàáwa Dikiri gũn.
23-24 Ma bede Gayusi kũ sↄsi gbɛ̃nↄ dì kↄ̃ kakara a ↄnn fↄ kpàáwa. Wɛ̃tɛ ↄgↄ'utɛri Erasatu fↄ kpàáwa kũ ó gbɛ̃ndo Kaatuo.
Luda tↄ́bↄnaa
25 Tera sà Luda ni fↄ̃ à á gba gbãna kũ Yesu Kirisi baaru kũ matɛn kpáo, lákũ asiriyã kũ à utɛna zaa káaku kũ ò bìriamɛnɛo de nà.
26 Luda kũ àdigↄ̃ kun gↄrↄ sĩnda pínki dìtɛ ò yã kũ à kɛ̃na annabinↄ takadanↄ gũn pì bo gupuraa sà, de buri sĩnda pínki le à dↄ̃ ò Luda náani kɛ ò gↄ̃ a yãmarinↄ ũ.
27 Ò Luda mɛ̀n do ↄ̃ndↄ̃de tↄ́ bo Yesu Kirisi gãi ari gↄrↄ sĩnda pínki! Aami.