9
Luda Isarailanↄ sɛna a gbɛ̃nↄ ũ
1 Matɛn yãpura o Kirisi gũmmɛ, mádi ɛ́kɛ toro. Ma laasun dì we kũ Luda Ninio se.
2 Ma pↄsira kɛ̀ zↄ̃kↄ̃, ma nɛ̀sɛɛ dìgↄ̃ yakana gↄrↄ sĩnda pínki.
3 Mani fↄ̃ mà wɛ́ kɛ Ludaa à ma bo Kirisi gũn, à láari kɛma ma Isaraila dakenↄ gɛ̃nɛ ũ.
4 Mↄ́kↄ̃nↄn Luda ń sɛ́ a nɛ́nↄ ũ, à a gakuri mↄ̀ńnɛ, a bàka kú kũńwo, à a doka kpàḿma, à donyĩkɛnaa dàńnɛ, à lɛ́ sɛ̀ńnɛ.
5 Ò de Luda gbɛ̃ káakunↄ burinↄ ũ, akũsↄ̃ ń buri gũnn Kirisi kũ à de gbɛ̃ sĩnda pínkila bòn bisãsiri ũ. Àkũmɛ Luda kũ à kũ̀ ògↄ̃ a sáabu kpá gↄrↄ sĩnda pínki ũ. Aami.
6 Adi kɛ yã kũ Luda ò lɛ̀tɛ pãnlo, zaakũ Isaraila gbɛ̃ sĩnda pínkimɛ Isaraila yãpura ũro.
7 Adi kɛ Ibrahĩ buri sĩnda pínkimɛ Ibrahĩ pì nɛ́nↄ ũ Luda kĩnaaro, zaakũ Luda ò Ibrahĩnɛ à pì, Isaaku burinↄn onigↄ̃ pińnɛ a burinↄ ũ.
8 Lɛmɛ adi kɛ nɛ́ kũ à ń í kũ pↄyeinaaonↄmɛ Luda nɛ́nↄ ũro, nɛ́ kũ à ń í Luda lɛ́sɛnaa musunↄmɛ buri pìnↄ ũ.
9 Zaakũ Luda lɛ́ sɛ̀ à pì: Mani ɛra mà su ziki mandara'i, Sara ni nɛ́ i gↄ̃gbɛ̃ ũ.
10-12 Adi kɛ abire adoro. Luda dì gbɛ̃nↄ sɛ́ lákũ a pↄyenyĩnaa bàmɛ, adi kɛ ń yãkɛna yãinlo, kũ à ń sísi yãimɛ. Lɛmɛ kũ Rɛbɛka sìkanↄ nↄ̀ↄ sì kũ ó dizi káaku Isaakuo, ari àgↄ̃ gɛ́ ń i, ari ògↄ̃ gɛ́ yã mana ke a vãni kɛ, Luda pì Rɛbɛkanɛ, a kũ à bò káaku nigↄ̃ nɛ́ ũ gbɛ̃ kpɛdenɛ.
13 Lákũ ò kɛ̃̀ Luda yãn nà ò pì:
Má ye Yakubui,
Isau sↄ̃, ma gii.
14 Óni pi deramɛɛ? Yã vãni kú Luda kĩnaan yá? Lɛnlo fá!
15 Zaakũ à pì Musanɛ,
gbɛ̃ kũ á ye à sùru kɛ kãaon áni kɛo,
akũsↄ̃ gbɛ̃ kũ á ye à wɛ̃nda dↄ̃nɛn áni dↄ̃nɛ.
16 A yã mɛ́ à tò Luda gbɛ̃nↄ sɛna dí bo bisãsirinↄ pↄyeinaa gãiro ke ń kokarikɛnan, à bò Luda sùru gũmmɛ.
17 Zaakũ Luda ò Firi'aunanɛ a yãn à pì: Ma n ka kpatan de mà a gbãna mↄ gbɛ̃nↄnɛ n musumɛ, ò ma tↄ́ kpá andunia gũn pínki.
18 Lɛmɛ gbɛ̃ kũ à ye à sùru kɛ kãaon àdi kɛ kãao lɛ, akũsↄ̃ gbɛ̃ kũ à ye à a sã gbãgbãn àdi gbãgbã.
Luda pↄfɛ̃ kũ a sùruuo
19 Á gbɛ̃ke ni ma la, bↄ́yãi Luda tɛn gbɛ̃nↄ taari le dↄↄ? Dí mɛ́ ani fↄ̃ à gí Luda pↄyenyĩnaaii?
20 Mↄkↄ̃n bisãsiri ina, dímɛ n ũ gbasa ǹ yã sí Ludalaa? Oro ni a bòri la à pi: Bↄ́yãi n ma bo lán dí bà yá?
21 Orobori zɛ́ vĩ à oro sãde kũ a sãsario bo kũ ɛ̃ dokↄ̃nↄ kũ à tòtooroo?
22 Tó Luda ye à a pↄfɛ̃ mↄńnɛ de ò a gbãna dↄ̃, akũ à mɛna zↄ̃kↄ̃ↄ kɛ̀ kũ gbɛ̃ kũ ò de à pↄfɛ̃ kipaḿma à ń kakatɛnↄ sↄ̃ bi!
23 Tó à abire pìi kɛ̀, de ókↄ̃nↄ kũ à sùru kɛ̀ kũoonↄ a gakuri zↄ̃kↄ̃ dↄ̃ sↄ̃ bi, ókↄ̃nↄ kũ à gĩnakɛ à ó kɛ́kɛ de ò gɛ̃ a gakuri pìi gũnnↄ!
24 Gbɛ̃ kũ Luda ń sísi à ń sɛ́ pìnↄn ó ũ. Adi kɛ Yudanↄmɛ ńtɛ̃nɛro, kũ buri pãndenↄomɛ se.
25 Lákũ Luda ò annabi Osea takadan nà à pì:
Buri kũ ò de ma gbɛ̃nↄ ũronↄn mani pińnɛ ma gbɛ̃nↄ.
Buri kũ má yeńyĩronↄn manigↄ̃ yeńyĩ.
26 Gu kũ Luda pìńnɛ ò de a gbɛ̃nↄ ũro,
gwen oni ń sísi Luda Wɛ̃̀ndide pì nɛ́nↄ.
27 Isaya wiki lɛ̀ Isarailanↄ yã musu à pì:
Bee tó Isarailanↄn dasi
lán ísiralɛ bùsu'atɛ̃ bà,
ń kpara kũ à gↄ̃̀ mɛ́ ani bo.
28 Zaakũ Dikiri ni yã kũ à ò kɛ andunia gũn,
akũsↄ̃ ani a mì dɛ zɛnaa sarimɛ.
29 Lákũ Isaya gĩnakɛ à ò nà à pì:
Tó Dikiri Zĩ̀karide dí ó buri kenↄ tó yãro,
de o gↄ̃ lán Sↄdↄmudenↄ bà,
de o kɛ lán Gↄmↄradenↄ bà.
Isarailanↄ gina Kirisi baaruui
30 Óni pi deramɛ sàa? Buri pãndenↄ tɛn wɛtɛ Luda tó yã bo kũńwo nnaro, akũ à tò à bò kũńwo nna. À tò yã bò kũńwo nna a náani kũ ò kɛ̀ yãi.
31 Isarailanↄ sↄ̃ òtɛn wɛtɛ Luda tó yã bo kũńwo nna doka musu, akũ adi bo kũńwo nnaro.
32 Bↄ́yãii? kũ ò ye Luda tó yã bo kũńwo nna ń yãkɛnaaa yãimɛ, adi kɛ a náanikɛna yãinlo. Ò gɛ̃̀ɛ sì gbɛ̀ kũ àdi ń pãtɛa
33 lákũ ò kɛ̃̀ Luda yãn nà:
Ǹ gwa, matɛn gbɛ̀ kũ àdi tó ò gɛ̃̀ sí ditɛ Zaiↄ̃,
gbɛ̀si kũ àdi tó ò fu.
Wé'i ni gbɛ̃ kũ à a náani kɛ̀ kũro.