11
Dauda yena Basɛbai
1 Kũ í bò wɛ̀ɛn, gↄrↄ kũ kínanↄ dì gɛ́ zĩ̀ ká, akũ Dauda Yoabu zĩ̀ kũ a ìbanↄ kũ Isarailanↄ ń pínki. Ò Amↄninↄ ásaru kɛ̀, akũ ò lìka Rabai. Dauda sↄ̃ à kú Yurusalɛmu.
2 Kũ ↄkↄsi kɛ̀, akũ Dauda fùtɛ a gádoa, àtɛn lika a kpɛ́ musu. Zaa kpɛ́ musu gwe akũ à nↄgbɛ̃ ke è, àtɛn zú o. Nↄgbɛ̃ pì bi nↄ manamɛ manamana,
3 akũ à gbɛ̃ zĩ̀ ò nↄgbɛ̃ pì yã gbɛka. Akũ ò pìnɛ: Ɛliamu nɛ́ Basɛban gwe, Iti buri Uria nanↄmɛ.
4 Akũ Dauda gbɛ̃nↄ zĩ̀ ò a sísi. Kũ à sù, akũ Dauda wùtɛ kãao, akũ nↄgbɛ̃ pìi tà bɛ. Àkũ sↄ̃, a okũna gbã̀a bò dufumɛ.
5 Kũ à nↄ̀ↄ sì, akũ à lɛ́gbãzã kɛ̀ Daudanɛ à pì a nↄ̀ↄ sì.
6 Akũ Dauda gbɛ̃ zĩ̀ Yoabua à pì: Ǹ Iti buri Uria gbarɛmɛnɛ. Akũ Yoabu a gbàrɛnɛ.
7 Kũ Uria pìi sù, akũ Dauda Yoabu aafia gbɛ̀ka kũ zĩ̀karinↄ kũ zĩ̀ kũ òtɛn káo.
8 Akũ Dauda pìnɛ: Ǹ tá bɛ ǹ zú o. Kũ Uria bò kínabɛa, akũ kína gbɛ̃ zĩ̀a kũ pↄ́bleo.
9 Ama Uria dí tá a bɛaro, kínabɛ gãnu gũnn à ìn kũ kínabɛ zĩkɛrinↄ.
10 Kũ ò ò Daudanɛ ò pì, Uria dí tá a bɛaro, akũ à Uria là à pì: À de n bo tái n sumɛ gwɛɛ? À kɛ̀ dera ńdi tá bɛroo?
11 Uria wèa à pì: Àkpati kũ Isarailanↄ kũ Yudanↄn kú bizakutanↄ gũn. Ma dikiri Yoabu kũ a gbɛ̃nↄn kú zĩ̀lan. Mani fↄ̃ mà tá bɛ mà pↄ́ ble mà í mi, mà wútɛ kũ ma nanↄoro. Kũ n kunnaao mani yã pìi taka kɛro.
12 Akũ Dauda pìnɛ: Ǹ gↄ̃ la gbãra dↄ, zian mani n gbarɛ. Akũ Uria gↄ̃̀ Yurusalɛmu zĩ birea kũ a gu làa dↄnaao dↄ.
13 Dauda a sìsi à pↄ́ blè à í mì kãao, akũ Dauda í kàkanɛ. Ama kũ à bò ↄkↄsi, à gɛ̀ɛ à ì kũ a dikiri kína zĩkɛrinↄomɛ, adi tá a bɛaro.
14 Kũ gu dↄ̀ Dauda takada kɛ̃̀ Yoabunɛ, akũ à Uria gbàrɛo.
15 Takada pìi gũn à pì: À Uria dońnɛ arɛ gu kũ zĩ̀ pãsĩn, à bo a kpɛ de ò le ò a dɛ.
16 Gↄrↄ kũ Yoabu tɛn lika wɛ̃tɛ pìii, akũ à Uria dà gu kũ à dↄ̃ gↄ̃sa gbãnanↄn kún.
17 Kũ wɛ̃tɛdenↄ bↄ̀tɛ òtɛn zĩ̀ ká kũ Yoabuo, ò Dauda zĩ̀kari kenↄ dɛ̀dɛ. Iti buri Uria kú ń tɛ́.
18 Akũ Yoabu gbɛ̃ zĩ̀ Daudaa de à zĩ̀ yã gbãnɛ pínki.
19 À pì zĩ̀rii pìinɛ: Tó n zĩ̀ yã gbã̀ kínanɛ pínki n laka,
20 tó a nɛ̀sɛɛ fùtɛ à n la à pì: Bↄ́ mɛ́ à tò a na wɛ̃tɛi kãnikãni kũ zĩ̀ioo? Á dↄ̃ kũ bĩnimusudenↄ dì kà gbarɛńyĩ zĩtɛroo?
21 Dí mɛ́ à Gidiↄn nɛ́ Abimɛlɛki dɛ̀ɛ? Nↄgbɛ̃ mɛ́ à ↄ sↄ̃̀ wísilↄgbɛɛi zaa bĩni musu, akũ à a dɛ̀ Tebeziroo? À kɛ̀ dera a na bĩnii kãnikãni lɛɛ? Tó à ònnɛ lɛ, ǹ onɛ a zↄ̀bleri Uria, Iti buri gà dↄ.
22 Akũ zĩ̀rii pìi dà zɛ́n. Kũ à kà Dauda kĩnaa, à yã kũ Yoabu dàarɛ ònɛ pínki.
23 À pì: Gbɛ̃nↄ bↄ̀tɛ wɛ̃tɛ gũn òtɛn gbãna mↄwɛrɛ bĩni kpɛmɛ, akũ o pɛḿma ari ń wɛ̃tɛ bĩnilɛa.
24 Ń kàzurinↄn kú zaa bĩni musu, akũ ò kà fã̀ n gbɛ̃nↄ tɛ́ zĩtɛ ò n gbɛ̃kenↄ dɛ̀dɛ. N zↄ̀bleri Uria, Iti buri gà dↄ.
25 Akũ Dauda ò zĩ̀rii pìinɛ: Ǹ o Yoabunɛ àsun tó yã pì kɛnɛ ĩniro. Òdigↄ̃ dↄ̃ gbɛ̃ kũ zĩ̀ ni ń blero. À zĩ̀ ká kũ wɛ̃tɛpidenↄ kũ gbãnao à wɛ̃tɛ pì kakatɛ. Ǹ a gba swɛ̃̀ lɛ.
26 Kũ Uria nanↄ mà a zã gà, à ↄ́ↄ dↄ̀.
27 Kũ ò gɛ̀ɛ kɛ̀ ò làka, Dauda gbɛ̃nↄ zĩ̀ ò sù kãao a bɛa, akũ à gↄ̃̀ a nↄ ũ. À nɛ́ ì kãao gↄ̃gbɛ̃ ũ, akũ yã kũ Dauda kɛ̀ɛ pìi kɛ̀ Dikirinɛ ĩni.