15
Abusalomu bona Dauda kpɛ
1 Abire gbɛra Abusalomu sↄ̃go lè a zĩdanɛ kũ sↄ̃nↄ kũ gↄ̃gbɛ̃nↄ gbɛ̃nↄn bupla akuri kũ onigↄ̃ bàa lɛ́ a arɛnↄ.
2 Àdi futɛ kↄnkↄkↄnkↄ àgↄ̃ zɛna bĩnilɛ sarɛ. Tó gbɛ̃ yã vĩ kũ a gbɛ̃dakeo àtɛn gɛ́o kína kĩnaa à kɛkɛnɛ, Abusalomu dì ade sísi à pinɛ: Wɛ̃tɛ kpaten n bonn? Tó à wèa à pì: Makũ n zↄ̀bleri ma bo Isaraila buri dí gũmmɛ,
3 akũ Abusalomu dì pinɛ: N yã nnamɛ, à zɛ́ vĩ, ama kína gbɛ̃ke kun à sã kpá n yãiro.
4 Abusalomu dì ɛra à pi: Tó ò ma kɛ yãkpatɛkɛri ũ ó bùsun, gbɛ̃ kũ à yã vĩ ke gbɛ̃ kũ àtɛn gbɛ̃ gbɛka yãkpatɛkɛkia ń pínki anigↄ̃ su ma kĩnaa, manigↄ̃ a yã kɛkɛnɛ a zɛ́a.
5 Tó gbɛ̃ sù à kùtɛ a arɛ, àdi ↄ bo à ade kũ à lɛ́ pɛ́a.
6 Lɛn àdigↄ̃ kɛ lɛ Isaraila kũ òtɛn su yãkpatɛ kɛ kína kĩnaanↄnɛ ń pínki, akũ ń swɛ̃̀ɛ tà a kpa.
7 Wɛ̃̀ siikↄ̃ gbɛra à pì kínanɛ: Ǹ ma gba zɛ́ mà gɛ́ la kũ ma dà Dikirinɛ sa o zaa Ɛblↄnu.
8 Makũ n zↄ̀bleri ma lɛ́ pìi gbɛ̃̀nɛ gↄrↄ kũ má kú Gesuru, Siria bùsun ma pì: Tó Dikiri tò ma su Yurusalɛmu, mani sa oa Ɛblↄnumɛ.
9 Kína pìnɛ: Ǹ gɛ́ ǹ su aafia! Akũ à fùtɛ à gɛ̀ɛ Ɛblↄnu.
10 À gbɛ̃nↄ zĩ̀ Isaraila burinↄ kĩnaa pínki à pì: Tó a kuru'ũ mà dↄ, à pi Abusalomu mɛ́ à kí blè Ɛblↄnu.
11 Gↄrↄ kũ àtɛn futɛ Yurusalɛmu à gbɛ̃nↄ sìsi gbɛ̃nↄn wàa do ò gɛ́ kãáo, akũ ò gɛ̀ɛ kũ nɛ̀sɛ mɛ̀n doo, ò yã pìi asiri dↄ̃ro.
12 Gↄrↄ kũ àtɛn sa o, à Gilo gbɛ̃ Aitofɛli, Dauda lɛ́dammarii sìsi zaa a bɛ wɛ̃tɛn, akũ lɛ́kpakũsũna Daudai tɛn kara. Gbɛ̃ kũ ò kú kũ Abusalomuonↄ dasi tɛn kara.
Dauda bàasinaa
13 Baarukparii sù à pì Daudanɛ: Isarailanↄ swɛ̃̀ɛ tà Abusalomua.
14 Akũ Dauda pì a ìba kũ ò kú kãao Yurusalɛmunↄnɛ: À futɛ ò bàa lɛ́. Tó ódi kɛ lɛro, óni le ò bo Abusalomu ↄĩro. Ò kɛ likalika. Tó ódi kɛ likalikaro, ani ó le la, ani ó ásaru kɛ, ani wɛ̃tɛdenↄ dɛdɛ kũ fɛ̃nɛdao.
15 Kína ìbanↄ pìnɛ: Ó dikiri kína, yã kũ n zɛo pínki, ókↄ̃nↄ n zↄ̀blerinↄ o lakamɛ.
16 Akũ kína dà zɛ́n. A bedenↄ bò ò tɛ̀i ń pínki, ama à a nↄ yìgisaride mɛ̀n kurinↄ tò gwe ògↄ̃ bɛ gwa.
17 Kína dà zɛ́n lɛ kũ a gbɛ̃nↄ. Kũ ò kà wɛ̃tɛ kpɛ, à lìtɛ à zɛ̀.
18 Akũ a ìbanↄ pínki kũ a dogarinↄ kũ Gatadenↄ gbɛ̃nↄn wàa aakↄ̃ kũ ò tɛ́i zaa Gatanↄ gɛ̃̀tɛ ń pínki.
19 Akũ kína pì Gata gbɛ̃ Itainɛ: Bↄ́yãi ntɛn gɛ́ kũoomɛɛ? Ǹ ɛra ǹ tá ǹgↄ̃ kú kũ kína dufuo, zaakũ gbɛ̃ zĩ̀tↄↄmɛ n ũ, n bo n bùsummɛ.
20 N suna dí gↄrↄ pla kɛro, akũ ń ye ǹgↄ̃ likara zↄ̃ kũoo yá? Má dↄ̃ gu kũ matɛn gɛ́nlo. Ǹ n gbɛ̃nↄ kakara ǹ tá kũńwo. Dikiri gbɛ̃kɛ kũ náani yão kɛnnɛ.
21 Akũ Itai wèa à pì: Ma dikiri kína, kũ Dikiri kunnaao kũ n kunnaao, gu kũ ń kun pínki, makũ n zↄ̀bleri manigↄ̃ kú gwemɛ, mani ga yá kesↄ̃ manigↄ̃ kun yá.
22 Akũ Dauda pìnɛ: Ǹ domɛnɛ arɛ ò gɛ́! Akũ Gata gbɛ̃ Itai ɛ̀ra à dà zɛ́n kũ a gbɛ̃nↄ kũ a danɛ kũ ò kú kãaonↄ ń pínki.
23 Kũ òtɛn gɛ̃ zɛ́la ń pínki, akũ bùsudenↄ wiki lɛ̀. Kũ kína bikũ̀ Kidironua, akũ ń pínki ò gbáranna zɛ́ sɛ̀.
24 Zadↄki kú gwe dↄ kũ Levinↄ ń pínki. Ò Luda bàka kunna kũńwo àkpati sɛna. Ò àkpatii pìi dìtɛ Abiata sarɛ ari gbɛ̃nↄ bↄ̀tɛ wɛ̃tɛn ò làka ń pínki.
25 Akũ kína pì Zadↄkinɛ: Ǹ Luda àkpati sɛ́ ǹ gɛ̃o wɛ̃tɛ gũn. Tó ma Dikiri pↄnna lè, ani tó mà su mà wɛ́ sialɛ kũ a kúkio.
26 Tó à pì ma yã dí káaguro sↄ̃, ma laka. À kɛmɛnɛ lákũ à kɛ̀arɛ mana nà.
27 Akũ kína ɛ̀ra à pì sa'ori Zadↄkinɛ: Wɛ́gupu'eriimɛ n ũroo? Ǹ ɛra ǹ tá wɛ̃tɛ gũn aafia kũ n nɛ́ Aimazao kũ Abiata nɛ́ Yonatão. À tá kũ á nɛ́ gbɛ̃nↄn pla pìnↄ.
28 Manigↄ̃ zɛna swabikũkia sɛ̃̀ntɛ ari mà baaru maáwa.
29 Akũ Zadↄki kũ Abiatao Luda àkpatii sɛ̀ ò tào Yurusalɛmu, akũ ò gↄ̃̀ gwe.
30 Dauda tɛn Kùkpɛ sĩ̀sĩ kũ àtɛn ↄ́ↄ dↄ. À pↄ́ kù a mìia, à kyate kpanaro. Gbɛ̃ kũ ò kú kãaonↄ pↄ́ kù ń mìia ń pínki, òtɛn ↄ́ↄ dↄdↄ òtɛn gɛ́o.
31 Kũ ò pì Daudanɛ Aitofɛli kú gbɛ̃ kũ ò zɛ̀ kũ Abusalomuonↄ tɛ́, akũ Dauda adua kɛ̀ à pì: Dikiri, ǹ tó a lɛ́damma gↄ̃ de yã fayasaride ũ.
32 Kũ Dauda kà sĩ̀sĩ mìsↄ̃ntɛa, gu kũ donyĩkɛki kún, Aki gbɛ̃ Usai sù à dàalɛ, a uta kɛ̃na akũsↄ̃ bùsu kú a mìia.
33 Dauda pìnɛ: Tó n gɛ kũmao, ĩnigↄ̃ demɛnɛ aso ũmɛ.
34 Tó n ɛra n ta wɛ̃tɛn, akũ n ò Abusalomunɛ a zↄ̀bleriimɛ n ũ sↄ̃, ĩni Aitofɛli lɛ́damma gboromɛnɛmɛ. Ǹ pinɛ a de zↄ̀bleriimɛ n ũ yã, ama tera n gↄ̃ a zↄ̀bleri ũmɛ sà.
35 Sa'orinↄ Zadↄki kũ Abiatao gↄ̃ kú kũnwo gwe. Ǹ yã kũ n mà kínabɛa babańnɛ pínki.
36 Ń nɛ́ gbɛ̃nↄn planↄn kú kũnwo gwe, Zadↄki nɛ́ Aimaza kũ Abiata nɛ́ Yonatão. Tó n yãke mà, ǹ nɛ́ pìnↄ zĩ ò su ò omɛnɛ.
37 Akũ Dauda gbɛ̃nna Usai pìi tà, à kà Yurusalɛmu gↄrↄ kũ Abusalomu tɛn gɛ̃.