22
Dauda Dikiri sáabukpana a zĩ̀blena yã musu
(Zab 18)
1 Kũ Dikiri kína Dauda bò Solu kũ a ibɛrɛ kparanↄ ↄĩ, à lɛ̀ɛ dà kũ Dikiri tↄ́o
2 à pì:
Dikirimɛ ma gbɛ̀si kũ ma zɛki gbãnao ũ,
ma surabariimɛ.
3 Ma Ludamɛ ma gbɛ̀si ũ, madì nai.
Àkũmɛ ma sɛ̃gbako ũ
ma surabari gbãna kũ ma guleio,
ma utɛki kũ ma bokio,
àdi ma sí gbɛ̃ pãsĩnↄa.
4 Dikiri kà ò a sáabu kpá.
Madì a sísi, àdi ma bo ma ibɛrɛnↄ ↄĩ.
5 Gó'itɛ vlɛ̃̀ kũmao,
ísↄ̃ kũ àdi ń kakatɛ tɛni ma ble.
6 Mira bànↄ lìkamai,
ga tankutɛ kpàkpamɛnɛ ma arɛ.
7 Kũ má kú wari gũn lɛ, ma Dikiri sìsi,
ma wiki lɛ̀ ma Ludaa,
akũ à ma kòtoo mà zaa a bɛa,
ma wiki kà a kĩnaa, à gɛ̃̀ a sãn.
8 Zĩtɛ lùkaluka à yĩ̀gãyĩgã,
kpinↄ dègedege ari ń zĩnin.
Ò lùkaluka kũ a pↄ fɛ̃̀ yãi.
9 Túsukpɛ bò a yĩn,
tɛ́ kũ àdi ń kpata bò a lɛ́n,
a yↄ̃̀nↄ tɛn tɛ́ kɛ a arɛ.
10 À musu wɛ̃̀ à kìpa,
legũ sìsi a gbá gbáru.
11 Àtɛn vura dina kɛrubu kpɛ,
àtɛn yàa kɛ ĩala.
12 À gusira dà a zĩdala,
ludambɛ sira kũ̀ a kúkila.
13 Zaa a gakuri tɛ́kɛnaa gũn
legũ tɛn pí pãsĩpãsĩ.
14 Dikiri pàta zaa musu,
Luda Musude kòto dↄ legũpũtãna ũ.
15 À kàa fã̀ ma ibɛrɛnↄa à ń fãkↄ̃a,
à tò legũ pìḿma à pɛ̀ḿma.
16 Kũ Dikiri pàtaḿma,
kũ à pↄ́ bò a yĩn,
ísira zĩtɛ bò gupuraa,
andunia zĩni gↄ̃̀ katɛna pótompo.
17 À ↄ bò zaa musu à ma kũ,
à ma bo swada gũn.
18 À ma si ma ibɛrɛ gbãna ↄĩ
kũ ma zãnguri kũ ń gbãna demalanↄ.
19 Ò lɛ̀tɛma ma sunyĩkɛgↄrↄa,
ama Dikiri zɛ̀ kũmao.
20 À ma bo à ma gba mɛ̀poroki,
à ma sura bà kũ à yemai yãi.
21 Dikiri yã kɛ̀mɛnɛ ma nɛ̀sɛmana lɛ́n,
à fĩna bòmɛnɛ ma gbãsĩsarikɛ lɛ́n.
22 Zaakũ má Luda yãditɛnanↄ kũna,
mádi yã vãni kɛ ma a Luda tònlo.
23 A dokayãnↄ dìgↄ̃ domɛnɛ arɛ pínki,
mádi kpɛ li yã kũ à dìtɛnↄnɛro.
24 Má kunna taari vĩ Dikirinɛro,
má a zĩda kũna durunna sari.
25 Dikiri fĩna bòmɛnɛ ma nɛ̀sɛmana lɛ́n,
zaakũ à è má kun gbãsĩ sari.
26 Náanidemɛ n ũ náanidenↄnɛ,
taarisaridemɛ n ũ taarisaridenↄnɛ.
27 Ń swáswa gbɛ̃ swáswanↄnɛ,
ama ndì ibɛrɛ kpá kũ gbɛ̃ dↄ̀rↄsaridenↄo.
28 Ndì zĩdabusarinↄ sura ba,
ndì zĩdabirinↄ lago.
29 Dikiri, mↄkↄ̃mmɛ ma fitila ũ,
Dikiri, ndì ma gusira litɛ gupura ũ.
30 Kũ n gbãnao mani fↄ̃ mà kusi karaaa,
ma Luda gãi mani fↄ̃ mà vĩ gbĩ̀la.
31 Luda díkĩna sↄ̃ a yãkɛna papana,
Dikiri yã mamberu vĩro, à swáswa,
à de sɛ̃gbako ũ gbɛ̃ kũ ò nàinↄnɛ.
32 Dikiri baasiro, dín Luda ũu?
Ó Luda baasiro, dín gbɛ̀si ũu?
33 Luda mɛ́ àdi ma gba gbãna,
àkũ àdi zɛ́ poromɛnɛ súsu.
34 Àdi tó ma gbá kãi gↄ̃ nna lán zↄ̃ pↄ́ bà,
àdi tó màgↄ̃ táa o guleinↄ musu.
35 Àdi zĩ̀kanaa dadamɛnɛ,
ari ma gã̀sã ni fↄ̃ à mↄ̀gotɛ̃ sá gá.
36 Ndì n zĩ̀blena sɛ̃gbako kpáma,
ndì natɛ ǹ ma tↄ́ bo.
37 Ndì ma zɛ́ yàasa kũmɛnɛ,
de ma gbá sún sataro.
38 Ma pɛtɛ ma ibɛrɛnↄi ma ń dúgu zↄ̃̀,
mádi ɛra mà suro, sé ma gɛ ma ń dɛdɛ.
39 Ma ń wiwi dúgudugu, odi fↄ̃ ò fùtɛ doro,
ò lɛ̀tɛ ò gↄ̃̀ katɛna ma gbá gɛ̃i.
40 N ma gba gbãna ma zĩ̀i kào,
n tò ma ibɛrɛnↄ mìi nàtɛmɛnɛ.
41 N tò ma zãngurinↄ kpɛ lì,
akũ ma a ibɛrɛ pìnↄ kàkatɛ.
42 Ò wiki lɛ̀, gbɛ̃ke dí ń sura baro,
ò lɛ́ zù Dikirii, adi weḿmaro.
43 Ma ń kɛ́ nɛ́kunɛku lán bùsutiti bà,
ma táa òḿma lán zɛ́ gũn bↄkↄtↄ bà.
44 N ma bo ma gbɛ̃ kũ ò fùtɛmainↄ ↄĩ,
n ma kɛ burinↄ mìde ũ.
Buri kũ má ń dↄ̃ronↄ dì zↄ̀ blemɛnɛ,
45 buri zĩ̀tↄnↄ dì kã natɛmɛnɛ.
Tó ò ma yã mà, òdi mì natɛmɛnɛ.
46 Ń kã dì ga,
òdi bo ń kúki gbãnanↄn kũ lukanaao.
47 Dikiri kun! Arubarikademɛ ma gbɛ̀si ũ!
Ò Luda ma gbɛ̀si ma surabari tↄ́ bo!
48 Luda mɛ́ àdi mↄra káḿmamɛnɛ,
àdi tó burinↄ mì natɛmɛnɛ,
49 àdi tó mà piti ma ibɛrɛnↄa.
N ma gba gbãna de ma zãngurinↄla,
n ma bo gbɛ̃ pãsĩnↄ ↄĩ.
50 Abire yãi mani n sáabu kpá burinↄ tɛ́,
mani n tↄ́ kpá, Dikiri.
51 Dikiri dì zĩ̀ zↄ̃kↄ̃ ble kína kũ á sɛ̀ɛnɛ,
àdi gbɛ̃kɛ kɛ kína kũ á kàanɛ,
makũ Dauda kũ ma burinↄ
ari gↄrↄ sĩnda pínki.