113
Santoiq Khễn Yiang Sursĩ, Yuaq Án Táq O Níc
1 Lứq khễn Yiang Sursĩ!
Anhia ca táq ranáq Yiang Sursĩ ơi!
Cóq anhia khễn ramứh Yiang Sursĩ!
2 Yỗn máh cũai khễn ramứh Yiang Sursĩ, tễ sanua toau chumát mantái níc.
3 Tễ angia mandang loŏh toau toâq angia mandang pât,
cóq khễn ramứh Yiang Sursĩ!
4 Yiang Sursĩ sốt nheq dũ cruang cũai.
Chớc sốt cớp ŏ́c poang tễ Yiang Sursĩ ỡt tâng pỡng paloŏng.
5 Tỡ bữn noau li cớp Yiang Sursĩ la Yiang hái sang,
án ca sốt tễ pỡng sarỡih ki.
6 Ma án tapoang asễng cớp hữm dũ ramứh tâng paloŏng cớp tâng cốc cutễq nâi.
7 Án acŏ́q cũai túh cadĩt tễ phốn cutễq,
cớp án acŏ́q cũai túh arức tễ ntốq alới chĩuq tanhĩr.
8 Án yỗn alới cỡt yớu cớp cũai sốt,
cớp yỗn alới tacu parnơi cớp cũai bữn chớc toâr lứq.
9 Án yỗn mansễm cũt cỡt bữn con,
cớp yỗn mansễm ki sâng bũi óh cỗ bữn con acái.
Lứq khễn Yiang Sursĩ!