127
Sa‑ỡn Ŏ́c Ayooq Tễ Yiang Sursĩ
1 Khân Yiang Sursĩ tỡ bữn patứng yỗn dống,
cũai chiang táq dống ki táq lakéh miat.
Khân Yiang Sursĩ tỡ bữn catáng curiaq vil,
máh cũai tahan tayứng kĩaq ngoah toong vil la tỡ bữn kia ntrớu.
2 Bếq muoi mpứt, chơ tamỡ tễ cláih, cớp táq ranáq ntâng dŏq siem sac sâiq
la tỡ bữn cỡt kia ntrớu.
Yuaq Yiang Sursĩ khoiq thrũan dŏq yỗn cũai án ayooq, dếh bo alới bếq hỡ.
3 Máh con acái la mun Yiang Sursĩ yỗn.
Alới bữn ŏ́c bốn lứq tễ Yiang Sursĩ.
4 Máh con samiang canỡt bo mpoaq án noâng póng,
con ki cỡt samoât saráh tamĩang tahan yống tâng atĩ.
5 Bốn lứq cũai ca bữn sa‑ữi saráh tâng sa-ŏ́h án.
Cũai par‑ũal án, lứq tỡ nai bữn riap
toâq ramóh án tâng ntốq noau rasữq.