146
Catoaih Atỡng Dŏq Khễn Yiang Sursĩ
1 Lứq khễn Yiang Sursĩ!
Mứt pahỡm cứq ơi! Cóq mới khễn Yiang Sursĩ!
2 Bo cứq noâng tamoong cứq cóq khễn Yiang Sursĩ.
Cứq lứq ũat cansái ũat khễn Yiang Sursĩ sốt dỡi tamoong cứq.
3 Chỗi canưm máh cũai sốt;
yuaq alới la cũai miat sâng,
alới tỡ têq chuai hái ntrớu yỗn têq bữn tamoong.
4 Toâq alới ta-ŏh rangứh,
alới lứq chu loah pỡ cutễq tê.
Tữ tangái ki toâq,
máh ngê alới khoiq sarhống lứq cỡt pứt nheq.
5 Bốn lứq toâq pỡ máh cũai ca bữn Yiang Sursĩ chuai alới,
la Yiang Yacốp sang.
Cũai ki poâng ống Yiang Sursĩ la Ncháu alới.
6 Án la Yiang ca tễng paloŏng, cutễq, dỡq mưt,
cớp dũ ramứh ỡt tâng ki hỡ.
Án lứq táq samoât santoiq án khoiq par‑ữq chơ.
7 Toâq án rasữq,
án pruam coah cũai noau padâm.
Cũai aléq ma sâng panhieih,
ki án yỗn bữn cha sana.
Yiang Sursĩ acláh cũai tũ.
8 Yiang Sursĩ chuai cũai sũt yỗn cỡt blang loah.
Yiang Sursĩ chuai dũ náq cũai khoiq dớm,
án acŏ́q ayuor alới yỗn yuor tayứng loah.
Yiang Sursĩ ayooq cũai tanoang o.
9 Yiang Sursĩ bán kĩaq cũai cruang canŏ́h ca ỡt tâng cruang hái.
Cớp án chuai máh cán cumai cớp con cumuiq.
Ma án talốh pupứt máh ngê cũai loâi.
10 Yiang Sursĩ cỡt sốt mantái níc.
Ơ cruang Si-ôn ơi! Yiang Sursĩ anhia la puo ca ỡt mantái níc.
Lứq khễn Yiang Sursĩ!