24
Chiau Ranáq Yỗn Cũai Tễng Rit Sang
1 Tŏ́ng toiq Arôn cayoah cỡt bar chít la pỗn tỗp dŏq táq ranáq. Arôn bữn pỗn náq con samiang, ramứh Nadap, Abi-hu, E-lia-sơ, cớp I-thamar.
2 Ma Nadap cớp Abi-hu cuchĩt nhũang mpoaq alới, cớp alới tỡ bữn bữn con. Yuaq ngkíq, E-lia-sơ cớp I-thamar ễn cỡt cũai tễng rit sang.
3 Puo Davĩt tampễq tŏ́ng toiq Arôn cỡt bar tỗp puai ranáq alới táq. Sadôc la tễ tŏ́ng toiq E-lia-sơ, cớp Ahi-maléc la tễ tŏ́ng toiq I-thamar; alới chuai Davĩt tâng ranáq nâi.
4 Tŏ́ng toiq E-lia-sơ tampễq cỡt muoi chít tapoât tỗp, ma tŏ́ng toiq I-thamar tampễq cỡt tacual tỗp. Táq nneq la cỗ tŏ́ng toiq E-lia-sơ bữn samiang cỡt plỡ tâng dống sũ sa‑ữi hỡn.
5 Ma bar tŏ́ng toiq nâi bữn máh cũai táq ranáq tâng Dống Sang Toâr cớp bữn máh cũai ễn cỡt cũai tễng rit sang; ngkíq noau tampễq ranáq na crơng séng.
6 Bo tŏ́ng toiq E-lia-sơ cớp I-thamar tampễq ranáq na crơng séng, bữn Sê-maya con samiang Nê-thanel tễ tỗp Lê-vi cỡt cũai chĩc ramứh dũ náq cũai tâng pơ choâng moat puo, máh ayững atĩ puo, Sadôc la cũai tễng rit sang, cớp Ahi-maléc con samiang Abia-tha; cớp bữn dếh cũai plỡ tễ dống sũ cũai tễng rit sang cớp cũai tễ dống sũ tỗp Lê-vi ỡt pỡ ki tê.
7 Nheq tữh la bar chít la pỗn dống sũ bữn roap mpỗl, la neq:
muoi la Yê-hôi-arip, bar la Yê-daya,
8 pái la Harim, pỗn la Sê-o-rim,
9 sỡng la Mal-kia, tapoât la Mi-yamin,
10 tapul la Hacôt, tacual la Abia,
11 takêh la Yê-sua, muoi chít la Sê-cania,
12 muoi chít la muoi la E-lia-sip, muoi chít la bar la Yakim,
13 muoi chít la pái la Hupa, muoi chít la pỗn la Yê-sip Ap,
14 muoi chít la sỡng la Bil-cah, muoi chít tapoât la I-mêr,
15 muoi chít tapul la Hê-sir, muoi chít tacual la Hap-pasêt,
16 muoi chít takêh la Pê-tahia, bar chít la Yê-hêt-kêl,
17 bar chít la muoi la Yakin, bar chít la bar la Camul,
18 bar chít la pái la De-laya, cớp bar chít la pỗn la Masĩa.
19 Máh cũai nâi khoiq roap mpỗl táq ranáq tâng Dống Sang Toâr samoât Arôn la achúc achiac alới khoiq anoat, dŏq táq puai samoât Yiang Sursĩ la Ncháu tỗp I-sarel khoiq patâp chơ.
Pơ Ramứh Tỗp Lê-vi
20 Cớp bữn cũai canŏ́h tễ tŏ́ng toiq tỗp Lê-vi cỡt plỡ tâng dống sũ alới bữm, la neq: Tễ con châu Am-ram la Subêl; tễ con châu Subêl la Yê-dia,
21 tễ con châu Rê-habia la It-sia,
22 tễ con châu I-sar la Sê-lô-môt; tễ con châu Sê-lô-môt la Yahat.
23 Tễ con châu Hep-rôn noap puai loah cumo alới cỡt, la neq: Yê-riah, A-maria, Ya-hasiel, cớp Yê-camiam.
24 Tễ con châu Usiel la Mi-ca; tễ con châu Mi-ca la Samir.
25 Tễ con châu It-sia, a‑ễm samiang Mi-ca, la Sa-chari.
26 Tễ con châu Mê-rari la Mali, Muchi, cớp Yasia; tễ con châu Yasia la Be-nô.
27 Tễ con châu Mê-rari sâu Yasia la: Be-nô, Sô-ham, Sacur, cớp Ip-ri.
28-29 Tễ con châu Mali la E-lia-sơ cớp Ki-sơ.
E-lia-sơ ŏ́q con samiang, ma tễ con châu Ki-sơ la Yê-ramil.
30 Tễ con châu Muchi la Mali, Ê-dơ, cớp Yê-ri-môt.
Nheq máh cũai nâi la tễ tŏ́ng toiq Lê-vi, puai dống sũ alới.
31 Cũai plỡ tâng dũ dống sũ cớp a‑ễm samiang tâng tỗp ki, nheq náq alới séng machớng sễm ai alới, la tỗp con samiang Arôn. Cũai tễng rit sang táq ngkíq bo alới roap mpỗl dŏq táq ranáq. Ma alới séng choâng moat puo Davĩt, Sadôc, Ahi-maléc, máh cũai plỡ tễ dống sũ cũai tễng rit sang, cớp máh cũai tễ dống sũ tỗp Lê-vi.