1 Ntɛ Abram ɔsɔtɔ meren 99 mɔ, kɔ Kanu Kəpɔŋ kəwurər kɔ, kəc-loku kɔ: «In' ɔyɔnɛ Kanu nkɛ kəntam mes ma doru fəp mɔ, məkɔt fɔr yem kiriŋ, məcəmɛ pəlompu darəŋ. 2 Indecaŋəs danapa dosu, ina kɔ məna dacɔ, isɔŋ əm yuruya yɛlarəm.» 3 Kɔ Abram ɛŋcəp tobu dəntɔf kɔ Kanu kəloku kɔ ntɛ: 4 «Ta ina, danapa dem dɛndɛ kɔ məna dacɔ: Məndeyɔnɛ kas ka afum a tɔf yɛlarəm. 5 Afɔsɔw' am tewe ta Abram, mba Abraham,* bawo indesɔŋ' am kəyɔnɛ ka kas ka afum a tɔf yɛlarəm. 6 Indesɔŋ əm dokombəra dɔpɔŋ, indesɔŋ' am kəkom ka afum alarəm, abɛ yati ŋandeyi ŋa dacɔ. 7 Indecaŋəs danapa dem kɔ məna dacɔ kəbəp ka yuruya yam kɔ məna məfi-ɛ, indecəmɛ danapa dadɔkɔ darəŋ kɔ yuruya yam doru o doru. Tɛm tatɔkɔ Kanu kam k'indeyɔnɛ kɔ ka yuruya yam kɔ məna məndecepər-ɛ. 8 Indesɔŋ əm kɔ yuruya yam atɔf ŋa Kanahan ŋaŋɛ məntɛp kəc-bɛrɛ mɔ fəp, ŋendeyɔnɛ ŋaŋan doru o doru, iyɔnɛ Kanu kəŋan.» 9 Kɔ Kanu kəloku Abraham: «Məna kɔ yuruya yam, dɛtɛmp dɛtɛmp nəleləs danapa ndɛ səŋcaŋəs mɔ. 10 Ntɛ tɔ nəndetɔmpərərnɛ danapa dem ndɛ iŋcaŋəs kɔ məna kɔ yuruya yam kɔ məndecepər-ɛ. Nwɛ o nwɛ ɔŋyɔnɛ wərkun yuruya yam dacɔ mɔ, pakəŋc kɔ. 11 Kəkəŋc konu kəndementər kəcəmɛ konu danapa dem darəŋ. 12 Kəyɛfɛ dɛtɛmp kɔ dɛtɛmp awut anu arkun fəp packəŋc ŋa tataka ta camət-maas, pəyɔnɛ wəkom wəka kəlɔ kam, kɔ pəyɔnɛ fɛ ti-ɛ fum nwɛ asɔtɔnɛ pəsam nnɔ wəcikəra eyi mɔ, ta ɔyɔnɛ wəka yuruya yam mɔ. 13 Pəmar pade packəŋc nwɛ andekom nde kəlɔ kam kɔ nwɛ andesɔtɔnɛ pəsam mɔ, ti tendeyɔnɛ kəfat ka danapa dem da doru o doru nde dis donu. 14 Wərkun nwɛ o nwɛ antɔkəŋc mɔ, aŋwurɛ wəkayi afum ɔn dacɔ, tɛm tatɔkɔ danapa dem delip nnɔ nkɔn eyi mɔ.» 15 Kɔ Kanu kəloku sɔ Abraham: «Ntɛ tɔyɔnɛ ta wəran kam Saray mɔ, ta məwe kɔ sɔ Saray, kəyɛfɛ mɔkɔ Sara s' ande pac-we kɔ. 16 Kəpocɛ kɔ k'inder, ipocɛ sɔ məna wan nwɛ endekom' am mɔ. Indepocɛ kɔ pətɔt, nkɔn endeyɔnɛ kɛrɛ ka tɔf yɛlarəm. Abɛ a tɔf yɛlarəm ŋandewur kɔ dəris.» 17 Kɔ Abraham ɛŋcəp kəro dəntɔf kəsel, k'olokunɛ dɛbəkəc: «Wərkun wəka meren 100 ɛntam kəkom ba? Kɔ Sara ɔsɔtɔ meren 90 endekom ba?» 18 Kɔ Abraham oloku Kanu: «Məgbətənɛ Səmayila doru!» 19 Kɔ Kanu kəloku: «Ala! Wəran kam Sara endekom' am wan nwɛ məndewe Isiyaka † mɔ. Indecəmɛ danapa dosu darəŋ kɔ nkɔn, iyɛfɛ sɔ icəmɛ di darəŋ kɔ yuruya yɔn kɔ nkɔn eŋcepər-ɛ danapa da doru o doru dɔ. 20 Ntɛ tendeŋərnɛ ti mɔ, ine wəran kam pəc-tolanɛ Səmayila: Indepocɛ kɔ pətɔt, indesɔŋ kɔ dokombəra dɔpɔŋ indesɔŋɛ yuruya yɔn yɛla endeyɔnɛ kas ka abɛ wəco kɔ mɛrəŋ kɔ wətem ka afum alarəm. 21 Mba ntɛ tɔyɔnɛ ta danapa dem mɔ, Sara oŋkom' am tɛm tantɛ dok.» 22 Ntɛ Kanu kəlip kəlok-lokər Abraham mɔ, kɔ Kanu kəmpɛ dareŋc. 23 K'Abraham ɛlɛk wan kɔn Səmayila kɔ afum aŋɛ anakom kəlɔ kɔn disrɛ mɔ fəp, kəbəp ka aŋɛ ɛnawayɛ pəsam pɔn mɔ, ti tɔ tatɔkɔ arkun a kəlɔ kɔn disrɛ fəp. K'ɛŋkəŋc ŋa dɔsɔk din dadɔkɔ, pəmɔ tɔkɔ Kanu kənaloku kɔ ti mɔ. 24 Abraham ɛnasɔtɔ meren 99 a k'andekəŋc kɔ. 25 Wan kɔn Səmayila, ɛnasɔtɔ meren wəco kɔ maas a k'andekəŋc kɔ. 26 Dɔsɔk dadɔkɔ d' aŋkəŋc Abraham kɔ wan kɔn, Səmayila. 27 K'aŋkəŋc arkun aka kəlɔ kɔn disrɛ fəp, kəyɛfɛ acar aŋɛ anakom di mɔ haŋ akɔ ɛnawayɛ pəsam pɔn nnɔ acikəra ŋayi mɔ. K'aŋkəŋc ŋa fəp kɔ nkɔn Abraham.