39
Isifu kiyi kɔn Misira ndena Potifar
1 K'aŋkekərɛ Isifu Misira. Kɔ Potifar wəMisira, wəbɛ wəpɔŋ wəka firawona, nwɛ ɛnayɔnɛ wəkiriŋ ka abum ɔn mɔ, ɛway kɔ afum a Səmayila dəwaca akɔ ŋanakɛrɛ kɔ Misira mɔ.
2 Kanu Kəpɔŋ kənasolɛ Isifu, pəcuca fəp pɔ Kanu Kəpɔŋ kəŋcbaŋ kɔ. Kəlɔ ka wəbɛ kɔn wəMisira k'ɛnayi.
3 Kɔ wəbɛ kɔn ɛnəŋk fɔ Kanu Kəpɔŋ kəsolɛ Isifu. Mosumpər mɔn fəp, Kanu Kəpɔŋ kəŋcmar kɔ mectesɛ kɔ dəwaca.
4 Kɔ Isifu ende pəsɔtɔ kəlaŋ ka wəbɛ kɔn nwɛ ɛŋc-bəcɛ mɔ. Kɔ wəkakɔ ɛlɛk kɔ, k'ɔsɔŋ kɔ dɛbɛ da kəcəmbər-cəmbər mes ma kəlɔ kɔn disrɛ. K'ɛlɛk daka dɔn fəp k'ɛmbɛr di Isifu dəwaca pəc-lompsɛ-lompsɛ kɔ di kəcəmbər-cəmbər.
5 Ntɛ Potifar ɛlaŋ Isifu, a k'ɔsɔŋ kɔ kəcəmbər-cəmbər ka mes ma kəlɔ kɔn disrɛ fəp mɔ, kɔ Kanu Kəpɔŋ kəmpocɛ kəlɔ ka wəMisira nwɛ, teta Isifu. Kɔ kəpocɛ ka Kanu Kəpɔŋ kəsumpər daka da Potifar fəp, kəyɛfɛ dɛkɛr haŋ nde dalɛ.
6 K'ɛsakərɛ teta daka dɔn fəp Isifu, nkɔn ɛnasumpər fɛ sɔ ntɛ o ntɛ mɛnɛ yeri nyɛ eŋc-di mɔ.
Isifu kɔ wəran ka Potifar
Mba Isifu fum wətɔt teyi ɛnayi.
7 Ntɛ mes mamɔkɔ meŋcepər mɔ, kɔ wəran ka wəbɛ kɔn ende pəceŋcər Isifu fɔr, k'oloku kɔ: «Məfəntərɛ kɔ ina!»
8 Kɔ Isifu ɛfati. K'oloku wəran ka wəbɛ kɔn: «Mənəŋk ntɛ wəbɛ kem ɛlɛk mes mɔn fəp k'ɛmbɛr im dəwaca mɔ, tɔsɔŋɛ ɔfɔsɔyɔ ntɛ o ntɛ dɛkɛr k'ɛlɛk sɔ daka dɔn fəp k'ɔsɔŋ im kəcəmbər-cəmbər.
9 Fum nwɛ o nwɛ eyi fɛ nnɔ kəlɔ kaŋkɛ nwɛ elelɛ pəcepər im mɔ. Ɔmɔnɛnɛ f' em ntɛ o ntɛ ta kəlɔ kaŋkɛ mɛnɛ məna, bawo wəran kɔn məyɔnɛ. Ak' endesɔŋ' em oŋ kəyɔ pəlɛc pəpɔŋ, iciyanɛ sɔ Kanu-ɛ?»
10 Kɔ wəran nwɛ ɛŋcəmɛnɛ Isifu moloku mamɔkɔ darəŋ haŋ mataka mɛlarəm. Mba Isifu ɛnawosɛ fɛ mɛcɛm-cɛmnɛ mɔn, kəcərɛ fɔ ŋafəntərɛ kɔ nkɔn.
11 Dɔsɔk dɔlɔma, kɔ Isifu ɛmbɛrɛ dəkəlɔ dəkəlompəs yɛbəc yɔn. Mba dɔsɔk dadɔkɔ afum a kəlɔ kaŋkɔ ali wəkin ɛnayi fɛ dɛkɛr.
12 Kɔ wəran nwɛ osumpər pɛbɛrnɛ pa Isifu k'oloku kɔ: «Məfəntərɛ kɔ ina!» Kɔ Isifu ɛsakərɛ kɔ pɛbɛrnɛ pɔn, k'ɛyɛksɛ k'owur doru.
13 Ntɛ wəran nwɛ ɛnəŋk fɔ Isifu ɛsakərɛ kɔ pɛbɛrnɛ pɔn dəwaca, k'ɛyɛksɛ k'owur doru mɔ.
14 K'ewe afum a kəlɔ kəŋan k'oloku ŋa ntɛ: «Nənəŋk, wəHebəru nwɛ wos im ɛŋkɛrɛ pədefani su mɔ. Isifu ender im a pədefəntərɛ kɔ ina. Ti tɔ iŋkul-kulɛnɛ pəpɔŋ.
15 Ntɛ endecərɛ fɔ kəpɛnɛ k'indɛ dim mɔ, k'ɛyɛksɛ. K'ɛsakər' em pɛbɛrnɛ pɔn kɔ nkɔn owur nde doru.»
16 Kɔ wəran nwɛ ombocərnɛ pɛbɛrnɛ pa Isifu kəsək, haŋ wəbɛ ka Isifu pəc-bɛrɛ dɛkɛr.
17 Kɔ wəran nwɛ oloku wos tin tayi, k'oloku kɔ: «Wəcar wəHebəru nwɛ məŋkɛrɛ su mɔ, ender im a pədefan' im.
18 Mba ntɛ iŋkulɛ-kulɛ pəpɔŋ mɔ, k'ɛsak pɛbɛrnɛ pɔn nnɔ iyi mɔ. Kɔ nkɔn ɛyɛksɛ k'owur nde doru.»
19 Ntɛ wəbɛ ka Isifu ene moloku ma wəran kɔn, nwɛ oŋc-loku kɔ: «Ntɛ tɔ wəcar kam ɔyɔ em!»
20 Kɔ mɛtɛlɛ mɔpɔŋ mosumpər wəbɛ ka Isifu. Kɔ wəkakɔ ɛmbɛr Isifu dəbili kəca nkɛ wəbɛ ɛŋc-bɛr afum ɔn dəbili mɔ. Kɔ Isifu eyi dəndo dəbili.
Kəyi ka Isifu dəbili
21 Kɔ Kanu Kəpɔŋ kəsolɛ Isifu, kɔ kəlas layidi da amera ŋobotu ŋɔkɔ kənasɔŋ kɔ mɔ. Kɔ kəsɔŋɛ wəbɛ wəka dəbili ɛmar kɔ.
22 Kɔ wəbɛ wəka dəbili ɛlɛk aka dəbili fəp k'ɛmbɛr ŋa Isifu dəwaca, ntɛ o ntɛ teŋc-cepər oŋ di mɔ, Isifu ɔ teŋcepər dəwaca kərɛsna.
23 Wəbɛ wəka dəbili ɔŋcmɔmən fɛ sɔ ntɛ o ntɛ Isifu ɛnatɔmpər dəwaca mɔ, bawo Kanu Kəpɔŋ kənasolɛ kɔ, kəclompəsɛ kɔ mosumpər mɔn fəp.