46
Yakuba kəkɔ kɔn Misira
1 Kɔ Yakuba ɔŋkɔ kɔ ca yɔkɔ ɛnayɔ mɔ. Ntɛ ɛmbɛrɛ Bɛrseba mɔ, k'oloŋnɛ di Kanu ka papa kɔn Isiyaka.
2 Kɔ Kanu kəlok-lokər Yakuba kənəŋk ka pibi disrɛ. Kɔ Kanu kəwe kɔ: «Yakuba! Yakuba!» K'owosɛ: «In' ɛwɛ!»
3 Kɔ Kanu kəloku kɔ: «In' ɔfɔ ina Kanu, Kanu ka papa kam. Ta mənesɛ kətor ka Misira. Bawo difɔ iŋkɔ-sɔŋ' am kəyɔnɛ ka kas ka afum alarəm.
4 Sən' endesol kətor ka Misira. In' endesɔŋ' am sɔ kəpɛ. Isifu yati endemɛp' əm fɔr waca wɔn.»
5 Kɔ Yakuba ɛyɛfɛ Bɛrseba. Kɔ awut a Yakuba ŋaŋkekərɛ kas kəŋan, aran aŋan, kɔ awut aŋan cibil ca dəntɔf disrɛ ncɛ Firawona ɛnasɔŋ pakɔ kɛrɛ ŋa mɔ.
6 Kɔ ŋalɛk sɔ yɔcɔl yaŋan kɔ ca yɔkɔ ŋanasɔtɔ atɔf ŋa Kanahan mɔ. Kɔ Yakuba ɔŋkɔ Misira kɔ afum ɔn fəp.
7 K'eŋkenɛnɛ atɔf ŋa Misira awut ɔn arkun kɔ awut-sɔ ɔn arkun, awut ɔn aran kɔ awut-sɔ ɔn aran.
Yakuba dɛlay dɔn
8 Mewe ma awut a Yakuba mɛmɛ, aŋɛ ŋanakɔ Misira mɔ. Yakuba kɔ awut ɔn:
Coco ca Yakuba, Ruben.
9 Awut a Ruben: Henok, Palu, Hecərɔŋ, kɔ Karmi.
10 Awut a Simɔŋ: Yemuyɛl, Yamin, Ohad, Yakin, kɔ Sohar, kɔ Sawul wan wərkun wəka wəKanahanara.
11 Awut a Lewy: Kerson, Kehat, kɔ Merari.
12 Awut a Yuda: Hɛr, Onan, Sɛlah, Perɛc, kɔ Serah, mba Hɛr kɔ Onan ŋanafi nde atɔf ŋa Kanahan. Awut a Perɛc ŋanayɔnɛ Hecərɔŋ kɔ Hamul.
13 Awut a Isakar: Tola, Puwa, Yɔb, kɔ Simrɔŋ.
14 Awut a Sebulɔŋ: Sered, Ɛlɔŋ, kɔ Yahalɛl.
15 Awut akaŋɛ ŋɔ Leya ɛnakomɛ Yakuba nde Padaŋ-Aram, mba wan kɔn wəran Dina eyi fɛ ti. Kəlɛk awut ɔn aran haŋ arkun, ŋanakɔ afum 33.
16 Awut a Kadu: Cifyɔn, Haki, Suni, Ecbɔŋ, Eri, Arodi, kɔ Areli.
17 Awut a Aser: Yima, Yisuwa, Yisuwi, kɔ Beriya, kɔ Sera wəkirɛ kəŋan. Wan ka Beriya: Hebɛr kɔ Malkiyɛl.
18 Awut a Silpa wəmarəs nwɛ Labaŋ ɛnasɔŋ wan kɔn wəran Leya mɔ, ŋɔ akakɔ aŋɛ ɛnakomɛ Yakuba mɔ. Ŋanayi afum wəco kɔ camət-tin.
19 Awut a Rasɛl, wəran ka Yakuba: Isifu kɔ Beŋyamin.
20 Kɔ Isifu nkɔn oŋkom Misira awut mɛrəŋ: Manase kɔ Ɛfrayim, aŋɛ Asnat wan wəran ka Potifera Sali Almamy sa dare da Hon, ɛnakomɛ Isifu mɔ.
21 Awut a Beŋyamin: Bela, Bekɛr, Asubɛl, Kera, Naman, Ehi, Rɔs, Mupim, Hupim, kɔ Ardu.
22 Yuruya yayɛ yɔ Rasɛl ɛnasɔtɔnɛ nkɔn Yakuba, ŋanayi afum wəco kɔ maŋkəlɛ.
23 Wan ka Dan: Husim.
24 Mewe ma awut a Naftali mɛmɛ: Yahcel, Kumi, Yetsɛr, kɔ Silem.
25 Awut a Bilha ŋɔ akakɔ, Bilha nwɛ Labaŋ ɛnasɔŋ wan kɔn wəran Rasɛl mɔ pəyɔkɔ wəcar k'oŋkomɛ ŋa Yakuba. Ŋanayi afum camət-mɛrəŋ.
26 Afum aŋɛ ŋanacɛpsɛ Yakuba kəkɔ ka Misira mɔ, ŋanayi afum 66 aŋɛ ŋanayɔnɛ akom ɔn mɔ, alɔm fɛ aran a awut ɔn arkun de.
27 Awut a Isifu aŋɛ ɛnakom Misira mɔ: Ŋanayi awut mɛrəŋ. Afum a Yakuba aŋɛ ŋanacəpsɛ kɔ darəŋ kəkɔ ka Misira mɔ, ŋanayi fəp faŋan afum 70.
Yakuba kəndɛ kɔn nde Misira
28 Kɔ Yakuba osom Yuda pəyi kɔ kiriŋ kəkɔ ka Kosɛŋ ndena Isifu. Kɔ Yuda ɛmbɛrɛ atɔf ŋa Kosɛŋ.
29 Kɔ Isifu ɛlɛk abil ŋɔn k'ɛmpɛ Kosɛŋ kəkɔ-bəpɛnɛ kɔ papa kɔn Yakuba. Isifu ŋaŋkɔ-wurərɛnɛ kɔ papa kɔn, k'ɛnapsərnɛ kɔ dəkilim kɔ k'ɛyɛfɛ kəbok. K'ombok haŋ.
30 Kɔ Yakuba oloku Isifu: «Intam oŋ kəfi bawo inəŋk əm kəro, k'iŋcərɛ oŋ fɔ məyi doru!»
31 Kɔ Isifu oloku awɛŋc aŋa kɔ afum a papa kɔn: «Ilukus ikɔ iluksɛ Firawona kəbɛrɛ konu. Ikɔ iloku kɔ fɔ: ‹Awɛŋc im aŋa kɔ afum a papa kem aŋɛ ŋanayi atɔf ŋa Kanahan mɔ, ŋander nnɔ iyi mɔ.
32 Afum akɛk a ŋkesiya, cir, kɔ cəna ŋɔ ŋayɔnɛ, bawo akɛk a acɔl ŋɔ. Ŋaŋkɛrɛ yɔcɔl yaŋan fəp kɔ ca yaŋan.›
33 Kɔ tɛm tendebəp ntɛ Firawona endewe nu pəcyif nu: ‹Ake 'yɔnɛ yɛbəc yonu-ɛ?›
34 Nəcloku kɔ: ‹Sən' acar am, akɛk ŋɔ səyɔnɛ, kəyɛfɛ dɛtɛmp dosu haŋ mɔkɔ, yɛbəc yayɔkɔ yɔ səmbəpɛ akombəra asu.› Ti disrɛ, nəyi Kosɛŋ, bawo aMisira ŋambɔtər fɛ akɛk a ŋkesiya kɔ cir.»