6
Kanu kəŋcɛm-cɛmnɛ kɔn kənim ka afum doru
Ntɛ afum ŋaŋcop kəla antɔf kəroŋ mɔ, k'aŋkoməs ayecəra. Kɔ mɛlɛke ŋanəŋk fɔ ayecəra aka afum ŋantesɛ. Kɔ ŋayɛk-yɛk aran aŋan ayecəra akakɔ dacɔ. Kɔ Kanu kəloku: «Ifaŋ fɛ kəsak afum ŋayinɛ kifir kəyinɛ doru nkɛ inasɔŋ ŋa mɔ, bawo fum sɛm dəm yɔ. Kəyi kɔn doru kəfɔde kəc-cepər sɔ meren 120.» Tɛm tatɔkɔ tɔ afum aŋeci ŋanayi doru, ntɛ mɛlɛke * ŋantɛfərnɛ ayecəra aka afum, a kɔ ŋasɔŋ ŋa awut mɔ. Awut akakɔ ŋanayɔnɛ abɛ akur a tɛm tatɔkɔ.
Kɔ Kanu Kəpɔŋ kənəŋk fɔ deyeŋki bəkəc da afum dɛla doru, dɔsɔk o dɔsɔk mɛcɛm-cɛmnɛ mɛlɛc gbəcərəm mɔ afum ŋayinɛ. Kɔ Kanu Kəpɔŋ kəŋaŋnɛ tɛlər kəsɛl kɔn fum, k'abəkəc ŋɛŋkafəlɛ kɔ. Kɔ Kanu kəloku: «Kənim k'inder afum aŋɛ inasɛl mɔ, kəyɛfɛ afum, kəbəp sɛm, kəkɔ ka yeliŋɛ-liŋɛ haŋ bɛmp ya dareŋc, bawo iŋaŋnɛ tɛlər kəsɛl kəŋan.» Mba kɔ Nuha ɔsɔtɔ kəŋanɛnɛ ka Kanu Kəpɔŋ, bawo Kanu kənanəŋk dolompu dɔn.
Kanu kəyac Nuha
Tɛcɛpərɛnɛ ta Nuha k'awut-sɔ ɔn tɛntɛ: Nuha, fum wətɔt ɛnayi pəlomp, ŋasol kɔ Kanu. 10 Nuha, awut maas ŋɔ ɛnakom: Semy, Ham kɔ Yafɛt.
11 Mba nnɔ fɔr ya Kanu kiriŋ, afum ŋanatesɛ fɛ bəkəc. Mes mɛlɛc gbəcərəm mɛnayi doru. 12 Kanu kənanəŋk a doru dɛsəkpɛ, bawo afum fəp ŋanagbaymɛ-gbaymɛ dɔpɔ dɔtɔt. 13 Ti t' ɛnasɔŋɛ Kanu kəloku Nuha: «Iŋcɛm-cɛmnɛ kəmələk yeŋesəm ya doru fəp, bawo tes taŋan tɔsɔŋɛ kɔ doru dɛla kədəkətɛrɛnɛ, kənim ŋa k'inder doru. 14 Məcaŋɛ abil ŋɔpɔŋ cəbam ca kawe, məwurɛ ŋi sədəkəlɔ səlarəm, məsop ŋi kɔrtal tedisrɛ kɔ todoru. 15 Ntɛ tɔ məndecaŋ ŋi: Ŋɔbɔl cururu 300 (mɛtər 137), ŋɔwɔkəl cururu 50 (mɛtər 23), ŋotukmɛ cururu 30 (mɛtər 14). 16 Məgbəpər ŋi tadareŋc, məsak kururu katin (mɛtər dacɔ) kəyɛfɛ nde kəroŋ haŋ nde dəkəpom, məwurɛ ŋi kumba kəsək, mədeŋər ŋi dɛk maas. 17 Bawo ina, domun dɛlarəm d' indesak ndɛ dendemələk ca fəp mɔ. Mpɛ o mpɛ peŋesəm doru mɔ, pendefi. 18 Kɔ məna, indecaŋəs danapa dosu, məde məbɛrɛ debil kɔ wəran kam, awut am k'aran aŋan! 19 Məde məbɛrsɛnɛ sɔ ŋi disrɛ sɛm ya doru fəp mɛrəŋ mɛrəŋ, workun kɔ wɛran, ntɛ tɔŋsɔŋɛ nəde nəyi doru kɔ yi mɔ. 20 Sɛm yeŋesəm ya doru fəp, yorkun kɔ yɛran, yɛfɛt kɔ yɔpɔŋ, yede yɔlɔtərn' am ntɛ tɔŋsɔŋɛ yi sɔ yede yeyi doru mɔ. 21 Awa, mətɛn yeri fəp, məmɛŋkərnɛ yi ntɛ tɔŋsɔŋɛ nəde nəc-sɔtɔ yedi nəna kɔ yi mɔ.»
22 Ti tɔ Nuha ɛnayɔ, ɛnayɔ mes fəp mmɛ Kanu Kəpɔŋ kənaloku kɔ mɔ.
* 6:4 «awut a canu», «afum apɔŋ», kɔ pəyɔnɛ fɛ ti-ɛ, «afum aŋɛ ŋanayɔ mewe mɔpɔŋ mɔ.» 6:17 «wəcafən indetorɛ pəkal doru fəp.»