1 Ben kína kↄ̃n Amanao gàa pↄ́ ble kↄ̃n Ɛsitao. 2 Gurↄↄ kɛ̀ aↄ̃ↄe wɛ̃ɛ mii à gurↄ plaadee pì zĩ, ben kína Ɛsita là à bè: Ɛsita, bↄ́n nɛ́ wɛ́ɛ kɛmaa? Mɛ́ kɛnnɛ. Yã kpareen nɛ́ɛ gbekaamaa? Baa ma kpata kpadoo mɛ́ kpámma. 3 À wèàla à bè: Tó ma n pↄnnaa è bensↄ̃ yã pì kànnɛ, ǹ tó màgↄ̃ kú wɛ̃̀ndio. Wɛ́ɛkɛɛ kɛ̀ má kɛ̀mmaan gwe. Ǹ tó ma gbɛ̃nↄ gↄ̃ wɛ̃̀ndi vĩ. Yã kɛ̀ má gbèkan gwe. 4 Zaakɛ mapi kↄ̃n ma gbɛ̃nↄ, wà dìɛ kɛ̀ wà wa dɛdɛ wà wa kaatɛ wà wa borii bↄmɛ. Tó wèe wa yaa zↄ̀nↄ ũ yãmɛ, lɛ má yĩtɛna. Nawɛ̃a beee taka e ká mà ĩa dammaro. 5 Ben kína à là à bè: Démɛɛ? Dé bé eé fↄ̃ à zɛ kↄ̃n yã beee taka bori kɛnaoee? 6 À wèàla à bè: Amana vãii kɛ̀n ibɛɛ kɛ̀ zàwaguu pì ũ. Swɛ̃̀ kɛ̃̀ Amanan kína kↄ̃n a naↄ̃ pìo yã musu. 7 Kína fɛ̀ɛ a wɛ̃ɛla pↄfɛ̃ guu à gàa líkpɛn a ua guu. Amana sↄ̃ gↄ̃̀ gwe kↄ̃n Ɛsitao, ben Amana e kúɛ kɛɛnɛ a wɛ̃̀ndi yã musu, zaakɛ à è kɛ̀ kína zɛ̀o à zaaa kɛaremɛ. 8 Kɛ̀ kína bↄ̀ líkpɛn à sù pↄ́blekiia gↄ̃ↄ, Amana lɛ̀ɛ kìta daɛbↄ kɛ̀ Ɛsita gɛɛkɛsɛkɛnaa ben à bè: À yezi à kusi ma naↄ̃a ma wáa kpɛ́ guu kɛ̀n yↄ́? Kɛ̀ yã pì bↄ̀ kína lɛ́n gↄ̃ↄ, wà mↄ̀ wà pↄ́ yì Amana uua. 9 Kína dogarinↄ doke Abona bènɛ: Lí pɛɛna Amana pì bɛɛ saɛ à kà gã̀sãsuu baplaa akuri. Àpi bé à lí pì pɛ̀ɛ lɛ à Mↄdekai kɛ̀ yã maaa kɛ̀nnɛɛ logoa. Ben kína bè: À à logo lí pìa. 10 Kɛ̀ aↄ̃ Amana lògo lí kɛ̀ à pɛ̀ɛ Mↄdekainɛ pìa, ben kína pↄfɛ̃ kpàɛ.