Luda yã takada kↄ̃n Bokobaru yão BƆNA 18

Yɛtoro gana Musa gwa

1 Musa anzure Yɛtoro, Midiã sa'ori, yã kɛ̀ Ludaa kɛ̀ Musanɛ kↄ̃n a gbɛ̃ Isarailinↄo mà, lán Dii ń bↄ́ɛ Igipiti nà. 2 Àɛ kɛ̀ sↄ̃ Musa gĩakɛ à a naↄ̃ Zipora zĩ̀ bɛ 3 kↄ̃n a nɛ́gↄ̃gbɛ̃ mɛ̀n plaaanↄ. À doo tↄ́n Gɛsↄmu, zaakɛ Musa bè gbɛ̃ zĩ̀tↄn a ũ danↄ bùsun. 4 À doo tↄ́n Ɛliɛza, zaakɛ Musa bè a de Luda a faaba kɛ̀ à a bↄ Fili'auna fɛ̃ɛdaa lɛ́zĩ. 5 Ben Yɛtoro fɛ̀ɛ èe mↄↄ Musa kiia kↄ̃n à nɛ́nↄ kↄ̃n à naↄ̃o guu kɛ̀ à bùra kàɛn Luda kpiii saɛ gbáan. 6 À lɛ́kpãsã kɛ̀ Musanɛ à bè: Mɛ́ɛ mↄↄ n kiia kↄ̃n n naↄ̃o kↄ̃n n nɛ́ mɛ̀n plaaanↄo. 7 Musa bↄ̀ à gàa à dà a anzurelɛ à kùɛ à lɛ́ pɛ̀ à gasua. Aↄ̃ kↄ̃ aafia gbèka, ben aↄ̃ gɛ̃̀ kpɛ́n. 8 Musa yã kɛ̀ Dii kɛ̀ Fili'aunanɛ kↄ̃n Igipitinↄ Isarailinↄ yãnzi tↄ̃kɛ̃̀nɛ píngi kↄ̃n nawɛ̃a kɛ̀ aↄ̃ↄ è zɛ́ guunↄ píngi kↄ̃n lán Dii ń bↄ́ nào. 9 Yɛtoro pↄↄ kɛ̀ nna yã maaa kɛ̀ Dii kɛ̀ Isarailinↄnɛa píngi kↄ̃n lán à ń bↄ́ Igipitinↄ ↄzĩ nào. 10 Ben à bè: Wà Dii sáabu kpá lán à a bↄ Fili'auna kↄ̃n Igipitinↄ ↄzĩ nà. 11 Má dↄ̃̀ sa kɛ̀ Dii bíta dɛ tãanↄla ń píngi. Kɛ̀ Igipitinↄ kya kàagu, à yã mↄ̀ńnɛ. 12 Ben Yɛtoro sa'opↄ kɛ̀ wè ká tɛ́n à tɛ́ kũ ò Ludaa kↄ̃n sa'opↄ pãndenↄ dↄ. Ben Aruna kↄ̃n Isaraili gbɛ̃nsinↄ ń píngi mↄ̀ wà pↄ́ blèo Luda aɛ.

Yãgↄ̃gↄ̃rinↄ diɛna

13 Kɛ̀ guu dↄ̀ Musa vɛ̃̀ɛ èe yã gↄ̃gↄ̃ↄńnɛ, aↄ̃ↄ káɛzi zaa kↄngↄ ai uusiɛ. 14 Kɛ̀ Musa anzure yã kɛ̀ èe kɛɛńnɛ è píngi, ben à à là à bè: Bↄ́n nɛ́ɛ kɛɛ kↄ̃n gbɛ̃ kɛ̀nↄ lɛɛ? Bↄ́yãnzi nɛ́ɛ yãkpaɛ kɛɛńnɛ ndo, baade píngi káɛnzi zaa kↄngↄ ai uusiɛ? 15 Musa wèàla à bè: Gbɛ̃nↄ è mↄ́ ma kiia aↄ̃ Luda pↄyeziyã mamɛ. 16 Tó aↄ̃ yãkete vĩ, aↄ̃è mↄ́ ma kiia mà yã pì gↄ̃gↄ̃ńnɛ mà Luda doka kɛ̀ à dìɛnↄ ońnɛ.

17 Musa anzure bènɛ: Yã kɛ̀ nɛ́ɛ kɛɛ maaro. 18 Nɛ́ kpasa, gbɛ̃ kɛ̀ aↄ̃ↄ kúnyonↄ é kpasa dↄ, zaakɛ zĩi pì dɛnla, nɛ́ fↄ̃ ǹ kɛ ndoro. 19 Ǹ ma yã ma sa, mɛ́ lɛ́ damma, Luda égↄ̃ kúnyo. Nɛ́gↄ̃ dɛńnɛ yãgↄ̃gↄ̃ri ũ, nɛ́gↄ̃ gaa kↄ̃n ń yãnↄ Luda kiia, 20 nɛ́gↄ̃ doka kɛ̀ Ludaa dìɛnↄ daańnɛ, nɛ́gↄ̃ zɛ́ kɛ̀ dɛ aↄ̃ sɛ́ ↄdↄↄańnɛ kↄ̃n yã kɛ̀ aↄ̃é kɛɛnↄ. 21 Ǹ gbɛ̃ làakaride náanɛdee kɛ̀ aↄ̃ↄ Luda vĩa vĩ ben aↄ̃è ↄdↄnkpɛɛgbaa síroonↄ plɛplɛ ń tɛ́, ǹ ń diɛ gↄ̃ↄn wàa sↄsↄↄroonↄ dↄn'aɛdeenↄ ũ kↄ̃n gↄ̃ↄn basↄsↄↄroo kↄ̃n gↄ̃ↄn baplaa akurio kↄ̃n gↄ̃ↄn kurikurio, 22 lɛ aↄ̃gↄ̃ yã gↄ̃gↄ̃ↄ gbɛ̃ pìnↄnɛ gurↄ píngi. Aↄ̃é mↄ́ n kiia kↄ̃n yã zĩ'ũunↄ píngi, mↄde aↄ̃é yã nɛ́ngonↄ gↄ̃gↄ̃ ń zĩnda. Beee bé eé n asoo lagonnɛ. 23 Tó Dii wènnɛ, tó ń kɛ̀ lɛ, nɛ́ fuaro, gbɛ̃ pìnↄ é tá bɛ làakario kpaɛna.

24 Musa a anzure yã mà à kɛ̀ lán à òare nà píngi. 25 À gbɛ̃ làakarideenↄ plɛ̀plɛ Isaraili boriinↄ tɛ́ píngi à ń díɛ gↄ̃ↄn wàa sↄsↄↄroonↄ dↄn'aɛdeenↄ ũ kↄ̃n gↄ̃ↄn basↄsↄↄroo kↄ̃n gↄ̃ↄn baplaa akurio kↄ̃n gↄ̃ↄn kurikurio. 26 Ben aↄ̃ègↄ̃ yã gↄ̃gↄ̃ↄńnɛ gurↄ píngi. Yã zĩ'ũun aↄ̃è mↄ́o Musa kiia, ben aↄ̃è yã nɛ́ngonↄ gↄ̃gↄ̃ ń zĩnda. 27 Musa gàa à zɛ̀ a anzurenɛ, ben à tà a bùsun.