Luda yã takada kↄ̃n Bokobaru yão 2 TƐSALONIKADEENƆ 1

TƐSALONIKADEENƆ TAKADA PLAADEE

Yãkpaɛkɛna Kirisi mↄ́gurↄↄ zĩ

1 Mamↄma Pↄlu kↄ̃n Silasio kↄ̃n Timↄtio, wámbe wa takada kɛ̀kii kɛ̃̀ Tɛsalonika sↄsi gbɛ̃ kɛ̀ aↄ̃ↄ kú Luda wa De kↄ̃n Dii Yesu Kirisio guunↄnɛ. 2 De Luda kↄ̃n Dii Yesu Kirisio gbɛ̃kɛɛ kɛare, à a gba aafia.

3 Wa gbɛ̃nↄ, à kↄ̃ sìo wàgↄ̃ Luda sáabu kpaa a yã musu gurↄ píngi, lán à maa nà, zaakɛ a ludanaanɛkɛna e gaa aɛ maamaa, bensↄ̃ yenzi kɛ̀ a baade vĩ kↄ̃o e kaara. 4 Beee yãnzi weè lɛ́ gbɛ̃ a yã musu Luda sↄsi kↄ̃n sↄsio guu, lán ée wɛ́ɛtãmma kↄ̃n nawɛ̃a píngio fↄ̃ↄ nà kↄ̃n mɛnao kↄ̃n ludanaanɛkɛnao. 5 Beee ↄ̀dↄa kɛ̀ Luda è yã gↄ̃gↄ̃ kↄ̃n gbɛ̃nↄ a zɛ́amɛ. Beee yãnzi a ka à gɛ̃ kpata kɛ̀ bↄ̀ Luda kiia guu kɛ̀ ée nawɛ̃a kɛɛ à yãnzi. 6 Luda è yã kɛ a zɛ́amɛ. Eé wɛ́ɛ tã gbɛ̃ kɛ̀ aↄ̃ↄe wɛ́ɛ tãaawaanↄa, 7 eé amↄa kɛ̀ wèe wɛ́ɛ tãaawaanↄ gba ĩampakii kↄ̃n wapinↄ, tó Dii Yesu bↄ̀ ludambɛ kↄ̃n a malaika gbãaanↄ 8 kↄ̃n tɛ́vurao. Eé wɛ́ɛ tã ludadↄ̃risai kɛ̀ aↄ̃ↄe wa Dii Yesu baaru nnaa síroonↄa. 9 Kaatɛna yãana sain Luda é wɛ́ɛ tãoḿma. Weé ń kpakɛ Dii aɛzĩ kↄ̃n à gbãa gakuideeo. 10 Tó à mↄ̀ gurↄↄ pì zĩ, eé tↄ́ bↄ a gbɛ̃nↄ yã musu, gbasa à náanɛkɛri pìnↄ é à maa bo ń píngi. Égↄ̃ kú ń tɛ́, zaakɛ a yã kɛ̀ wá òaree sì.

11 Beee yãnzin weègↄ̃ adua kɛɛare kↄ̃sↄ̃kↄ̃sↄ̃zi, lɛ wa Luda tó a kuuna ká gwena kɛ̀ à a sisia, à yã maaa kɛ̀ a zɛ kↄ̃n à kɛnaonↄ kↄ̃n zĩi kɛ̀ ée kɛɛ à náanɛkɛna guunↄ píngi papaare kↄ̃n a gbãaao. 12 Dii Yesu é tↄ́ bↄ a musu, apinↄ sↄ̃ é tↄ́ bↄ à musu wa Luda kↄ̃n Dii Yesu Kirisi pìo gbɛ̃kɛ yãnzi.