Luda yã takada kↄ̃n Bokobaru yão EBERUNƆ 1

EBERUNƆ

Kirisi dɛ malaikanↄla 1:1-2:18

Kirisi dɛ Musala 3:1-4:13

Kirisi dɛ Aruna bori sa'orinↄla 4:14-7:28

Kirisi sa'orikɛɛ dɛńla 8:1-10:39

Wà Luda náanɛ kɛ 11:1-12:25

Lɛ́dammana 13:1-13:25

Luda Nɛ́ dɛ malaikanↄla

1 Luda yã ò wa dezinↄnɛ yã káaku annabinↄ gãzĩ gɛ̃̀n baaagↄ̃ zɛ́nↄn pari, 2 mↄde à yã òwe a Nɛ́ gãzĩ gurↄ zãa kɛ̀nↄn sa. Nɛ́ pì gãzĩn Luda anduna kɛ̀, à dìɛ kɛ̀ àmbe eégↄ̃ pↄ́ sãnda píngi vĩ. 3 Àmbe Luda gakui tɛ́kɛna ũ, à dɛ à kuuna sãnsãn ũ. Àmbe à pↄ́ sãnda píngi kũna kↄ̃n a yã'ona gbãaao. Gbɛ̃nↄ durunkɛ̃nnɛna gbɛra à vɛ̃̀ɛ musu Luda bíta ↄplaazi. 4 Lán tↄ́ kɛ̀ à blè pì dɛ malaikanↄ pↄ́la nà, lɛn à bíta dɛńla lɛ. 5 Luda yã kɛ̀kii ò malaika kenɛ yãↄ́?

Ma Nɛ́n n ũ, gbã̀an ma n i,

Kesↄ̃:

Mɛ́gↄ̃ dɛnɛ De ũ,

eégↄ̃ dɛ ma Nɛ́ ũ.

6 Kɛ̀ Ludaa tò a daudu mↄ̀ anduna guu à bè:

A malaikanↄ dↄnzi kɛnɛ ń píngi.

7 Malaikanↄ yã musu à bè:

Eè a zĩ̀rinↄ li ĩa ũ,

a zĩkɛrinↄ sↄ̃ↄ tɛ́vura ũ.

8 À Nɛ́ yã musu sↄ̃ à bè:

Luda, nɛ́gↄ̃ vɛ̃ɛna kíblekitaa ai gurↄ píngimɛ,

nɛɛ̀gↄ̃ n kíkɛgo kũna yãzɛdee ũ.

9 Ń ye maakɛnazi, n za zaakɛnan.

Beee yãnzi Luda, n Luda, n ka kpatan,

à pↄnnaa pìsimma dɛ n gbɛ̃nↄla.

10 Wà bè dↄ:

Dii, n anduna kãsãa pɛ̀ɛ zaa káaku,

musu nɛ́ n ↄzĩimɛ.

11 Aↄ̃ píngi é gɛ̃tɛ, mↄde nɛ́gↄ̃ kuu.

Aↄ̃é zi kũ lán pↄ́kãsãa bà,

12 nɛ́ ń koko lán uta bà,

nɛ́ ń liɛ lán pↄ́kãsãa bà.

Mpi sↄ̃, n kuuna ègↄ̃ dↄ̃nkↄ̃,

n gurↄↄ yãana vĩro.

13 À yã kɛ̀kii ò malaika kenɛ yãↄ́?

Ǹ vɛ̃ɛ ma ↄplaazi

ai màgↄ̃ n ibɛɛnↄ kɛnnɛ n tinti ũ.

14 Malaikanↄ nɛ́ nini zĩkɛrinↄmɛ ń píngi. Luda è ń zĩ lɛ aↄ̃ dↄ gbɛ̃ kɛ̀ aↄ̃é mìsina enↄlɛmɛ.