Luda yã takada kↄ̃n Bokobaru yão 1 KINANƆ 22

Mikaya annabikɛyã zaa ona Ahabunɛ

1 À kà wɛ̃̀ aagↄ̃ kɛ̀ Sirianↄ kↄ̃n Isarailinↄↄ e zĩ̀ ká kↄ̃oro. 2 À wɛ̃̀ aagↄ̃dee pì guun Yudanↄ kí Yosafata gàa à Isarailinↄ kína lè. 3 Isarailinↄ kína bè a gbɛ̃nↄnɛ: Á dↄ̃ kɛ̀ Ramↄ Giliada nɛ́ wa pↄ́mɛ yãroo? Mↄde wée à sina Sirianↄ kínaa yã kɛro. 4 Ben à Yosafata là à bè: Nɛ́ gámao zĩ̀ ká kↄ̃n Ramↄ Giliadadeenↄroo? Ben Yosafata wèàla à bè: Pↄ́ dↄ̃nkↄ̃n wa ũ, ma gbɛ̃nↄ nɛ́ n gbɛ̃nↄmɛ. Ma sↄ̃nↄ nɛ́ n sↄ̃nↄmɛ. 5 Ben à ɛ̀ara à bènɛ: Ǹ Dii gbeka ǹ ma gĩa. 6 Ben Isarailinↄ kína annabinↄ kàkↄ̃a lán gↄ̃ↄn wàa plaaa bà, ben à ń lá à bè: Mà gá zĩ̀ ká kↄ̃n Ramↄ Giliadadeenↄon yↄ́, ke màton gáro? Ben aↄ̃ wèàla wà bè: Ǹ gá! Dii é ń nannɛ n ↄzĩ. 7 Ben Yosafata bè: Dii annabi kee kú kɛ̀ wà à laroo? 8 Ben Isarailinↄ kína wèàla à bè: Gↄ̃gbɛ̃ kee kuu dↄ, à tↄ́n Mikaya, Imlã nɛ́mɛ. Eé fↄ̃ à yã gbekawe Diia, mↄde má ye à yãziro, zaakɛ è yã maaa e à omɛ zikiro, séde à zaaa. Ben Yosafata bè: Kí, ǹton o lɛro! 9 Ben Isarailinↄ kína a ìbanↄ doke sìsi à bènɛ: Ǹ gá ǹ Imlã nɛ́ Mikaya sísi à mↄ́ kpakpaa.

10 Isarailinↄ kí kↄ̃n Yudanↄ kí Yosafatao baade a kíble'uta dana, aↄ̃ↄ vɛ̃ɛna ń kíblekitaa pↄ́wɛɛgbɛ̃kii kɛ̀ kú Samaria bĩilɛa, ben annabi pìnↄↄ e annabikɛyã oo ń aɛ ń píngi. 11 Kenana nɛ́ Zedekia mↄ̀si pì lán koba bà à bè: Dii bè koba kɛ̀nↄn nɛ́ Sirianↄ zↄ̃zↄ̃o ǹ ń dɛdɛ ń píngi. 12 Ben annabi pìnↄↄ e yã dↄ̃nkↄ̃ oo ń píngi wèe bee: Ǹ gá lɛ́ɛ Ramↄ Giliadaa, nɛ́ fuaro. Dii é ń nánnɛ n ↄzĩ.

13 Gbɛ̃ kɛ̀ gàa Mikaya sísi bènɛ: N annabi daanↄ lɛ́ kɛ̀ don yee! Yã nnaan aↄ̃ↄe oo kínanɛ. Ǹ yã dↄ̃nkↄ̃ pì o se ǹ yã nnaa onɛ. 14 Ben Mikaya bè: Má sì kↄ̃n Dii kuunao, yã kɛ̀ Dii òmɛɛn mɛ́ o kínanɛ.

15 Kɛ̀ à kà, ben kína à là à bè: Mikaya, wà gá zĩ̀ ká kↄ̃n Ramↄ Giliadadeenↄon yↄ́, ke wàton gáro? Ben à wèàla à bè: Ǹ gá lɛ́ɛḿma! Nɛ́ fuaro. Dii é ń nánnɛ n ↄzĩ. 16 Ben kína bènɛ: Gɛ̃̀n ũgban mɛ́ n da ǹ sí kↄ̃n Dii tↄ́o kɛ̀ yãpuraan nɛ́ omɛɛ? 17 Ben Mikaya bè: Ma Isarailinↄ è fãakↄ̃ana sĩ̀sĩnↄ gɛɛzi lán sãa kɛ̀ aↄ̃ↄ dã̀ri vĩroonↄ bà. Ben Dii bèmɛ, gbɛ̃ pìnↄↄ dↄn'aɛdee vĩro. Aↄ̃ baade tá a bɛ aafia. 18 Ben Isarailinↄ kína bè Yosafatanɛ: Nɛ́ɛ ma gweroo? Mɛ́ɛ onnɛ kɛ̀ è yã nnaa e à omɛ zikiro, séde à zaaa? 19 Ben Mikaya ɛ̀ara à bè: Ǹ Dii yã ma! Ma Dii è vɛ̃ɛna a kpatan, ludambɛ zĩ̀kpɛɛnↄↄ zɛzɛ à saɛ ń píngi ↄplazi kↄ̃n ↄzɛzio. 20 Ben Dii bè: Dé bé eé ↄ̃ndↄ̃ↄ daɛmɛ Ahabuzi à gá lɛ́ɛ Ramↄ Giliadaa lɛ à ga gwee? Ben gbɛ̃ke bè la, gbɛ̃ pãnde bè la dↄ. 21 Ben nini ke bↄ̀ à mↄ̀ à zɛ̀ Dii aɛ à bè: Mámbe mɛ́ gá ↄ̃ndↄ̃ↄ daɛzi. Ben Dii à là à bè: Nɛ́ kɛ diamɛ? 22 Ben à wèàla à bè: Mɛ́ gá mà kɛ nini ɛgɛdee ũ mà yã sóso mà ká à annabinↄnɛ ń lɛ́n. Ben Dii bè: Nɛ́ ↄ̃ndↄ̃ↄ daɛzi, nɛ́ fuaro. Ǹ gá kɛ lɛ. 23 Lɛn Dii tò nini ɛgɛdee pì yã sòso à kà n annabi kɛ̀nↄnɛ ń lɛ́n lɛ ń píngi. Mↄ́nzin Dii kpànzi. 24 Ben Kenana nɛ́ Zedekia gàa à Mikaya sãn kɛ̀ à bè: Bↄrɛn Dii Nini gòmala à gàa à yã ònnɛɛ? 25 Ben Mikaya wèàla à bè: Nɛ́ dↄ̃ zĩ kɛ̀ n bàa lɛ̀ n gaa utɛ kpɛ́tu. 26 Ben Isarailinↄ kína bè: À Mikaya kũ à táo wɛ́tɛ kí Amↄ kↄ̃n ma nɛ́ Yoasio kiia, 27 é ońnɛ ma bè wà à da kpɛ́siaan, wàgↄ̃ burɛdi kpáa kↄ̃n ío fétefete ai mà gá suo aafia. 28 Ben Mikaya bè: Tó n gaa n su aafia, ɛ̃ndɛ̃ Dii e yã o ma gãzĩro. Ben Mikaya ɛ̀ara à bè: Asa a baade píngi ma yã pì mà.

Ahabu gana zaa Ramↄ Giliada

29 Isarailinↄ kí kↄ̃n Yudanↄ kí Yosafatao gàa Ramↄ Giliada. 30 Ben Isarailinↄ kína bè Yosafatanɛ: Mɛ́ ma zĩnda liɛ mà si zĩ̀n. Mmↄn sↄ̃, ǹgↄ̃ kú kɛ̀ kↄ̃n n kíble'utao dana. Ben Isarailinↄ kína a zĩnda lìɛ à sì zĩ̀n. 31 Sirianↄ kína gĩakɛ sↄ̃ à ò a sↄ̃goro dↄn'aɛde gↄ̃ↄn baaakuri awɛɛplaaanↄnɛ à bè: Àton aɛ pɛ́ gbɛ̃kea zĩ̀nlo, baa démɛ, séde Isarailinↄ kína ado. 32 Kɛ̀ sↄ̃goro dↄn'aɛdee pìnↄ Yosafata è, aↄ̃ↄe daa Isarailinↄ kínamɛ. Kɛ̀ aↄ̃ sↄ̃ dàa, ben Yosafata wii lɛ̀. 33 Kɛ̀ aↄ̃ↄ è Isarailinↄ kínanlo, ben aↄ̃ à tò gwe.

34 Kɛ̀ gbɛ̃ke kà gbàrɛ, ben à gàa à Isarailinↄ kína pà à gɛ̃̀ à mↄ̀'uta pɛ́kↄ̃rɛkii dagura. Ben à bè a sↄ̃gorodeenɛ: Ǹ sↄ̃ lɛ́ liɛ wà bↄ zĩ̀n, wà ma kɛ̃nnamɛ gwe. 35 Zĩ̀ pì gbãa kpà zĩ beeea, ben wà kína pì kũkũna a sↄ̃goro guu, wà aɛ dↄ̀ Sirianↄa. Guu kɛ̀ wà à kɛ̃̀nnan pì e aru bↄ èe kwɛɛɛ sↄ̃goro guu. Zĩ pìa uusiɛn à gà. 36 Kɛ̀ ↄfãntɛ̃ e gɛ̃ɛ, zĩ̀kpɛɛnↄ wiii kàkũn wà bè, baade tá a bùsun ai a bɛ wɛ́tɛ. 37 Lɛn kína pì gà lɛ, ben wà à gɛ̀ sɛ̀ wà sùo Samaria wà vĩ̀i. 38 Wà à sↄ̃goro pìpi Samaria íkaɛkiia, guu kɛ̀ kaaruanↄ è zú on, ben gbɛ̃ɛnↄ mↄ̀ wà à aru sã̀sã lán Dii gĩakɛ à ò nà.

39 Ahabu yã kpaaanↄↄ kú Isarailinↄ kínanↄ gĩayãkɛnanↄ takadan, yã kɛ̀ à kɛ̀nↄ píngi kↄ̃n kpɛ́ kɛ̀ à bò kↄ̃n wesa swaao kↄ̃n wɛ́tɛ kɛ̀ à kɛ̀kɛ à kàɛnↄ. 40 Kɛ̀ Ahabu gà, ben à nɛ́ Aazia vɛ̃̀ɛ à gbɛ̀n.

Yudanↄ kí Yosafata

41 Isarailinↄ kí Ahabu kíblena wɛ̃̀ siigↄ̃dee guun Asa nɛ́ Yosafata kɛ̀ Yudanↄ kína ũ. 42 À wɛ̃̀ baaakuri asↄↄrodee guun à kɛ̀ kí ũ, ben à kí blè Yerusalɛmu wɛ̃̀ baaasↄↄro. À da tↄ́n Azuba, Sili nɛ́mɛ. 43 À zɛ̀ kↄ̃n a de Asa yãkɛnanↄ zɛ́ píngi guu, èe pãnɛro, à yã kɛ̀ Dii yezi kɛ̀. Baa kↄ̃n beeeo èe tãagbãgbãkii kɛ̀ wà bònↄ gbororo. Wà kpɛ́ wè saa ooa wèe tuaetiti kpataa gwe.

44 Yosafata kↄ̃n Isarailinↄ kínao kú kↄ̃o aafia. 45 À yã kpaaanↄↄ kú Yudanↄ kínanↄ gĩayãkɛnanↄ takadan, à nɛ́gↄ̃gbɛ̃kɛyãnↄ kↄ̃n zĩ̀ kɛ̀ à kànↄ píngi. 46 Tãagbãgbãki kaarua kpaaa kɛ̀ aↄ̃ gↄ̃̀ à bùsun zaa a de Asa gurↄↄanↄ, à pɛ̀ḿma gↄ̃gbɛ̃nↄ kↄ̃n nↄgbɛ̃nↄo ń píngi. 47 Ɛdↄmunↄ bùsu kína vĩ gurↄ beeearo, séde gbɛ̃nsi kɛ̀ Yudanↄ kí dìɛ.

48 À góro'itɛ latabↄnↄ kɛ̀ lɛ aↄ̃ gá vura sɛ́ Ofi, mↄde aↄ̃ↄe e wà bↄ táo ísiaalaro, zaakɛ góro pìnↄ wìwi zaa Ɛziↄ̃ Gɛba. 49 Gurↄ beeean Ahabu nɛ́ Aazia bè Yosafatanɛ à tó a gbɛ̃nↄ da ísiaala kↄ̃n à gbɛ̃nↄ lɛdo, mↄde Yosafata e wero. 50 Kɛ̀ Yosafata gà, wà à mira kpàkↄ̃zi kↄ̃n a dezin pↄ́o a dezi Dauda wɛ́tɛ, ben à nɛ́ Yoramu vɛ̃̀ɛ à gbɛ̀n.

Isarailinↄ kí Aazia

51 Yudanↄ kí Yosafata kíblena wɛ̃̀ gɛ̃ro awɛɛplaadee guun Ahabu nɛ́ Aazia kɛ̀ Isarailinↄ kína ũ Samaria, à kí blè wɛ̃̀ plaa. 52 À yã kɛ̀ Dii yeziroo kɛ̀ kɛ̀ à zɛ̀ kↄ̃n a de kↄ̃n a dao yão kↄ̃n dↄ Nɛbati nɛ́ Yeroboamu kɛ̀ Isarailinↄ dà durunkɛnan yão. 53 À dↄ̀ Baalizi à à gbã̀gbã, ben à Dii Isarailinↄ Luda pↄↄ fɛ̃̀nɛ lán à dee kɛ̀ nà.