Luda yã takada kↄ̃n Bokobaru yão 1 KINANƆ 4

Sulemanu ìbanↄ

1 Kí Sulemanun Isaraili bori píngi kína ũ. 2 À bùsu dↄn'aɛdeenↄ tↄ́n yɛ̀: Zadↄki nɛ́ Azarian sa'oriki ũ. 3 Sisa nɛ́nↄ Ɛliↄrɛfi kↄ̃n Ahiaon à takadakɛ̃rinↄ ũ. Ailudi nɛ́ Yosafatan yãzibaarukɛ̃ri ũ. 4 Yoyada nɛ́ Bɛnayan à zĩ̀kpɛ dↄn'aɛdee ũ. Zadↄki kↄ̃n Abiataon sa'orinↄ ũ. 5 Natã nɛ́ Azarian à gu dↄn'aɛdeenↄ gbɛ̃nsi ũ. Sa'ori Zabudu, Natã nɛ́n à kpàasi ũ. 6 Aisan à bɛgwari ũ. Abada nɛ́ Adoniramun zↄ̀zĩ gbɛ̃nsi ũ.

7 Kí Sulemanu Isarailinↄ bùsu gbɛ̃nsinↄ dìɛdiɛ guunↄa gↄ̃ↄn kuri awɛɛplaa. Wɛ̃̀ kↄ̃n wɛ̃̀o aↄ̃ baade è mↄ́ kína kↄ̃n a uadeenↄnɛ kↄ̃n pↄ́bleeo aↄ̃ baade kↄ̃n a mↄↄo. 8 Aↄ̃ tↄ́n yɛ̀: Bɛnuru bé à Ɛflaimu boriinↄ gu sĩ̀sĩdee vĩ. 9 Bɛnidɛka bé à Makaza kↄ̃n Salabimuo kↄ̃n Bɛsɛmɛsio kↄ̃n Ɛlↄni Bɛtanao vĩ. 10 Bɛnɛsɛdi bé à Arubo kↄ̃n Sokoo vĩ kↄ̃n Ɛfa guuo píngi dↄ. 11 Bɛnabinadabu bé à Dↄru gusĩsĩdee vĩ. Sulemanu nɛ́nↄgbɛ̃ Tafamɛ à nↄↄ ũ. 12 Ailudi nɛ́ Baana bé à Tanaki vĩ kↄ̃n Mɛgidoo kↄ̃n Bɛtɛsã guu kɛ̀ kĩi kↄ̃n Zarɛtão Yɛzɛrili gĩzĩ kpa píngi zaa Bɛtɛsã ai Abɛli Mɛↄla ai Yↄkɛmɛamu kãa kpa. 13 Bɛnigɛba bé à Ramↄ Giliada vĩ kↄ̃n Manase nɛ́ Yairi lakutu kɛ̀ kú Giliada guunnↄ kↄ̃n Agobu guu kɛ̀ kú Basão kↄ̃n à mɛɛwi bĩide mɛ̀n baaagↄ̃ↄnↄ. Wà ń zɛ́ gbãnganↄ kɛ̀ kↄ̃n mↄ̀gotɛ̃omɛ. 14 Ido nɛ́ Ainadabu bé à Manaimu guu vĩ. 15 Aimaza bé à Nafatali guu vĩ. Àmbe à Sulemanu nɛ́nↄgbɛ̃ Basɛma sɛ̀ nↄↄ ũ. 16 Usai nɛ́ Baana bé à Asa guu vĩ kↄ̃n Alotio. 17 Parua nɛ́ Yosafata bé à Isaka guu vĩ. 18 Ela nɛ́ Simɛi bé à Bɛyãmi guu vĩ. 19 Uri nɛ́ Gɛba bé à Giliada guu vĩ. Amↄrinↄ kí Siↄ̃ kↄ̃n Basã kí Oguo bé wà kú gwe yã. Gɛban guu pì dↄn'aɛdee ũ ado. 20 Yudanↄ kↄ̃n Isarailinↄↄ pari lán ísialɛ bùsu'ãatɛ̃ bà. Aↄ̃ègↄ̃ pↄ́ blee wàgↄ̃ í mii wà pↄnnaa kɛ.

Sulemanu nnamana kↄ̃n à ↄ̃ndↄ̃ↄo

21 Zaa Yuflati ai Filisitininↄ bùsun kↄ̃n Igipiti bùsu lɛ́o, Sulemanu bé à kí blè bùsu pìnↄa píngi. Bùsu pìnↄ gbɛ̃nↄ ègↄ̃ tángba kpaaa ai à wɛ̃̀ndi lɛ́n. 22 Sulemanu ua gurↄ do blɛɛn yɛ̀: Flawa sàki baplaa akuri, wísiti sàki basↄↄro. 23 Zù mɛ̀kpana kɛ̀ wà gwà bɛ mɛ̀n kuri, kpàsa zù mɛ̀n baro, sã mɛ̀n basↄↄro kↄ̃n gãanↄ kↄ̃n zↄ̃nↄ kↄ̃n dùanↄ kↄ̃n ko maaanↄ dↄ. 24 Zaakɛ à kí blè bùsu kɛ̀ kú Yuflati ↄfãntɛ̃gɛ̃kpɛn kpaanↄa píngi sɛna zaa Tifisa ai Gaza, bensↄ̃ yãkete kú gukearo. 25 Sulemanu gurↄↄa Yudanↄ kↄ̃n Isaraili kɛ̀ aↄ̃ↄ kú zaa Dani ai Bɛsɛbanↄ kaɛna ń bùsun ń làakaria, baade kↄ̃n a geepi línↄ kↄ̃n a kãkãpura línↄ.

26 Sulemanu sↄ̃ kɛ̀ aↄ̃è góro gáɛnↄ kɛ́sɛ bↄrↄ siigↄ̃. À sↄ̃ kɛ̀ wè diḿmanↄ sↄ̃, bↄrↄ kuri awɛɛplaa. 27 Gu gbɛ̃nsi pìnↄ sↄ̃, aↄ̃ baade ègↄ̃ mↄↄnɛ kↄ̃n blɛɛo a mↄↄn kí Sulemanu kↄ̃n gbɛ̃ kɛ̀ aↄ̃è mↄ́ pↄ́ bleonↄ pↄ́ ũ. Pↄ́ke è kɛ̃sãḿmaro. 28 Aↄ̃ègↄ̃ mↄↄ sↄ̃ pìnↄnɛ kↄ̃n éseo kↄ̃n sɛ̃̀o dↄ guu kɛ̀ aↄ̃ↄ kún, lán wà dìɛ ń baadenɛ nà.

29 Luda Sulemanu gbà ↄ̃ndↄ̃ kↄ̃n wɛ́ɛzɛ̃ɛo maamaa. Weé fↄ̃ wà à dↄ̃na lɛ́ dↄ̃ro, lán weé fↄ̃ wà ísialɛ bùsu'ãatɛ̃ lɛ́ dↄ̃ro nà. 30 Sulemanu ↄ̃ndↄ̃ↄ dɛ ↄfãntɛ̃bↄɛkpadeenↄ kↄ̃n Igipitinↄ pↄ́la ń píngi. 31 À ↄ̃ndↄ̃ↄ dɛ gbɛ̃ píngila. À dɛ Ɛzɛra bori Etani pↄ́la kↄ̃n Maↄli nɛ́nↄ Emani kↄ̃n Kalakↄlio kↄ̃n Daadao. À tↄ́ bↄ̀ bùsu kɛ̀ lìgazinↄ guu píngi. 32 À yáasi zù bↄrↄ aagↄ̃ bensↄ̃ lɛ̀ kɛ̀ à dànↄ kà bↄrↄ do kↄ̃n mɛ̀n sↄↄroo. 33 À línↄ kↄ̃n lánↄ yã bↄkↄ̃tɛna kɛ̀, naana zaa sida lí kɛ̀ kú Lɛbanↄ bùsun ai à gàa pɛ́ sɛ̃̀sↄ̃vlãa kɛ̀ è bↄɛ bĩianↄa. À nↄ̀bↄnↄ yã dàńnɛ dↄ kↄ̃n bãanↄ kↄ̃n pↄ́taa'onkusɛanↄ kↄ̃n kpↄ̀nↄ. 34 Kína kɛ̀ aↄ̃ↄ kú anduna guunↄ à ↄ̃ndↄ̃ baaru mà ń píngi. Bùsu kↄ̃n bùsuo píngi ń gbɛ̃nↄ zĩ̀ wà gá à ↄ̃ndↄ̃yã ma.