Luda yã takada kↄ̃n Bokobaru yão MALAKI 3

Dii yãkpaɛkɛgurↄↄ zĩ

1 Mamↄma Dii Zĩ̀kpɛde ma bè: À ma! Mɛ́ ma zĩ̀ri gbarɛ à dↄmɛ aɛ à zɛ́ kɛkɛmɛ. Dii kɛ̀ eè à kii wɛtɛ é gɛ̃ a kpɛ́n kãndo. À ma, ma bà kuunaao Malaika kɛ̀ a pↄↄ dↄa pì e mↄↄ! 2 Mↄde dé bé eé à mↄ́gurↄↄ fↄ̃ↄ? Tó à bↄ̀ gupuraaa, dé bé eé fↄ̃ à zɛɛ? Zaakɛ eégↄ̃ dɛ lán mↄ̀baasari tɛ́ bàmɛ, lán pↄ́pipiri mↄsↄrↄ gbãaa bà. 3 Eé vɛ̃ɛ à gbɛ̃nↄ baasa à ń gbãsĩ bↄ. Eé gbãsĩ bↄ Levi boriinↄn lán wè kɛ vura kↄ̃n kondogionɛ nà, gbɛ̃nↄ é gbasa wà mↄ́ Diinɛ kↄ̃n gbaanↄ a zɛ́a. 4 Zĩ pìa Yerusalɛmudeenↄ kↄ̃n Yudanↄ ń píngi gbaa é ká Diinɛ lán yãa bà, lán à zii bà.

5 Mamↄma Dii Zĩ̀kpɛde ma bè: Mɛ́ mↄ́azi yãkpaɛkɛkiia mɛ́gↄ̃ wãa mà gbɛ̃ kɛ̀ aↄ̃ↄ ma vĩa vĩroonↄ bↄbↄ ń dàn: Pↄ́dammarinↄ kↄ̃n zinakɛrinↄ kↄ̃n gbɛ̃ kɛ̀ aↄ̃è la da ɛgɛyã musunↄ kↄ̃n gbɛ̃ kɛ̀ aↄ̃è gbãaa mↄ ń zĩkɛrinↄnɛ kↄ̃n gyaanↄnↄ kↄ̃n tonɛnↄ kↄ̃n bↄ̀amↄnↄ.

Kpãi'ona Ludaa

6 Mamↄma Dii mɛɛ̀ liɛro. Beee yãnzin a Yakubu boriinↄ ée kaatɛro. 7 Mamↄma Dii Zĩ̀kpɛde ma bè: Zaa a dezinↄ gurↄↄa a pã ma yãnɛ á tɛ́ziro. À aɛ dↄma, mɛ́ aɛ dↄawa. Eè be, dian wé aɛ dↄmmaa?

8 Gbɛ̃ntee è kpãi o Ludaaↄ́? Mↄde ée kpãi ooma. Eè be, bↄ́ musun ée kpãi oomaa? A pↄ́ kuride kↄ̃n a gbaanↄ yã musumɛ. 9 A bori píngi gↄ̃̀ láari pↄ́ ũ kɛ̀ ée kpãi ooma yãnzi. 10 À mↄ́ kↄ̃n pↄ́ kurideeo píngi à ká ma auzikikaɛkiin, lɛ pↄ́blee gↄ̃ kú ma kpɛ́n. Mamↄma Dii Zĩ̀kpɛde mámbe má ò. À ma lɛ́ beee musu à gwa, tó mɛ́ɛ musu zɛ́ wɛ̃ ma aubarika pìsiare a kora à kákiiziro. 11 Mamↄma Dii Zĩ̀kpɛde ma bè: Mɛ́ kpá a bura pↄ́ yàkarinↄnɛ lɛ aↄ̃ton a pↄ́nↄ kaatɛro. A geepi línↄ nɛ́ é wororo. 12 Bori píngi é be aubarikadeenↄn a ũ, zaakɛ a bùsu égↄ̃ nna. Mamↄma Dii Zĩ̀kpɛde mámbe má ò.

13 Mamↄma Dii ma bè: A yã pãsĩ ò ma musu. Eè be, bↄ́ yãn wá ò n musuu? 14 A bè zↄ̀blena Ludanɛ nɛ́ yã pãamɛ. Kɛ̀ wa zĩi kɛ̀ Dii Zĩ̀kpɛde yãa bensↄ̃ wa pↄsia utanↄ dà à yãnzi, bↄ́ àren wá è? 15 Tia la eè be wadadeenↄn aubarikadeenↄ ũ. Ée daa zaakɛrinↄ bé wèe kãsãa pɛɛɛ, gbɛ̃ kɛ̀ è be Luda pita wà ↄsi ká sↄ̃, yãke è à lero.

16 Ben gbɛ̃ kɛ̀ aↄ̃ↄ Dii vĩa vĩinↄ yã ò kↄ̃o, ben à swã kpà ń yãzi à mà. Ben wà gbɛ̃ kɛ̀ aↄ̃ↄ Dii vĩa vĩi kɛ̀ aↄ̃è laasuu lɛ́anↄ tↄ́ kɛ̃̀ dↄngu takadan à aɛ. 17 Mamↄma Dii Zĩ̀kpɛde ma bè gurↄↄ kɛ̀ ma bↄ kↄ̃n yão, aↄ̃égↄ̃ dɛ ma pↄ́ ũ ma auziki ũ. Mɛ́ sùu kɛńyo lán gbɛ̃ è sùu kɛ kↄ̃n a nɛ́ kɛ̀ èe zĩi kɛɛnɛo nà. 18 É gbɛ̃ maaanↄ kↄ̃n gbɛ̃ zaaanↄ dↄ̃kↄ̃zi sa, gbɛ̃ kɛ̀ aↄ̃ↄe dↄↄ Ludazinↄ kↄ̃n gbɛ̃ kɛ̀ aↄ̃ↄe dↄↄziroonↄ.