Luda yã takada kↄ̃n Bokobaru yão NƐƐMAYA 6

Nɛɛmaya ibɛɛnↄ zɛ́wɛtɛna wà ↄ̃ndↄ̃ↄ kɛzi

1 Ma bĩi bò má yã̀a à foo kú gukea dↄro, mↄde mɛ́ɛ à bĩilɛ gbànↄ pɛ́ɛpɛɛ gĩaro. Kɛ̀ Sambala kↄ̃n Tobiao kↄ̃n Larubu bori Gɛsɛmuo kↄ̃n ma ibɛɛ kpaaanↄ à baaru mà, 2 Sambala kↄ̃n Gɛsɛmu pìo lɛ́kpãsã kɛ̀mɛ wà bè mà mↄ́ mà dańlɛ Onↄ guzurɛ lakutu ke guu. À zaaan aↄ̃ↄe wɛtɛɛmao. 3 Ma gbɛ̃nↄ zĩ̀ḿma ma bè: Mɛ́ɛ zĩ bíta kɛɛmɛ, mɛ́ e mà mↄ́ro. Mɛ́ e mà zĩi pì tó mà mↄ́ a kiiaro. 4 Aↄ̃ lɛ́kpãsã pì kɛ̀mɛ gɛ̃̀n siigↄ̃, ben ma yã mɛ̀n doo pì sìńla. 5 À gɛ̃̀n sↄↄrode Sambala a ìba ke zĩ̀ma. À takada kɛ̀ wèe kãɛ'ↄ naaro kũna. 6 Wà kɛ̃̀ lá pì guu wà bè: Wa yãke wàpe mà bori pãndenↄ kiia, ben Gɛsɛmu bè yãpuramɛ. À bè mpi kↄ̃n Yuda kpaaanↄ a zɛo à bↄ kína yã kpɛɛmɛ. Beee yãnzin ée bĩi pì bozi. Wà bè dↄ ń yezi ǹ gↄ̃ Yudanↄ kína ũmɛ, 7 ben n annabinↄ dìɛ aↄ̃ o Yerusalɛmu kɛ̀ ḿbe ń kína ũ. Kína é yã pì ma. Beee yãnzin ǹ mↄ́ wà lɛ́ kpakↄ̃sↄ̃zi. 8 Ben ma lɛ́kpãsã kɛ̀nɛ ma bè: Yã kɛ̀ nɛ́ɛ oo kuuro. Ḿbe n yã pì ò n zĩndaa. 9 Aↄ̃ píngi aↄ̃ↄ yezi vĩa ma kũmɛ, aↄ̃ↄe daa wa ↄↄ é gↄ̃ dↄwazimɛ, wé e wà zĩi pì mì dɛro. Ma Luda, ǹ ma ↄↄ gba gbãaa.

10 Ma gaa Delaya nɛ́ Semaya, Mɛtabɛli dio bɛ, zaakɛ à a zĩnda yì a kpɛ́n. À bè: Wà kpakↄ̃a Luda kpɛ́n wà à gbà tatawalɛ, zaakɛ gbɛ̃nↄↄ e mↄↄ n dɛmɛ. Aↄ̃é mↄ́ wà n dɛ gwãavĩmɛ. 11 Ben ma bè: Ma taka è bàa síↄ́? Ma taka é fↄ̃ à gá utɛ Luda kpɛ́n ma zĩnda mìsina yãnziↄ́? Mɛ́ gáro. 12 Má dↄ̃ ma zĩndaa à yã pì e bↄ Luda kiiaro. À annabikɛyã pì ò ma yã musu kɛ̀ Tobia kↄ̃n Sambalao fĩa bònɛ yãnzimɛ. 13 À fĩa bònɛ lɛ vĩa e à ma kũ mà durun kɛ mà gá gwe, aↄ̃é gbasa wà ma tↄ́ yaka wà ma sↄ̃sↄ̃. 14 Ma Luda, Tobia kↄ̃n Sambalao yãkɛna pì gↄ̃ dↄngu. Nↄgbɛ̃ annabi Nↄadia yã gↄ̃ dↄngu dↄ kↄ̃n annabi kpaaa kɛ̀ aↄ̃ↄ yezi vĩa ma kũnↄ.

Yerusalɛmu bĩi mìdɛna

15 Gurↄ baplaa akuri awɛɛplaaa gbɛra wà bĩi pì mì dɛ̀ Ɛlulu mↄ gurↄ baaasↄↄrodeea. 16 Kɛ̀ wa ibɛɛnↄ à baaru mà bensↄ̃ borii kɛ̀ aↄ̃ↄ liganawaziinↄ wɛ́ɛ sìàlɛ, aↄ̃ kã gà aↄ̃ dↄ̃̀ sa kɛ̀ wa zĩi pì kɛ̀ kↄ̃n wa Luda gbãaao. 17 Gurↄ beeean Yudanↄ kínɛnↄↄ e takada kpãsãa Tobianɛ pari, bensↄ̃ Tobia pì e kpãsãańnɛ. 18 Yudanↄ yã yìo pari, zaakɛ Ara nɛ́ Sɛkanian à anzure ũ bensↄ̃ Bɛrɛkia nɛ́ Mɛsulamu bé Tobia nɛ́ Yoanana anzure ũ. 19 Aↄ̃è à sáabu kpá ma wáa dↄ, ben aↄ̃è ɛara wà ma yã tↄ̃kɛ̃nɛ. Tobia pì lánↄ kpã̀sãmɛ dↄ lɛ vĩa e à ma kũ.