Luda yã takada kↄ̃n Bokobaru yão NARONA 14

Isarailinↄ bↄna Dii kpɛɛ

1 Isarailinↄↄ e wii gbãaa pɛɛ ń píngi, aↄ̃ↄe ↄ́ↄ dↄↄ gwãavĩ beeea. 2 Aↄ̃ zↄka dↄ̀ Musaa kↄ̃n Arunao ń píngi wà bèńnɛ: Tó wa gaga Igipiti kesↄ̃ gbáan kɛ̀, lɛ à kɛ̀ maa. 3 Bↄ́yãnzin Dii e taawao bùsu pìnzi? Weé wa dɛdɛ kↄ̃n fɛ̃ɛdaaomɛ, weé wa nↄgbɛ̃nↄ kↄ̃n wa nɛ́nↄ kũkũ. Wa sↄkpana Igipiti sã̀ↄroo? 4 Ben aↄ̃ bèkↄ̃nɛ: Wà dↄn'aɛdee diɛ wà ɛara wà tá Igipiti.

5 Musa kↄ̃n Arunao dàɛ ń puua gbɛ̃ píngi aɛ. 6 Ben gu'asiigwarinↄ gↄ̃ↄn plaa Nuni nɛ́ Yↄsua kↄ̃n Yefunɛ nɛ́ Kalɛbuo ń utanↄ gàga wà kɛ̃̀kɛ̃ 7 aↄ̃ bè gbɛ̃nↄnɛ: Bùsu kɛ̀ wa bↄɛn wá yakɛ̀ pì maa maamaa. 8 Tó wa yã kà Diinɛ, eé gáwao bùsu pìn, bùsu kɛ̀ zwi kↄ̃n zↄ́'io din pì, à wa gba. 9 Àton bↄ Dii kpɛɛro. Àton vĩa kɛ bùsu pì deenↄnɛro, zaakɛ wa blɛɛnↄmɛ, aↄ̃ↄ utɛkii vĩ dↄro. Dii kúwao, àton vĩa kɛro.

10 Baade píngi e bee wà ń pápa kↄ̃n gbɛ̀o, ben Dii gakui bↄ̀ à mↄ̀ Isarailinↄzi dakↄ̃rɛki kuta kiia. 11 Dii bè Musanɛ: Gbɛ̃ pìnↄ égↄ̃ kya kaamagu gurↄ píngin yↄ́? Baa kↄ̃n dabuyã parii kɛ̀ má kɛ̀ ń tɛ́nↄ, aↄ̃égↄ̃ gii ma náanɛ kɛzi gurↄ píngin yↄ́? 12 Mɛ́ gagyã kpánzi mà ń kaatɛ, mɛ́ n boriinↄ kɛ pari, aↄ̃ gbãaa égↄ̃ dɛ gbɛ̃ pìnↄla. 13 Ben Musa bè Diinɛ: Ḿbe n gbɛ̃ pìnↄ bↄ̀ɛ Igipiti kↄ̃n n gbãaao. Tó Igipitinↄↄ mà, 14 aↄ̃é gí o bùsu kɛ̀ deenↄnɛziro. Zaakɛ aↄ̃ↄ dↄ̃ kɛ̀ ń kúwao, nɛɛ̀ bↄ ǹ mↄ́wazi tɛ̃tɛ̃ntɛ̃. Aↄ̃ↄ dↄ̃ kɛ̀ n tɛ́luguu ègↄ̃ kú wa musu, nɛɛ̀ dↄwe aɛ à guu fãantɛ̃, gwãavĩ sↄ̃ tɛ́ guu. 15 Tó n gbɛ̃ pìnↄ dɛ̀ kãndo gↄ̃ↄ, borii kɛ̀ aↄ̃ yã pì mànↄ é be: 16 Dii fùa à gá kↄ̃n gbɛ̃ pìnↄ bùsu kɛ̀ à la dàńnɛn, beee yãnzin à ń dɛ́dɛ gbáanzi. 17 Dii, ǹ n gbãa bíta ↄdↄańnɛ sa, lán ń ò nà n bè 18 n pↄↄ è fɛ̃ kpaaro, ń gbɛ̃kɛɛ vĩ bíta, nɛɛ̀ gbɛ̃nↄ yã zaaanↄ kↄ̃n ń taarinↄ kɛ̃ńnɛ, mↄde nɛɛ̀ tó taaridee bↄ̀ pãro. Nɛɛ̀ denↄ yã zaaanↄ wí ń boriinↄ musu ai à gá à pɛ́ ń swãkpɛɛnↄa kↄ̃n ń nasionↄ. 19 Lán n sùu kɛ̀ kↄ̃n gbɛ̃ pìnↄo nà zaa Igipiti ai aↄ̃ gàa wà kào kɛ̀, ǹ ń durun kɛ̃ńnɛ n gbɛ̃kɛ bíta guu.

Zↄkakarinↄ wɛ́ɛtãmmana

20 Ben Dii bè: Lán n wɛ́ɛ kɛ̀ma nà, mɛ́ sùu kɛńyo. 21 Mↄde lán mɛɛ̀gↄ̃ kuu nà bensↄ̃ ma gakui dà andunala píngi, 22 gbɛ̃ kɛ̀ aↄ̃ ma gakui è kↄ̃n dabuyã kɛ̀ má kɛ̀ Igipiti kↄ̃n gbáa guuo kɛ̀ aↄ̃ ma lɛ wà ma gwa gɛ̃̀n kuri aↄ̃ gì ma yã mazinↄ, 23 ń gbɛ̃ke é wɛ́ɛ si bùsu kɛ̀ ma la dà ń dezinↄnɛ pìlɛro. Gbɛ̃ kɛ̀ aↄ̃ kya kàmaguunↄ ke é wɛ́ɛ siàlɛro. 24 Lán ma zↄ̀bleri Kalɛbu nↄ̀sɛ bↄ̀ ado nà, à tɛ́mazi kↄ̃n nↄ̀sɛo do, mɛ́ tó à gɛ̃ bùsu kɛ̀ à gàan pì guu, à boriinↄ é e túbi ũ. 25 Zaakɛ Amalɛkinↄ kↄ̃n Kanaanↄↄ kú guzurɛn gwe, à ɛara à da gbáa zɛ́n zia Isia Tɛ̃aa kpa.

26 Dii bè Musanɛ kↄ̃n Arunao: 27 Gbɛ̃ zaaa kɛ̀nↄ é zↄka kámazi gurↄ píngin yↄ́? Ma zↄka kɛ̀ aↄ̃ↄe kaamazii mà. 28 Ǹ beńnɛ mamↄma Dii ma bè má kuu. Lán aↄ̃ wɛ́ɛ kɛ̀ma nà, lɛn mɛ́ kɛńnɛ lɛ. 29 Aↄ̃ gɛ̀nↄ é gↄ̃ kaɛna gbáan kɛ̀, aↄ̃ gbɛ̃ kɛ̀ aↄ̃ kà wɛ̃̀ baro ke dɛàlaanↄ píngi. Aↄ̃ gbɛ̃ kɛ̀ wà ń náro bensↄ̃ aↄ̃ zↄka kàmaziinↄ 30 é gɛ̃ bùsu kɛ̀ ma à lɛ́ gbɛ̃̀ńnɛnlo, séde Yefunɛ nɛ́ Kalɛbu kↄ̃n Nuni nɛ́ Yↄsuao baasiro. 31 Aↄ̃ nɛ́ kɛ̀ aↄ̃ bè weé ń kũkũnↄn mɛ́ gɛ̃ńyo, lɛ aↄ̃ bùsu kɛ̀ ń denↄ gìzi pì nnaa ma. 32 Aↄ̃pinↄ sↄ̃, aↄ̃ gɛ̀nↄ é gↄ̃ kaɛna gbáan kɛ̀mɛ. 33 Aↄ̃ nɛ́nↄ é pↄ́nↄ dãdã gbáan kɛ̀ ai wɛ̃̀ baplaa, aↄ̃ ń denↄ náanɛ sai gbɛ̀ e. Aↄ̃ denↄ gɛ̀nↄ é gↄ̃ gbáan kɛ̀ ń píngi. 34 Lán wà bùsu pì yakɛ̀ gurↄ baplaa nà, lɛn aↄ̃égↄ̃ ń yã zaaa gbɛ̀ e lɛ ai wɛ̃̀ baplaa, wɛ̃̀ doodo gurↄ doodo, aↄ̃égↄ̃ dↄ̃ lán íbɛtɛkpanamao dɛ nà. 35 Mamↄma Dii mámbe ma yã pì ò, lɛmɛ sↄ̃ mɛ́ kɛ gbɛ̃ zaaa kɛ̀ aↄ̃ kàkↄ̃amazii pìnↄnɛ lɛ. Aↄ̃é gaga gbáan kɛ̀ ń píngi.

36 Gbɛ̃ kɛ̀ Musa ń zĩ aↄ̃ bùsu yakɛ̀ kɛ̀ aↄ̃ sù aↄ̃ kya kà bùsu pìn aↄ̃ↄ tò wà zↄka dↄ̀anↄ, 37 Dii gagyãa kà gbɛ̃ pìnↄn, ben aↄ̃ gàga. 38 Gbɛ̃ kɛ̀ aↄ̃ gàa wà bùsu yakɛ̀ pìnↄ tɛ́, Nuni nɛ́ Yↄsua kↄ̃n Yefunɛ nɛ́ Kalɛbuo bé wà gↄ̃̀ wɛ̃̀ndio.

39 Musa yã pìnↄ tↄ̃kɛ̃̀ Isarailinↄnɛ píngi, ben aↄ̃ ↄ́ↄ dↄ̀ maamaa. 40 Aↄ̃ fɛ̀ɛ kↄngↄ idɛ'idɛ, aↄ̃ mì pɛ̀ kpiiinↄa aↄ̃ bè: À gwa, wée gaa guu kɛ̀ Dii òn. Wa wa durun dↄ̃̀ sa. 41 Musa bè: Bↄ́yãnzi ée pãa Dii yãnɛzi? Beee é sí kɛro. 42 Àton gáro, zaakɛ Dii kúaoro. A ibɛɛnↄ é zĩ̀ bleawa. 43 Amalɛkinↄ kↄ̃n Kanaanↄↄ kú a aɛ gwe. Aↄ̃é a dɛdɛ kↄ̃n fɛ̃ɛdaao. Dii égↄ̃ kúaoro, kɛ̀ a gi tɛ́zizi yãnzi. 44 Ben aↄ̃ wada yã kɛ̀ aↄ̃ mì pɛ̀ kpiiinↄa, baa kɛ̀ Dii bà kuunańyo àkpati gↄ̃̀ bùran kↄ̃n Musao. 45 Ben Amalɛkinↄ kↄ̃n Kanaa kɛ̀ aↄ̃ↄ kú gusĩsĩdee pìnnↄ lɛ̀ɛḿma aↄ̃ zĩ̀ blèḿma wà pɛ̀ḿma ai Ɔↄma.