13
1 Nɛ́ ↄ̃ndↄ̃dee è a de lɛ́damma ma,
fabori è gí kpãkɛ̃nazi.
2 Lɛ́gbɛ nnaa è gbɛ̃ ká pↄ́ maaaa,
náanɛsaidee è ble a pãsĩ guumɛ.
3 Gbɛ̃ kɛ̀ è a lɛ́ kũ è a wɛ̃̀ndi dãkpa,
gbɛ̃ kɛ̀ à lɛ́ è kúroo è a zĩnda yaka.
4 Mɛadee è pↄ́ kɛ̀ à yezi ero,
aĩade sↄ̃ è nnaa ma.
5 Gbɛ̃ maaa zà mↄnafikiyãn,
gbɛ̃ zaaa è wí daḿma è ń kpɛ bↄ.
6 Maakɛna è zɛ́maasɛri mì sí,
zaakɛna è durunkɛri liɛ a kpɛɛgãnda.
7 Gbɛ̃kenↄ è ń zĩnda diɛ auzikidee ũ,
mↄde aↄ̃ègↄ̃ pↄ́ke vĩro.
Gbɛ̃kenↄ è ń zĩnda diɛ takaasidee ũ,
mↄde aↄ̃ègↄ̃ pↄ́ vĩ bíta.
8 Auzikidee è a zĩnda bↄ kↄ̃n a auzikikɛɛo,
takaasidee sↄ̃ è vĩadaanzina ero.
9 Gbɛ̃ maaanↄ gupuraa ègↄ̃ puna,
gbɛ̃ zaaanↄ fitia è gaḿma.
10 Zĩndasɛna lezĩ è swèe da,
lɛ́dammamana è tó wà ↄ̃ndↄ̃ kũ.
11 Ɔↄ zaaa è gá aɛro,
ↄↄ kɛ̀ wà è ísimma guu sↄ̃ è kↄ̃.
12 Tãmaa gìkɛna è ń nↄ̀sɛ yaka,
pↄ́ kɛ̀ wà yezi ena è mↄ́ wɛ̃̀ndi dufuo.
13 Gbɛ̃ kɛ̀ è yã daroo é yã e,
gbɛ̃ kɛ̀ è yã ma é àre e.
14 Ɔ̃ndↄ̃dee yãdannɛnan íbↄki wɛ̃̀ndidee ũ,
è ń bↄ ga bàn.
15 Wɛ́ɛzɛ̃ maaa è tó gbɛ̃ dakↄ̃rɛ gòmio,
mↄde náanɛsaideenↄ zɛ́ ègↄ̃ pãsĩ.
16 Làakarideenↄ è yã kɛ kↄ̃n dↄ̃nao,
yↄ̃nkↄↄ è a faasaikɛɛ ↄdↄańnɛ.
17 Zĩ̀ri zaaa è gɛ̃ yãn,
ìba náanɛdee è su aafia.
18 Gina totonazi è mↄ́ takaasio kↄ̃n wíyão,
lɛ́dammamana è bɛ̀ɛ líńnɛ.
19 Pↄ́nidɛna ena è ń pↄↄ kɛ nna,
mↄde yↄ̃nkↄↄ ye kɛ̃na yã zaaaaziro.
20 Gbɛ̃ kɛ̀ tɛ́ ↄ̃ndↄ̃rinↄzi è ↄ̃ndↄ̃ kũ,
gbɛ̃ kɛ̀ kakↄ̃ana kↄ̃n yↄ̃nkↄↄnↄ è yã e.
21 Mↄ́nzi ègↄ̃ tɛ́ durunkɛrinↄzi,
nnamanan gbɛ̃ maaanↄ àre ũ.
22 Gbɛ̃ maaa è túbi tó a dionↄnɛ,
durunkɛri sↄ̃ auziki é gↄ̃ gbɛ̃ maaanɛ.
23 Takaaside bura è pↄ́blee kɛ maamaa,
mↄde yãkɛna lɛkpɛɛ è tó à korazi.
24 Gbɛ̃ kɛ̀ è a nɛ́ gbɛ̃roo zàn,
gbɛ̃ kɛ̀ ye a nɛ́zi è à toto káaku.
25 Gbɛ̃ maaa è pↄ́ ble à kã,
gbɛ̃ zaaanↄ nↄ̀sɛ ègↄ̃ da kori.