Luda yã takada kↄ̃n Bokobaru yão ROMUDEENƆ 3

1 Kaarana kpareen Yudakɛɛ vĩi? Àre kpareen bã̀ngukɛna vĩi? 2 À kaarana vĩ bíta yã píngi guu. Káaku gĩa Luda a yã nàńnɛ ń ↄzĩmɛ. 3 Kɛ̀ aↄ̃ gbɛ̃kenↄ náanɛ vĩro, bↄ́n beee vĩi? Aↄ̃ kuuna náanɛ sai é Luda náanɛ gboroↄ́? 4 Auo! Lɛnlo! À tó Luda gↄ̃ yãpuraa vĩ, baa kɛ̀ gbɛ̃ píngi nɛ́ ɛgɛdeemɛ, lán wà kɛ̃̀ Luda yãn nà wà bè:

Tó n yã ò, n yã égↄ̃ zɛ́ vĩ,

tó n yãkpaɛ kɛ̀ńyo, n yã é ble.

5 Tó wa zaakɛɛ è Luda maakɛɛ bↄ gupuraaa, bↄ́ yãn wé oo? Wé be Ludaa maaro kɛ̀ è pↄfɛ̃ pitawa yãnzin yↄ́? Mɛ́ɛ oo lán gbɛ̃ntee ona bàmɛ. 6 Auo! Lɛnlo! Tó Luda yãzɛ vĩro, à kɛ̀ dia eé fↄ̃ à yãkpaɛ kɛ kↄ̃n andunao? 7 Gbɛ̃ke é be, tó a ɛgɛdekɛɛ e Luda náanɛ kaara bensↄ̃ èe à tↄ́ bↄↄ, bↄ́yãnzin eé yã daala lán durunkɛri bàzi? 8 Tó ń ò lɛ nɛ́ɛ bee wà yã zaaa kɛ, yã maaa é bↄn. Gbɛ̃kenↄ ma tↄ́ zaaa sì wà bè lɛn mɛɛ̀ o lɛ. Luda yãdanlana kↄ̃ sìńyo.

Gbɛ̃kee maaro

9 Tↄ̀! Wa Yudanↄ wá sã̀ↄn yↄ́? Lɛnlo fá! Zaakɛ ma Yudanↄ kↄ̃n bori pãndenↄ bↄ̀bↄ ń dàn ń píngi kↄ̀, aↄ̃ píngi nɛ́ durun zↄ̀nↄmɛ. 10 Wà kɛ̃̀ Luda yãn wà bè:

Gbɛ̃kee maaro, baa mɛ̀n do.

11 Làakaride kee kuuro, Luda kii wɛtɛri kee kuuro.

12 Aↄ̃ sã̀sã ń píngi aↄ̃ gↄ̃̀ dↄ̀rↄ sai,

yãmaakɛri kee kuuro, baa mɛ̀n do.

13 Aↄ̃ kòto dɛ lán mira wɛ̃na bàmɛ,

aↄ̃è lɛ́nnaa kásańnɛ,

aↄ̃ lɛ́gbɛ nɛ́ pitigoo sɛwɛɛmɛ,

14 yã ĩi kↄ̃n gbɛ̃kanao ń lɛ́ pà.

15 Aↄ̃ↄ wãa kↄ̃n gbɛ̃dɛnao,

16 aↄ̃è kisia kↄ̃n pↄsiaao kpáńzi,

17 aↄ̃ↄ aafia zɛ́ dↄ̃ro,

18 aↄ̃ wɛ́ɛ ègↄ̃ Luda wí vĩro.

19 Wá dↄ̃ kɛ̀ Luda doka píngi dɛ gbɛ̃ kɛ̀ aↄ̃ↄ na doka pì ↄzĩnↄ pↄ́ ũmɛ, lɛ gbɛ̃ píngi lɛ́ gↄ̃ nakↄ̃ana, anduna gbɛ̃ píngi gↄ̃ taaridee ũ Luda kiia. 20 Zaakɛ gbɛ̃ke é bↄ maa Luda kiia doka pì kũna yãnziro. Luda doka bé è tó wà durun dↄ̃.

Dian Luda è tó yã bↄńyo nna nà

21 Dian Luda è tó yã bↄńyo nna nà bↄ̀ gupuraaa sa, lán à yã kɛ̃na Musa doka kↄ̃n annabinↄ takadanↄ guu nà. Èe kɛ à doka kũna yãnlo. 22 Luda è tó yã bↄńyo nna Yesu Kirisi náanɛkɛna yãnzimɛ. Gbɛ̃ kɛ̀ èe à náanɛ kɛɛ píngi pↄ́mɛ. Gbɛ̃kee bↄna adoro, 23 zaakɛ baade píngi durun kɛ̀, aↄ̃ kɛ̃̀sã Luda gakuizi. 24 Luda è tó yã bↄńyo nna gbaa ũ a gbɛ̃kɛ yãnzi Kirisi Yesu kɛ̀ à ń bó gãzĩ. 25 Àpin Ludaa kpà durun agbaakpabↄ ũ gbɛ̃ kɛ̀ aↄ̃ↄe à aru náanɛ kɛɛnↄnɛ, lɛ à ↄdↄa baade pínginɛ kɛ̀ eè yã kɛ a zɛ́amɛ. À mɛna yã, èe durun ziinↄ yã daro, 26 ben à ↄ̀dↄańnɛ tia kɛ̀ eè yã kɛ a zɛ́a. Dian Luda è yã kɛ a zɛ́a nàn gwe, bensↄ̃ è tó yã bↄ kↄ̃n Yesu náanɛkɛrinↄo nna.

27 Gbɛ̃nteenↄ é fↄ̃ wà ĩa dã dↄↄ́? Beee é sí kɛro. Bↄ́yãnzii? Zaakɛ à dɛ zĩkɛna dokaa yã ũro, ludanaanɛkɛna yãmɛ. 28 Zaakɛ má è yã è bↄ gbɛ̃o nna Yesu náanɛkɛna yãnzimɛ, zĩkɛna dokaa baasi. 29 Luda nɛ́ Yudanↄ Ludamɛ ńtɛ̃ɛↄ́? Bori pãndenↄ Ludan seroo? Eè, bori pãndenↄ Ludamɛ dↄ. 30 Zaakɛ Luda mɛ̀n domɛ. Eé tó yã bↄ kↄ̃n gbɛ̃ kɛ̀ bã̀ngu kɛ̀o nna a náanɛ kɛ̀ èe kɛɛ yãnzimɛ, bensↄ̃ eé tó yã bↄ kↄ̃n gɛfↄↄdeeo nna a náanɛ dↄ̃nkↄ̃ pì musu. 31 Wée doka daa pↄ́ke ũro ludanaanɛkɛna yãnzin yↄ́? Lɛnlo, wée gbãaa kpaaamɛ.