Luda yã takada kↄ̃n Bokobaru yão ZIA YÃ 9

1 Malaika sↄↄrodee a kãkãki pɛ̀, ben ma sↄsↄnɛ è à bↄ̀ ludambɛ à lɛ̀ɛ tↄↄtɛ. Ben wà gɛ̀wãa wɛ̀ɛ zòoto mↄ̀nɛ kpàa, 2 ben sↄsↄnɛ pì Gɛ̀wãa wɛ̀ɛ zòoto pì zɛ́ wɛ̃̀. Tɛ́sukpɛ bↄ̀n lán mↄ̀datɛ bíta tɛ́sukpɛ bà, ben gɛ̀wãa wɛ̀ɛ pì tɛ́sukpɛ ↄfãntɛ̃ sia kũ̀, guu kɛ̀ sí níginigi. 3 Sutɛ̃nↄ bↄ̀ɛ tɛ́sukpɛ pì guu aↄ̃ dà tↄↄtɛla. Wà ń gbá gbãaa lán anduna swínↄ gbãaa bà. 4 Wà bèńnɛ aↄ̃ton ĩa da sɛ̃̀aro ke lá ke lí ke, séde gbɛ̃ kɛ̀ aↄ̃ↄ Luda sèeda vĩ ń mì'aɛaroonↄ. 5 Wèe ń gba zɛ́ aↄ̃ gbɛ̃nↄ dɛdɛro, mↄde aↄ̃é wãwã kpáńzi ai mↄ sↄↄromɛ. Aↄ̃ wãwãa dɛ lán swí gbɛ̃pana wãwãa bàmɛ. 6 Gurↄ beeenↄa gbɛ̃nↄ é gaa wɛtɛ, aↄ̃é ero. Ga nii é ń dɛ, mↄde gaa é bàa lɛ́ńnɛ.

7 Sutɛ̃ pìnↄↄ dɛ lán sↄ̃ kɛ̀ ń sorumi mà kↄ̃n zĩ̀onↄ bà. Aↄ̃ pↄ́ke kukuna lán vura fùra bà, aↄ̃ uu dɛ lán gbɛ̃ntee uu bà. 8 Aↄ̃ↄ mìkã vĩ gbã̀agbãa lán nↄgbɛ̃ mìkã bà, aↄ̃ↄ swaanↄↄ vĩ lán músu swaa bà. 9 Aↄ̃ kùsɛ dɛ lándↄ̃ aↄ̃ↄ mↄ̀ uta dadana bà, aↄ̃ dɛ̀bɛ kĩi dↄ lán góro parii kɛ̀ sↄ̃nↄↄ e gáɛɛ zĩ̀ guu kĩi bà. 10 Aↄ̃ vlãa vĩ kↄ̃n kào lán swí pↄ́ bà. Aↄ̃ gbãaa kú ń vlãa pìnↄa, lɛ aↄ̃ ĩa dao gbɛ̃nↄa ai mↄ sↄↄro. 11 Gɛ̀wãa wɛ̀ɛ zòoto malaika pìn ń kína ũ. Kↄ̃n Eberu yão à tↄ́n Abadↄ̃. Kↄ̃n Giriki yão sↄ̃ Apↄliↄ̃. 12 Wãiyoo káakupↄ gɛ̃̀tɛ, mɛ̀n plaaanↄↄ e mↄↄ à kpɛɛ dↄ.

13 Malaika swɛɛdodee a kãkãki pɛ̀. Ma kòto mà à bↄ̀ Luda aɛ tuaetitikpatakii kɛ̀ wà pì kↄ̃n vurao koba siigↄ̃ↄnↄ kpa. 14 À bè malaika swɛɛdodee kɛ̀ kãkãki kũnanɛ: Ǹ malaika gↄ̃ↄn siigↄ̃ↄ kɛ̀ aↄ̃ↄ yiyina swadaa kɛ̀ wè be Yuflati saɛnↄ poro. 15 Ben à malaika gↄ̃ↄn siigↄ̃ↄ kɛ̀ wà ń soru kɛ̀ wɛ̃̀ beeea mↄ beeea gurↄ beeea gurↄ zaka beee yãnzinↄ pòro, lɛ aↄ̃ gbɛ̃nteenↄ lɛo aagↄ̃dee dɛdɛ yãnzi. 16 Wà soza sↄ̃deenↄ pari lɛ́ òmɛ, aↄ̃ↄ gↄ̃ↄn miliↄ̃ wàa domɛ. 17 Wɛ́ɛgupu'ena pì guu lán ma sↄ̃ pìnↄ kↄ̃n ń dìrinↄ è nàn yɛ̀: Aↄ̃ↄ mↄ̀ utanↄ dadana tɛ̃ɛ lán tɛ́ bà, búgu lán bulu bà, kpà'ikpa'i lán ↄfãntɛ̃gbↄ̃ bà. Sↄ̃ pìnↄ mì dɛ lán músu mì bà. Tɛ́ kↄ̃n tɛ́sukpɛo kↄ̃n ↄfãntɛ̃gbↄ̃o e bↄↄ ń lɛ́n. 18 Kisia mɛ̀n aagↄ̃ↄ kɛ̀nↄ, tɛ́ kↄ̃n tɛ́sukpɛo kↄ̃n ↄfãntɛ̃gbↄ̃ kɛ̀ èe bↄↄ ń lɛ́ guuo bé à gbɛ̃nteenↄ lɛo aagↄ̃dee dɛ̀dɛ. 19 Zaakɛ sↄ̃ pìnↄ gbãaa kú ń lɛ́ guu kↄ̃n ń vlãao dↄ. Aↄ̃ vlãa dɛ lán mlɛ̃̀ bà, aↄ̃ↄ mì vĩ kɛ̀ aↄ̃è ĩa dao gbɛ̃nↄa.

20 Gbɛ̃ kpaaa kɛ̀ aↄ̃ↄe gaga kisia pìnↄ musuroonↄ e nↄ̀sɛ liɛ wà pↄ́ kɛ̀ aↄ̃ↄ kɛ̀ yãa tòro. Aↄ̃ↄ kpɛ́ wèe kuɛɛ tãanↄnɛ kↄ̃n pↄ́ kɛ̀ aↄ̃ↄ kɛ̀ kↄ̃n vurao kↄ̃n kondogio kↄ̃n mↄ̀gotɛ̃o kↄ̃n gbɛ̀o kↄ̃n lío. Pↄ́ pìnↄ è guu ero, aↄ̃è yã maro, aↄ̃è táa o sↄ̃ro. 21 Aↄ̃ↄe nↄ̀sɛ liɛ wà ń gbɛ̃dɛna tòro ke aↄ̃ pↄ́dammana ke aↄ̃ pãpãkɛna ke aↄ̃ kpãi'ona.