20
Ebelaamo ada Abimaleki.
1 E aku aimo Ebelaamo fafali Mameli gisegena aku ginau wabolimaneya, tainei Negevi anafafali wagaine ke maita gimiya Gela wagaine, tainei Kedesi ada Suli nefanidiya.
2 Wadedeku kwanaawawala Ebelaamo givefwayafwaya kaliva wagaidiya vaita vavinena Sela ani bana novuna. Ada tova-nai Abimaleki banae Gela anakini gikaiyanogala vaita Sela Ebelaamo novuna, ada yana togugaiyavo giimilidi ina vavine-nai ivagaule ialiyena yana manuweya. Aku Yaubada ani Abimaleki yana manuwa anatomiyanavo vevine matatabu-moedi giluvekakalidi, Ebelaamo vavinena faine.
3 Ada seyana bogi Yaubada giyegemona Abimaleki wagaine avaiseya ada givonena, “Unaitana, oye ani alialika, faina tainei vavine-nai uvaina bana naginagina.”
4 Aku Abimaleki keke Sela gida enolabilabine. E ada givona, “Kauveya, iyayeku ke yaku kalivayavo nodi totunutunugina ada gavaiyamu, una luveyawaliyema?
5 Ebelaamo tauna nagona givefwayafwaya givona, ‘Taidei vavine-nai ida iya novuku,’ ada Sela kaduwe gimuliyena givona, ‘Wada iya novuku.’ Iya yaku nuwanuwa iwakana ada nimaku yegayegadi.”
6 Ada avaita-nai wagaine Yaubada givonena, “Ika, gaalamanena taidei gaitoma-nai ugugaiyena waya nuwanuwa iwakana wagaine, e ada gababalini keke tamo koyona udagai matakuya. Tayuwe vuvuna-nai faine keke gada awaegeni vovona uda kiluvaluva.
7 E aku auwe una imiliyewena kaliva-nai vavinena, faina banae falofita, ke aimo gina veoveola fainiya ada keke unaalika. Aku kai keke unaimili ginayewa, ina velemoena oyeni ke kaliva matatabuna nodi wamiyamiya ani wanaalika.”
8 E ada mala gilavuna malabutuya-mwaeya Abimaleki yana togugai matatabuna gidouwevagauwidi ada giifufuyedi gavana giyegemona bogi anaavaita wagaine. Ada tova-nai inogalina, au imatauta lakaina.
9 Ada Abimileki gidouwe Ebelaamo gielai ke givonena, “Uitana, gavana faina taidei anafaiweya koyona lakaina ualiyena wagaikuya? Gava koyona gagai wagainiya ayo taidei anafaiweya koyona lakaina ualiyena wagaikuya ada kaduwe yaku kalivayavo wagaidiya? Taidei gaitoma-dina ugugaiyedi wagaikuya ani keke kaliva adilauboda ina gugaiyedi.”
10 Ada kaduwe Abimaleki gitolidadane-vagilena givona, “Gavana ya vuvu ayo taidei anafaiweya udewa?”
11 Ada Ebelaamo gilufata, “Faina gavona vaita velemoena imi idedeku wamiyami ani keke Yaubada anatovemoimoina, ada vavineku faine vaita iya aimo wada luvealikaku.
12 Aku wada kaduwe velemoena novuku, faina tamama seyana aku inameyavo tulina tulina aku ganagina.
13 Ada tova-nai Yaubada givoneku vaita yaku fafali gana segena, tayuwe wagaine Sela gavonena, 'Taidei wagaine ya nuwakabubu una vewala wagaikuya: Fafali seyana seyana wagaidiya kanaunau aga kaliva una vonevonedi, ‘Ida iya novuku.’ ”
14 Ada Ebelaamo yana ifufu giluyabuna muline, au Abimaleki gialiyedi sifi, bulumakau ada togugaiyavo kaliva ke vevine ada givelena Ebelaamo. Kaduwe vavinena Sela giveyewana wagaine.
15 E ada Abimaleki givona, “Uitana, yaku babi taidei matatabuna ada gadedeku ya nuwanuwa analauboda, wagaine unamiya.”
16 Aku Sela wagaine givona, “Uitana! O fainiya ada novu Ebelaamo gavelevelena tausani siliva. Taidei wagaine kaliva matatabuna badi gavega nodi wamiyamiya ani wagaidiya gina vetunuga, ada ina vetumaganeni velemoena keke koyona udabubu.”
17 Ada Ebelaamo giveola Yaubada wagaine ke Yaubada Abimaleki gikiveiwakanena, vavinena ada kaduwe yana togugaiyavo vevine ke meyameyaganina ina venatuna-vagila.
18 Faina Yaubada ani Abimaleki yana togugaiyavo vevine matatabu-moedi giluvekakalidi, Ebelaamo vavinena faine.