3
Koyona anaebavevuvu.
1 E, kevakeva walawalaa matatabuna bademowa Yaubada gibubudi ani wagaidiya mota nuwauya koyona anatoikavuya lakaina ke matatabudi gisegedi. Seyana tova gimididi gielai vavine wagaine ada givonena, “Eei! Velemoena Yaubada givona evona keke amiselu wanakani ai guwaguwa matatabuna bakula taidei wagaine?”
2 Ada vavine gilufata, givona, “Yaubada keke taidei anafaiweya gidavona. Giawaegema ai guwaguwa matatabuna bakula wagaine anakani,
3 aku givonema givona, ‘Keke ai guwana wanakani tainei ai-nai wagaine gimidimididi bakula nefanine.’ Ada kaduwe givona, ‘Keke ai-nai guwana wanakani ada keke maita wana kiluvaluva aenanai wanaalika.’ ”
4 Aku mota givona vavine wagaine, “Keke velemoena wanaalika!
5 Yaubada anafaiweya givona faina gialamanena velemoena kai tainei ai-nai guwana wana kanina aga nuwami gina malina ada iwakana ke koyona wana alamanena anafaiweya Yaubada.”
6 Ada vavine ai-nai guwana giitadi adiita iwaka-vagaidi kaduwe iwakana kani faina ada vaita yana nuwanuwa gina gai gina malina. Taidei faina ai-nai guwana tufona gikoludi gikani kaduwe tufona moganena givele gikanina, tauna nodi imiyamiya.
7 Ada ikanina au adiselu nuwadi gimalina ke ialamanena vaita konekonediyavo. Tainei faina alaa lukuna ikidakadi ietovefosedi ke taudiyavo ina sebabalidi faina.
8 E aku tayuwe lavilavi-nai wagaine Yaubada ginunudadana bakuleya. Ada agebutubutuna inogalina ani iota ina ai wagaidiya ivelusewavuyedi ada keke gina itadi.
9 Aku Yaubada givedou Adama wagaine, givona, “O gadedeku?”
10 Adama gilufata, givonaga, “Ganogalina agebutubutu ununudadana bakula wagaine, ada gamatauta faina iya wakonekoneku ada gavelusewavuyeku.”
11 Ada Yaubada kaliva givonena, “Gaito givoneni ke ualamane vaita o ukone? Gavaiyamu, ai-nai guwana gaawatani keke unakani, aku bademowa ukanina?”
12 Kaliva givonaga, “Vavine-nai uveleku iya nodi amiyamiya, ani banae ai-nai guwana tufona givai giveleku gakanina.”
13 Ada Yaubada givona vavine wagaine, “Gavana faina anafaiweya udewa?”
Ani vavine givonaga, “Mota gifwayaku wagaine gakanina.”
Yaubada yana matavuloga wagaidiya.
14 E ada Yaubada mota wagaine givona,
“Taidei matavuloga-dina aimo una ulouloloyedi,
faina vavine ufwayana.
Kevakeva matatabuna wagaidiya
o akaibe-mowa gaalatabutabuyeni.
Malinai una vevuvu kamoniya una enotaina
ada sivu gina lukuluku awaniya
yawai matatabuna wagaine.
15 Ada oye ke vavine nodi wana venibaina,
anafaiweya ya tubudelideli ada yana tubudelideli
aimo kaduwe ina vetalaguwala.
Kuluwa gina lufuwana, aku ageweduwedudi una yovana.”
16 Ada Yaubada vavine givonena, givona,
“Venatuna anaulolo gana kiveinalina,
e ada waya ulolo natumomo una venatunedi.
Aku mogane una nuwenuwena ada banae gina veimeyeni.”
17 Ada kaliva givonena, givona, “Vavine yana vona uvenogalena ada ai-nai guwana ukanina banae gavoneni keke unakani. Tayuwe wagaine o kadu matavuloga una nuwagana.
“Babi gaalatabutabuyena faina oyeni.
Yawai anatova matatabuna wagaine wa auloulolo
babi una faisewana ke unakani.
18 Gudana sikakakamidi ke lomata babiya ina tabo
fainiya ada babi yana veguwa wagaidiya unakani.
19 Wa aibala nodi una faisewa toyogina aa una nuwagana
analaba unaalika ada una yewani babi wagaine.
Faina babi wagaine gabubuni ada tova-nai unaalika,
kaduwe una vebabi-vagila.”
Taidei anafaiweya Yaubada givona kaliva, vavinena ada mota wagaidiya.
20 E ada kaliva anayegana Adama, aku vavinena givewagadi Ive, faina badi kaliva matatabuna wayawaidi inadi.
21 Tova tayuwe wagaine Yaubada nuya gibubuna kevakeva kwafilidi wagaine ada Adama ke vavinena nodi giveledi ke iosedi.
22 Ada Yaubada tauna givona, “Gaitana, kaliva bademowa ide anafaiweya. Ialamanena iwakana ke koyona anafaiweya ideyavo. Taidei faina keke kana awaege aenanai ginaela nimana ginatune Yawai ana Ai guwana kaduwe gina kikolu gina kanina, ada gina miya-vagata.”
23 Taidei faina Yaubada kaliva giimili giyegemona Bakula Ideni wagaine-deya ke babi gina bakulina, babi-nai wagaine Yaubada kaliva gibubuna.
24 Taidei anafaiweya Yaubada kaliva givenegana tayuwe fafali-nai wagaine, ada anelose toyavagayavo gisedi ke Bakula Ideni anaebaluku imidibodana kauwana ebalakavina wagaine. E ada keke seyana gaito gina nugulidi aku yawai anaai gina nuwaga. Kaduwe benisi giyabeyabela gisena ada giavivivilina e ada keke seyana gaito gina nuguli.