9
Yaubada ena Yali Nowa Lisina yai
Aba Fatubu 9:1-15
1 Yaubada ena loholoho Nowa ma afa nanatuna ya feledi. Ya libalau lisidi iyen,
Au talu fananatu be tanoꞌubu au famohafu.
2 Suisui, ataiꞌa, suisui kamokomodaladi yo hama haba sa miyamiya na sa ꞌwasaꞌwasabuwemiu. Haba gigibwali E felemiu be nimamiu yai ami ita watanidi.
3 Fuwafuwa yo ginauli mahudoꞌidi E felemiu te, au andi.
4 Na tabu fisiho ma ꞌwasiꞌwasinana au an, paꞌana mwahuli mate ꞌwasina yai.
5 ꞌWasinamiu haba E fatala doha ite: Yena suisui hesa doga ya wunui, suisui ni haba sa lau funuhi hinaga. Na yena doga hesa, doga ya wunui, haba ami lau funuhi paꞌana ꞌwasinana mate mwahuli pwalana.
6 Yaubada dodoga ya ginauli doha In.
be yena sai doga ya wunui,
dogana haba sa wunui hinaga.
7 Na umi, au talu fanafanatu yo au tadada be tanohi mahudoꞌina au famohafu.
8 Yaubada ya libalau Nowa ma afa nanatuna lisidi iyen,
9 Yau aho ite egu yali E ginauli lisimiu yai yo laulauwewemiu matamiu yai,
10 yo ginauli mwahumwahulidi mahudoꞌidi maidamiu waga yai ami kalamahano.
11 E ginauli lisimiu yai mate ginauli mwahumwahulidi mahudoꞌidi yo tanohi ibege utufi i faheyaya fuyoꞌidi.
12 Yau yo umi yo ginauli mwahumwahulidi mahudoꞌidi, maꞌemiu yali fafaꞌilalana te ginauli. Yali te hiti mahudoꞌina matamiu yai enehedi hinaga.
13 Yau haba ai yada ꞌwasinaꞌubo E tole, yali fafaꞌilalana, Yau yo tanohi lisimiu yai.
14 Yena yada tanohi sa fakou, na ꞌwasinaꞌubo ya taumahata,
15 haba egu yali E nuwanuwatuhui, Yau yo um lisida yai, yo ginauli mwahumwahulidi mahudoꞌidi hinaga lisidi yai. Ibege ginauli mwahumwahulidi mahudoꞌidi utufi i faheyaya fuyoꞌidi.