12
Gabu Tau Ita Watanina Heyaheyayadi Heyaheyasonna
Maleko 12:1-12
(Matiu 21:33-46; Luka 20:9-19)
1 Heyaheyason hesa Yesu ya falibadi, iyen,
Doga hesa wain gabuna ya umahi na ya ganai. Wain aba folona ya ginauli yo gati lumana hewana lofalofa ya faꞌobiyo. Muliyai dodoga haisa ya toledi be gabu sa ita watan na ya lau ya lauwasi.
2 Wain ena fuya anaho yai mate gabu tanuwagana ena tau lau fayofayo ya dui lawen lisidi na iyen,
U lau u falibadi be wain monina egu tefa ti felem, be u leyama.
3 Tau itaꞌita wata fayofayo dogana sa tohai be sa talai na sa dui fafuyo ma nima afaꞌafana.
4 Habahim gabu tanuwagana tau lau fayofayo hesa hinaga ya dui, na kuluna sa dem tili yo sa liba fafaheyaya.
5 Fafaihonana ya dui mate sa wunui. Tau lau fayofayo peidi hinaga ya duidi. In moho Laulauna gonogonowana, haisa sa pidilidi, na haisa sa wunuidi. (Delamaiya 7:26, Eimosi 3:7 Sekalaiya 1:6).
6 Ofiꞌofina, natuna ya fanuha wananahai ya dui na iyen,
Natugu haba sa faꞌatitiyen.
7 Gabu tau ita watanina ibodi sa libaliba tiyen,
Gabu tanuwagana natuna itete. In haba tamana ena tanohi ya abidi. Ta wunui! Ena tanohi haba te abi!
8 Yo fede natuna sa tohai be sa wunui, na silanna sa pei lawen gabu mulimulina yai.
9 Gabu tanuwagana haba somo ya ginauli? Haba ya laoma be ya wunuidi na dodoga haisa ya ledima be wain gabuna sa ita watan.
10 Uliꞌuli te haꞌa ami fatili. “Tau abi luma umeꞌehu sa ꞌwaiyoꞌoꞌen mate muli yai ya famala umeꞌehu otaꞌotafahina.
11 “Itete Guyau ya ginauli be itaꞌitana mate ya loholoho wananaha!” (Samsi 118:22-23)
12 Yo fede Diusi babaꞌisadi edaꞌeda sa yoꞌo bena Yesu sa au paꞌana heyaheyason ni, iti tautaudi. In moho dodoga baiwadi sa ꞌwasabuwedi be Yesu sa lau afulen.
Takesi Fafamaisana Fatiꞌona
Maleko 12:13-17
(Matiu 22:15-22; Luka 20:20-26)
13 Muli yai Heloda ena pele yo Falesiya mate dodoga sa duidi sa lau Yesu lisina be haba ena libaliba yai sa fasai buluhi.
14 Be tiyen,
Tanuwaga, ꞌe sibai mate um doga dudulaina. Dodoga lalaꞌi yo kikiꞌina edi nuwatuhu heyaheyayadi ibege u lau watandi, in moho Yaubada ena liba, dudulai yai wa lau faꞌataen. Be, haga u falibamai, takesi ꞌe famaisa Loma edi Sisa ai lisina ya dudulai e hige? Haba ꞌe tole e hafena?
15 In moho edi bwala Yesu haꞌa ya sibai be alinadi ya bui, iyebom,
Sidohana be ami fasai bulubuluhigu? Haga moni au leyama be ya ita.
16 Esega sa felen, na iyen,
Sai tautauna yo hesana moni yai te?
Alinana sa bui tiyen,
Sisa, Loma edi Kin.
17 Yo fede Yesu iyen,
Somo Kin Sisa ena, mate au felen. Na Yaubada ena, mate Yaubada au felen.
Yo fede edi noꞌo sa ofi!
Obiyo Fuyo Mulina, Hige Nahi Fuyo
Maleko 12:18-27
(Matiu 22:23-33; Luka 20:27-40)
18 Habahim Sadusi haisa (iti sa liba mate dodoga ibege ti obiyo fuyo) sa laoma Yesu lisina be tiyen,
19 Tanuwaga, Mose ya uli mate yena taumoho ma lahuna hige nanatudi na taumoho ya peꞌi, hidana hwabuna haba ya fai na ya fanatu mate sa famala tau peꞌi nanatuna. (Diutelonomi 25:5, Luta 2:20, Luta 4:4-8)
20 Doga hesa nanatuna tatau faligigi luwaga. Tau tuwaha ya nahi be hige nanatuna na ya peꞌi.
21 Fafaluwagana hwabu wa ya fai, be hige natuna na hinaga ya peꞌi. Fafaihonana hinaga hwabu ya fai be hige natuna.
22 Doha, na ya lau wee–, waihin wa, tatau faligigi luwaga ya fai ofinidi, mate hige natudi, na sa peꞌi. Ofiꞌofina mate waihin hinaga ya peꞌi.
23 Obiyo fuyo lahaina yai, waihinna ni haba sai lahuna? Paꞌana tataudi faligigi luwaga waihinina haꞌa sa fai.
24 Yesu alinadi ya bui iyen,
Ami lau pono paꞌana Buka Tabuna yo Yaubada ena gigibwali hige au sibai.
25 Tau peꞌipeꞌi sa obiyo fiyo, iti mate doha anelu galewa yai. Ibege ti nahi boda.
26 Obiyo fuyo libana Mose ena buka yai ami fatili e higeꞌe? Somo yai Yaubada ya libalau Mose lisina oyagi ala balebalelemna ganahewana yai, fuyanna iyen, “Abelaham, Isako yo Iyakobo edi Yaubada mate Yau.” (Auꞌaulaha 3:16; 1 Kin 19: 1-18)
27 Ami lau pono wananaha! In mate tau mwahumwahuli edi Yaubada. Hige tau peꞌipeꞌi edi Yaubada. (Diyon 11)
Laugagayo Tausomo Namba Wan
Maleko 12:28-34
(Matiu 22:34-40; Luka 10:25-28)
28 Laugagayo tau lau faꞌataena hesa ya laoma, edi liba ya atahi. Ya sibai mate Sadusi edi liba Yesu ya bui loholohoꞌidi yo fede ya fatiꞌoi iyen,
Laugagayo mahudoꞌina ganahewana yai tausomo ya hasai wananaha?
29 Yesu iyen,
Esega ya hasai wananahana mate itete:
“Isalaela au ataꞌatahi! Guyau in iyabona eda Yaubada.
30 Yaubada u gadosisiyen ma nuwa ofifahim,
em nuwatuhu mahudoꞌina,
yaluwam mahudoꞌina, yo ma adidilim.” (Diutelonomi 6:5)
31 Laugagayo fafaluwagana mate itete:
“Falem tau miya u gadosisiyen,
doha um wa gadosisi fuyoim.” (Lewitikusi 19:18), (Luka 10:25-37)
Laugagayodi luwaga te, sa hasai wananaha, habahim hahaisa.
32 Laugagayo tau lau faꞌataenna ya libalau Yesu lisina iyen,
Tanuwaga, wa liba dudulai mate,
Yaubadana, esega; hige sai hesa; In ibona moho.
33 Yaubada u gadosisiyen ma nuwa ofi fahim, em nuwatuhu mahudoꞌina, yo ma adidilim.
Falem tau miya u gadosisiyedi,
doha um wa gadosisi fuyoim.
Laugagayo luwaga te sa hasai wananaha, habahim yosiyosi gabugabudi yo ainauya hahaisa Yaubada te felen aba antalasam gabuna yai. (1 Samuwela 15:22)
34 Ena bui Yesu ya atahi mate ya dudulai, yo fede ya faliba iyen,
Yaubada Ena Aba Baꞌisa hige i lofa lisim yai.
Yo fede sa ꞌwasabu be hige somo hesa Yesu ti fatiꞌo fuyoi.
Keliso Fatiꞌona
Maleko 12:35-37
(Matiu 22:41-46; Luka 20:41-44)
35 Fuyana Yesu ya laulau faꞌata Dubu Tabuna dobidobina yai, ya fatiꞌo iyen,
Sidohana be laugagayo tau lau faꞌataenna itiye, “Keliso mate Deiwidi laulauwewena?”
36 Yaluwa Tabuna nuwatuhu Deiwidi ya felen be iyen,
“Guyau ya libalau egu Guyau lisina,
‘Ai sibagu u taꞌai yee–, am waiyunu E toledi ai ahem ubuna.” (Samsi 110:1)
37 “Ibe Deiwidi iyen, ‘Um Guyau,’ haba sidohana be in Deiwidi laulauwewena?”
Na baiwa laꞌilaꞌi, ya ataꞌatai ma nuwa kwadedi.
Yesu Laugagayo Tau Lau Faꞌataenna ya Liba Fanuwatagudi
Maleko 12:38-40
(Matiu 23:1-36; Luka 20:45-47)
38 Yesu ena lau faꞌata ganahewana yai iyebom,
Laugagayo tau lau faꞌataedi, au ita sipoꞌidi! Salumadi sa fanuha bena edi leli lofalofadi na sa leu yo sa sai ai maketi be haba dodoga sa laulautoꞌiyedi.
39 Aba oiꞌoigogo lumadi yai yo mataꞌasi ganahewadi yai sa fanuha bena aba taꞌai loholohodi yai sa taꞌai.
40 Hwabuhwabu edi luma ginaulidi sa bwalafahidi be ai edi, sa abidi, yo lauꞌuꞌula sa falofadi. Lau bwalabwala te lisidi yai haba kamkamna lalaꞌi sa fahoinadi.
Hwabuhwabu Hesa ena Ainauya
Maleko 12:41-44
(Luka 21:1-4)
41 Diusi edi Dubu Tabuna yai Yesu ya taꞌataꞌai, moni aba husanina sadaina yai be dodoga boludi moni sa toletole ya kinokinoꞌidi. Tau fagogo boludi mate moni lalaꞌi sa toledi;
42 na hwabuhwabu hige ena moni ya laoma be moni kapa kikiꞌuka luwaga ya husanidi, laꞌina doha 5 toea.
43 Ana hewahewali ya yoga gogondima na ya falibadi iyen,
E faliba dudulaimiu! Hwabuhwabu tau gogo gesagesana te, ainauya laꞌilaꞌi ya tole aba husanina yai, na habahim hahaisa.
44 Tau fafagogo mate edi tefa sa ota, na waihin ni ena moni ofiꞌofina. Ana kalahe edaꞌedana logena, ya tole ofiꞌi.