4
Tuma Tau Falilina Heyaheyasonna
Maleko 4:1-9
(Matiu 13:1-9; Luka 8:4-8)
1 Yesu ya lau faꞌata boda gabogabo sadaina yai na baiwa ya laꞌi wananaha, yo fede waga hesa ya poupouli amainiya ya awa lau be ya taꞌai. Na dodoga mate fote yai.
2 Heyaheyason ya fapaisowadi ena lau faꞌata yai be ginauli boludi ya fatalahadi iyen,
3 Au ataꞌatahi! Fuya ma esega doga hesa ya lau be witi tumadi ya lau falili ena gabu yai.
4 Haisa sa beꞌu edaꞌeda yai yo fede ataiꞌa sa laoma be sa anidi.
5-6 Haisa sa beꞌu tanohi umeꞌumeꞌehuna yai be sa in feufeula. Maihala ya kepama witi wa ya nefadi be sa hohoya paꞌana tanohi ya hebehebe be hige ti abi lam sigi lidi.
7 Tuma haisa sa sagigi lidi hawahawa nulinulidi ganahewadi yai be sa in. In moho sa waboꞌidi be hige ti in loholoho yo hige ti fuwa.
8 Haisa mate sa beꞌu tanohi loholohona yai be sa in yo sa fuwa loholoho be haisa tumadi naunaudi na haisa sa duliduli.
9 Ofiꞌofina, Yesu iyen,
Au ataꞌatahi komakoman!
Paꞌana Somo be Yesu Heyaheyason ya Fapaisowadi?
Maleko 4:10-12
(Matiu 13:10-17; Luka 8:9-10)
10 Yesu iyabona na tau ataꞌatahi haisa maidadi safuhudohudoꞌi luwaga sa laoma be Yesu sa fatiꞌoi tiyen,
Heyaheyason aniyodi haga ema u liba?
11 Yesu ya falibadi iyen,
Yaubada Aba Baꞌisa libana simosimona mate haꞌa E falibamiu. Na dodoga haisa mate heyaheyason yai sa atahiyen.
12 “Haba sa ita na in moho ibege ti ita lobahi;
haba sa ataꞌatahi na in moho ibege ti nuwatuhu lobahi.
Ibe moho nuwadi sa buidi haba edi heyaheyaya ya nuwa afuledi.” (Isaiya 6:9-10)
Heyaheyason, Aniyona Yesu ya Dede Famahata
Maleko 4:13-20
(Matiu 13:18-23; Luka 8:11-15)
13 Habahim Yesu ya fatiꞌoidi iyen,
Yena heyaheyason te hige au sibai mate haba haisa sidohana emi sibasibaidi?
14 Tau falili mate Yaubada ena wasa tau umahina.
15 Dodoga haisa itaꞌitadi doha tuma edaꞌeda yai. Wasa sa atahiyen yo fede Diyabolo ya laoma be libana nuwadi yai ya abi fahi.
16 Dodoga haisa iti doha tuma sa beꞌu lidi tanohi umeꞌumeꞌehuna yai. Wasa sa atahiyen yo fede sa abi ma nuwa amnadi.
17 In moho hige i abi lam nuwadi yai be hige i ota lofalofa. Yena pilipili e kamkamna sa laoma wasa ni debana yai feula na sa muli suhasuha.
18 Na dodoga haisa doha tuma sa in hawahawa nulinulidi ubudi yai. Iti logedidi wasa tau atahiyenna.
19 In moho:
mode hudoꞌi - hudoꞌi,
bena sa fagogo,
yo fanufanuha haisa nuwadi sa famohafudi.
Yo fede wasa sa eli bulubuluhi be hige ti fuwa.
20 Dodoga haisa mate doha witi tumadi sa falili tanohi loholohona yai. Wasa sa atahiyen yo fede sa lau watan be uludi sa toledi. Haisa naunaudi na haisa sa duliduli.
Lampa sa Fakou Gulewa yai
Maleko 4:21-25
(Luka 8:16-18)
21 Yesu hinaga ya liba iyen,
Yena lampa wa gabu haba ai gulewa wa fakou e ai aba eno ubuna wa tole? Higeꞌe! Haba ai mahata wa tole.
22 Ginauli simosimodi haba sa taumahata na somo sa fakou haba bubulina sa kamfahi.
23 Fafabeyamiu, au ataꞌatahi komakoman!
24 Yo ya falibadi hinaga iyen,
Somo ami atahi mate au fadosi komakomaniꞌi! Lufa laꞌina somo wa fapaisowa haba gonogonowana ai lisim sa fapaisowa e haba ya diꞌoi. (2 Kin 21:13)
25 Yena sai somo lisina yai mate Yaubada haba ya falaꞌi. Na sai higeꞌe mate somo begana lisina yai hinaga haba ya kamfahi.
Tuma Iyabodi sa In, Heyaheyasonna
Maleko 4:26-29
26 Yesu ya liba fuyo iyen,
Yaubada Aba Baꞌisa itaꞌitana doha taumoho hesa tuma ya lau falili gabu yai.
27 Lahai fisa mulidi yai tuma wa ya in. In moho sidohana ena inꞌin yo ena laꞌilaꞌi hige i sibai.
28 Tanohi iyabona tuma wa ya faꞌin be ya fuwa. Bwaꞌibwaꞌina mate atipuna bigabigana ya taumahata, habahim ya taya be tumana ya toledi.
29 Ya anaho be ya tomo.
Umaꞌuma Hesa Heyaheyasonna
Maleko 4:30-34
(Matiu 13:31-32, 34; Luka 13:18-19)
30 Yesu ya falibadi iyebom,
Yaubada Aba Baꞌisa doha somo? Heyaheyason somo haba te fapaisowa be te fatau gonogonowa?
31 Itaꞌitana doha ite: Taumoho hudoꞌi umaꞌuma hesa tumana kiukiu wananaha ya umahi.
32 Hige walolona ya in, be gabu anꞌandi haisa ya tubu famulidi na ataiꞌa sa lofoma be lagadi logulogudi yai edi nohi sa ginaulidi.
33 Heyaheyason boludi doha itete Yesu ya fapaisowadi be dodoga enehedi ya dede, be haba gonowana sa nuwatuhu lobahidi.
34 Heyaheyason yai moho ya falibadi na yena iyabodi mate aniyodi ya dede famahatadi tau famuli watanna lisidi yai.
Yesu ya Liba be Hwayahwayau ya Fatautau
Maleko 4:35-41
(Matiu 8:23-27; Luka 8:22-25)
35 Maimailafina Yesu tau famuli watanina ya falibadi iyen,
Haga ta lau gabogabo tefana.
36 Waga haisa amainiya hinaga. Tau famuli watanina baiwa sa lau afuledi, na sa awa lau Yesu ena aba taꞌataꞌai wagana yai be sa lau tefa.
37 Hige walolona hwayahwayau adiꞌadidilina ya towa be bagodu sa hin diꞌo. Begana haba waga sa famohafu.
38 Yesu ya eno unuwa yai waga mulina yai. Tau famuli watanina sa fanohi tiyen,
Tanuwaga! Haba te peꞌi. Sidohana hige u mode?
39 Yesu ya obiyo be ya liba adidili lau hwayahwayau yo bagodu lisidi iyen,
Au fatautau!
Yo fede hwayahwayau ya towa motu na ya daumwali fuyo.
40 Habahim Yesu ya falibadi iyebom,
Sidohana be ami ꞌwasabu? Emi sunuma, e higeꞌe?
41 In moho sa ꞌwasabu wananaha be sa famoꞌa libaliba tiyen,
Sai itete? Hwayahwayau yo bagodu ena liba sa lau watan!