6
Nasaleta yai, Yesu sa Waiyoꞌoꞌen
Maleko 6:1-6
(Matiu 13:53-58; Luka 4:16-30)
1 Galili nuꞌuna Yesu ya lau afulen na ya fuyo ena nuꞌu wananahana, Nasaleta. Yo fede ana hewahewali sa lau watan.
2 Sabati yai ya lau faꞌata Diusi edi aba oiꞌoigogo lumana yai. Yo fede dodoga boludi sa noꞌo.
Na tiyen,
Libadi te sai lisina yai ya sana taluhidi? Sibasiba sai ya felen be noꞌo abiꞌabidi ya lau ginauli?
3 In luma tau laulau ginauli, yo Maliya natuna! Tatasina mate: Diyemsi, Diyosepa, Diuda yo Saimon. Lolofuna mate maidada te miyamiya. (Paisowa 15:13)
Logena, ena nuꞌu dodogadi sa ꞌwaiyoꞌoꞌen.
4 Yesu ya falibadi iyen,
Peloweta nuꞌu mahudoꞌina yai sa faꞌatitiyen. In moho ena nuꞌu dodogadi yo afa efana yo ana boga mate sa ꞌwaiyoꞌoꞌen.
5 Hige gonowana noꞌo abiꞌabidi laꞌi i ginauli ainiya. Tau lepalepa fisa moho nimana ya tole lawedi hewadi yai be sa loholoho.
6 Yo fede ya famala Yesu ena tauhiti paꞌana hige edi sunuma.
Yesu Tau Faꞌona Wasawasa 12 ya Duidi
Maleko 6:6b-13
(Matiu 10:5-15; Luka 9:1-6)
Yesu ya taꞌiꞌili nuꞌu hesa - hesa be dodoga ya faꞌatadi.
7 Tau faꞌona wasawasa 12 ya yoga gogonidima be dudulai ya feledi bena yaluwa heyaheyayadi sa liba duidi. Yo fede luwaga - luwaga ya fatamalidi.
8 Ya laugagayodi iyen,
Ami lau, tabu somo hesa au abi. Tuꞌe moho, tabu kalahe, tobo e moni.
9 Sendolo au awai na tabu luhuluhu hesa au abi.
10 Ya falibadi hinaga iyen,
Somo yai sa yoga hitinimiu, ai lumana ami gogo ee–, ami aulaha boda.
11 Yena ami mahano ai taon hesa na dodoga hige ti yoga hitinimiu e emi liba hige ti atahiyen nuꞌuna ni au lau afulen. Ahemiu afusadi au oi luhiluhidi, haba ya famala edi heyaya aba ita lobahina.
12 Habahim ya falibadi be sa lau dodoga sa guguyaidi na bena sa nuwabui.
13 Yaluwa heyaheyayadi sa liba duidi yo tau asiꞌasiyebo oliwe masina yai sa famaꞌidi be sa loholoho.
Diyon Babasito ya Peꞌi
Maleko 6:14-29
(Matiu 14:1-12; Luka 9:7-9)
14 Kin Heloda liba te ya atahiyen paꞌana Yesu hesana ya tadada nuꞌu ouꞌouli yai yo fede haisa tiyen,
Diyon Babasito ya mwahuli fuyo logena gigibwali te ya abi be fafaꞌilala ya lau ginauli.
15 Haisa hinaga tiyen,
In Ilaidiya.
Na haisa tiyen,
In doha peloweta haisa bwaꞌibwaꞌidi.
16 Kin Heloda wasa ya atahiyen yo fede iyen,
Diyon Babasito gadona haꞌa E ibo, mate ya mwahuli fuyo!
17-18 Ena fafatubu doha ite: Diyon Babasito Heloda ya fafaliba iyen,
Hige i dudulai bena hidam lahuna Helodiya u kamofahi!
Yo fede, Kin Heloda ya liba be Diyon sa faseni be sa falau deli.
19 Helodiya ya manabala Diyon lisina yai be bena ya wunui, in moho hige gonowana.
20 Kin wa Diyon ya ꞌwasabuwen be ya bobodiyen. Ya sibai mate in doga dudulaina yo fatabu dogana. Diyon ena liba ya fanuha wananahaidi. In moho nuwana ya faiꞌabi paꞌana ponoli haꞌa ya ginauli.
21 Fuya hesa lahuna Helodiya ena solasola ya lobahi mate Heloda ena fuya tubu nawalahina yai. Yo fede anꞌangogo ya ginauli be gabeman laꞌilaꞌidi, hiyala babaꞌisadi yo Galili tefadi babadadi ya yoga gogoidima.
22 Helodiya natuna waihin ya laoma edi ya leꞌi, be Heloda yo ana taumana nuwadi sa amna. Yo fede baꞌisa wa tineꞌeu ya faliba iyen,
Somo wa fanuha haba E felem.
23 Ya liba dudulai tineꞌeu lisina yai iyen,
E angwala mate yena em fanuha somo wa libaen haba E felem. Yena uwen, em nuꞌu tefana u daili be u felegu, mate gonowana!
24 Yo fede tineꞌeu wa ya lau tinana ya fatiꞌoi iyen,
Tinagu somo haba E anꞌetai?
Tinana alinana ya bui iyen,
Diyon Babasito kuluna u anꞌetai.
25 Tineꞌeu wa ya fabelele ya fuyo baꞌisa lisina be iyen,
E fanuha bena aho te, Diyon Babasito kuluna ai gaeba wa felegu!
26 Kin nuwana ya heyaya, in moho hige gonowana ena nuwatuhu i ꞌwaiyoꞌoꞌen paꞌana ena angwala haꞌa ya ginaulidi ana taumana matadi yai.
27 Yo fede gati hesa ya fatamali ya lau deli yai be Diyon gadona ya ibo motu,
28 habahim gaeba yai kuluna ya abiyama be tineꞌeu ya felen. Na ya lawen be tinana ya felen.
29 Wasana sa atahiyen be ana hewahewali sa lau silanna sa abi be sa boꞌusai.
Dodoga 5,000 Yesu ya Fakalahedi
Maleko 6:30-44
(Matiu 14:13-21; Luka 9:10-17; Diyon 6:1-14)
30 Tau faꞌona wasawasa sa fuyoma be maꞌedi Yesu sa faꞌoigogo be somo sa ginaulidi yo edi lau faꞌata wasadi ena sa liba.
31 Yesu maꞌana hewahewali hige edi solasola haba ti kalahe paꞌana dodoga boludi sa lau yo sa laoma. Yo fede iyebom,
Ta lau nuꞌu laulau gesa yai, be ainiya au anyawasi.
32 Yo fede waga yai sa awa modigafu na sa lau atiꞌatipu hesa yai.
33 In moho dodoga boludi sa ita lobahidi be taon mahudoꞌidi yai sa tafo bwaꞌibwaꞌi be sa mahano bwaꞌi.
34 Waga ya mahano Yesu ya tulubeꞌu yo fede baiwa ya itadi be ya nuwatohatohaedi. Paꞌana itaꞌitadi doha sipi hige tau ita watanidi na sa laulau koko. Logena ginauli boludi ya fatubu ya fatalahadi.
35 Ya maimailafi yo fede tau famuli watanina sa laoma lisina be tiyen,
Ita itete balabala gaibu yai.
36 Dodoga te u duidi ti lau nuꞌu mulimulina yai kalahe adi ti unedi.
37 Na Yesu alinadi ya bui iyebom,
Umi kalahe au feledi.
Tiyen,
Wa fanuha bena siluba handele luwaga ꞌe abidi be fwalawa ꞌe unedi na ꞌe fakalahedi?
38 Yo fede Yesu ya fatiꞌoidi iyen,
Fwalawa fisa? Haga au lau au yoꞌo.
Sa yoꞌo be sa fuyoma tiyen,
Fwalawa faligigi yo hama luwaga.
39 Yesu ya libalau tau famuli watanina lisidi iyen
Dodoga au falibadi, be ti taꞌai pwalupwaluidi ai hawahawa.
40 Yo fede haisa oulidi 100 sa taꞌai, na haisa oulidi 50.
41 Habahim Yesu fwalawa faligigi yo hama luwaga ya abidi na ya itaꞌita hasa galewa na ya faloholohodi. Fwalawa ya ifidi, na hama luwaga ya kampwaidi be tau famuli watanina ya feledi sa soiyedi dodoga mahudoꞌidi lisidi yai.
42 Mahudoꞌidi sa kalahe be bogadi sa yahayaha.
43 Habahim tau famuli watanina fwalawa yo hama antoledi sa tano gogoidi be noho 12 sa famohafudi.
44 Tatau sa fakalahedi ouꞌoulidi 5,000.
Yesu ya Laulau Gabogabo Hewana yai
Maleko 6:45-52
(Matiu 14:22-33; Diyon 6:15-21)
45 Yesu tau famuli watanina ya duidi be feula waga yai sa awa na sa dohe Betesaida. Na muli yai baiwa ya duidi.
46 Ya lautoꞌiyedi mulina yai, ya finahe hasa tuꞌa yai be ya lauꞌuꞌula.
47 Toutou bulu yai mate waga haꞌa gabogabo atipuna yai, na Yesu mate iyabona fote yai.
48 Tau famuli watanina ya itadi mate sa fulufuluga afuledi bena waga sa lefaꞌen paꞌana hwayau sa tulu matai. Hola hige i ifi tatatali, gabogabo hewana yai ya lau lisidi. Bena ya bayawaidi,
49 na sa itaꞌita lau be sa ita gabogabo hewana yai ya laulau. Edi nuwatuhu bena haga onaꞌonaha, be sa ꞌwalaꞌwalaui.
50 Mahudoꞌidi sa ita be sa ꞌwasabu wananaha.
Yo fede Yesu ya libalau lisidi iyebom,
Nuwamiu ti adidili! Tabu au ꞌwasabu, Yau!
51 Yo fede ya awalau waga yai na hwayahwayau ya towa motu. Tau famuli watanina edi noꞌo sa ofi.
52 Nuwadi sa lau fabui homodi, paꞌana 5,000 ya fakalahedi aniyona wananahana hige ti nuwatu lobahi.
Genesaleta yai Yesu Tau Asiyebo ya Faloholohodi
Maleko 6:53-56
(Matiu 14:34-36)
53 Sa dohe Genesaleta nuꞌuna yai, amainiya edi waga sa ankai.
54 Sa tulubeꞌu, yo fede dodoga Yesu sa ita lobahi.
55 Wasana sa atahiyen in somo yai, mate feula sa lau nuꞌu ouꞌouli yai be tau asiꞌasiyebo edi aba laulau eno yai sa baheidima lisina.
56 Yena Yesu ya lau luma yai e taon yai e nuꞌu mulimulidi yai, tau asiꞌasiyebo sa lawedi maketi yai be sa anꞌetai bena ena leli duduna moho sa abiꞌina. Salumadi ena leli sa abiꞌina mate sa loholoho.