16
Samuwela, Deiwidi ya Fasinabo
1 Samuwela 16:1-7, 10-14
1 Guyau ya libalau Samuwela lisina iyen,
Saulo wa tanisi, haga i lofa! Ena tanuwaga Isalaela yai, mate E ꞌwaiyoꞌo. Oliwe uluna gilisina em sipi donana u famohafu na u lau Betelehem. Amainiya taumoho hudoꞌi hesana Desi nanatuna ganahewadi yai mate hesa haꞌa E fasinabo kin, Saulo falau damahina.
2 Samuwela ya fatiꞌo iyen,
Haba sidohana egu laulau? Saulo liba te ya atahiyen haba ya wunuigu!
Guyau iyen,
Bulumakau tinabawa gubugubufwauna u abi na uwen, “E laoma antalasam E ginauli Guyau ai lisina.”
4 Guyau somo ya libaen, Samuwela ya lau watan. Fuyanna ya mahano Betelehem yai mate taon babadadi sa failobahi, yo fede ꞌwasabu ya kam fafatabubudi, na sa fatiꞌo, tiyen,
Ma nuwa loholohom wa laoma?
5 Samuwela alinadi ya bui iyen,
Ii–, ma nuwa loholohogu E laoma bena antalasam E ginauli Guyau ai lisina. Au fatabu fuyoimiu haba te lau antalasam aba gabuna yai.
Habahim, Samuwela, Desi ma nanatuna ya fatabuwedi be ya yogaidi sa lau antalasam ganahewana yai.
6 Fuyanna sa mahano, Samuwela ya itaꞌitalau be Desi natuna tau tuwaha Eliyabi ya ita be nuwana yai, iyen,
Taumoho ya obiꞌobiyo Guyau matana yai, mate logena, Guyau ya fasinabo kin.
7 In moho, Guyau ya libalau Samuwela lisina iyen,
E ꞌwaiyoꞌoꞌen be tabu hewalina yo kwaluna au nuwatuhui. Ginauli somo Guyau ya itaꞌitai mate dodoga hige ti ita. Doga, falena doga moho tauna ganamulina ya itaꞌitai, na Guyau doga nuwana ganahewana ya itaꞌitai.
10 Desi nanatuna tatau faligigi luwaga sa lau Samuwela lebena. In moho, Samuwela ya libalau Desi lisina iyen,
Higeꞌe! Guyau hige iti i fasinabodi.
11 Yo fede ya fatiꞌo lau Desi lisina, iyen,
Nanatum tatau mahudoꞌidi logedi itete?
Desi iyen,
Higeꞌe. Tau mulita wananaha hola hige i laoma. In, sipi ya itaꞌita watandi.
Na Samuwela iyen,
Ana liba au fatamali be i laoma; ibege hola ta anꞌangogo ana siga ee–, ya mahanoma.
12 Yo fede, Desi, doga hesa ya fatamali be Deiwidi ya foyahiyama. In mate nenena yo hewalina sa loholoho wananaha.
Fuyanna Deiwidi ya mahano, Guyau ya libalau Samuwela lisina iyen,
In logena! U obiyo be oliwe uluna gilisina u hin ai kuluna.
13 Yo fede Samuwela oliwe uluna gilisina sipi donana yai ya fagoi Deiwidi kuluna yai, afa haidana matadi yai. Maꞌesega na, Guyau Yaluwana ya talu Deiwidi hewana yai be–, ma gigibwalina be ya ota esegahi.
Habahim Samuwela ya fuyo Lama nuꞌuna.
14 Yaubada Yaluwana Saulo ya lau afulen na Guyau yaluwa heyaheyayana ya fatamali lawen Saulo lisina be ya fafaꞌwasabu.