7
Ama 144,000 Ne Ama Qaqet Nevet Ma Isrel
1 Be aip naset liirang aa, de ngua lu ama Angeluqena ama rlatpes na ra. I ra maarl aa ver ama aivetki ara garliirang i ama Rlatpes ne iirang ip te pesdet se ama laurl ama rlatpes na nget. Taqurla ip kuasiq ama laurl ngere sis per ama aivetki de ama kaska de ngen ama mung.
2 Baiv aa de ngua lu iaq ama Angeluqa i baing se qa ianai sagel ai de baingbaing se ama nirlaqa i qat den. I luqa i qe taneng ama merlengaqa nagel ama Ngemumaqa i luqa i qe iames masmas. De qa nes slep sagel lura ama Angeluqena i ama rlatpes na ra, i lura i re tal ama dlek ip te lenges ne ama aivetki de ngen ama kaska.
3 I qes nes ma’, “Kula masmasna ngene lenges ne ama aivetki ngen ama kaska de ama mung. I uure narliiv uur ru auur a Ngemumaqa aa merlengaqa de lura araa qames i lura i aa uis. De naqerl aiv aa de ngene lenges ne ama tekmeriirang mai.”
4 Be aiv aa de ngu narli ra tis ama qaqet i ra raneng ama merlengaqa. I ra mu ama merlengaqa men ama 144,000 na ra i ra never ama liin mai vet ma Isrel.
5-8 Taqurla be ngua iil lura araa rlen i re mu ama merlengaqa men a ra.
| Ma Juda | 12,000 |
| Ma Ruben | 12,000 |
| Ma Gat | 12,000 |
| Ma Asa | 12,000 |
| Ma Naptali | 12,000 |
| Ma Manase | 12,000 |
| Ma Simion | 12,000 |
| Ma Levai | 12,000 |
| Ma Isakar | 12,000 |
| Ma Sebulan | 12,000 |
| Ma Josep | 12,000 |
| Ma Benjamin | 12,000 |
Dai lura iara dai ra raneng ama Ngemumaqa aa merlengaqa.
Maikka Buup Ne Ama Qaqet Ta Iing demna Gel Ama Ngemumaqa
9 De aiv aa de ngum ngim, dai ngua lu ama qaqet i maikka buup i ra iing demna. Be qatias kuasik mager iv a qek ka risavet na ra. I lura ama qaqet dai ra never ama liin mai ne ama qaqet, i ra men never ama qerleng mai, i ama qetdingki muqas muqas, de ama lengiqa i muqas muqas. I ra maarl aa ver ama Ngemumaqa aa saqang de ver ama Sipsiviini aa saqang. De ra mu ama luan ama ainkul nget i ama a lauil a nget. De ve araa ngerik, dai ra raneng ama daanan uaing.
10 De res nes slep ma’,
“Ama Ngemumaqa dai ngi ama rarlimini na ngi i ngia iames nauut.
I ngia mugun met gia Siaqi i ngi taneng ama dlek mai i ngi ne ama Sipsiviini.”
11 De ama Angeluqena mai i ra iingmirlek ne ama Slurlka ngen ama Barlta de ngen ne Liirang aa ama Rlatpes ne iirang i iirang nge re iames; I vaik per a ra manep sa men ama aivet, de re lautu sagel ama Ngemumaqa.
12 De ra ruqun ma’,
“A revan. Auur arlias malai sagel ama Ngemumaqa. I aa ansinki ngen aa dlek dai qatias nget peviit. Be ai de uurel sil sever aa rlenki ai ama slurlki.
De aa tuaqevep mai dai ama atlu nget. Be uut taqen ne ama atlu sagel ka, de uut taarl ne aa rlenki masmas aaviit be aaviit be quasik perlverleset.
A revan.”
Lura Dai Sa Verleset Ne Araa Getget
13 Be aip maget de iak nevet lura ama Barlta qa snanpet na ngua ma’, “Lura i ra mu ama luan ama ainkul nget i ama a lauil a nget, dai nemta na ra? De ra men naqua?”
14 De ngua virliit ba qa ma’, “A Barlka, katikka ngi ngiat drlem.”
De qa ruqun a ngua ma’,
“Lura dai mekai ra ral ama merlen ama slurl-nget de ngen ama getget nagel ama qumes-ta. De ra ukmes te araa luan ne ama Sipsiviini arla qerekka, be ama luan dai maikka ama a lauil a nget.
15 Taqurla be qatikka ra tuqun per ama Ngemumaqa aa saqang.
Be ai de ret matna ver aa rletki per ama niirl ngen ama arlen mai ve aa Lautu-vem-ki. De diiv ama Ngemumaqa qe uas tem ta ip taquarl ama kaap ngere ngung pet ser ama vetki.
16 Be ra dai saqias diip kuasiq ama getki vem ta de diip kuasiq dingding sep ta. De ama nirlaqa dai diip kuasiq ai qes nis met ta, iv ama uilas per a ra.
17 I raquarli ama Sipsiviini (i ma Iesus) dai qurli qa veleqes ne ama luqupki, sagel kurl ama Ngemumaqa. Be diip ka tit se ra semer ama kaina i ama glasingas met nget i vukpuk se nget.
De diiv ama Ngemumaqa qe suquv ama medek never aa qaqet are ves be saqias diip kuasik mager ip tek nak.