3
Upatnar e apóstol Pablo tujam e gente xeꞌ majax tuobꞌ e Israel
1 Pues nen xeꞌ Pabloen macbꞌiren tara tama e cárcel umen que cay inchecsu uyojroner e Dios tama e Cristo Jesús tut e gente xeꞌ majax tuobꞌ e Israel y umen que cꞌani intacriox nox.
2 Bꞌajcꞌat iyubꞌix que nen ajcꞌunen meyra utacarsiaj e Dios tuaꞌ uyubꞌien insutpa impuqui axin tunor e tacarsiaj era tacarox xeꞌ majax tuox e Israel.
3 Pues irsenen umen e Dios lo que jaxir tuaꞌ axin uche tara tor e rum. Pero tunor era quetpa mucresbꞌir umener desde que ma ani tucꞌa or e rum era bꞌan cocha cay intzꞌijbꞌa tiut tama inyajr.
4 Y conda ixixin iche leer e carta era erer inata que nen cꞌotoyen innata lo que ayan xeꞌ mucur ani tama e Cristo.
5 Pues tama e onian tiempo Cadiosir machi war uchecsu tunor era tut e gente axin. Pero coner war uchectes axin tut tin e apostolobꞌ xeꞌ erach y tut tin e profetobꞌ tacar Unawalir.
6 Y lo que quetpa mucur ani tut e gente tara tor e rum jax era: Que tunor tin e acꞌotoy acꞌupseyanobꞌ tama e Cristo Jesús cꞌani uchꞌamiobꞌ inteꞌ herencia tunorobꞌ. Y tunorobꞌ tuaꞌ uchꞌamiobꞌ e herencia era motor jay tuobꞌ e Israel o motor jay majax tuobꞌ e Israel. Y tunoron cocha era quetponix inteꞌ taca cuerpo tama e Cristo, y aquetpa que e Dios tuaꞌ axin uxere taca tunoron xeꞌ cachꞌami uyojroner e Dios tama e Cristo tunor lo que cay che tama e onian tiempo xeꞌ quetpa tuaꞌ uche.
7 Pues nen tacarnen umen e Dios conda uyajqꞌuen nicꞌampibꞌir tuaꞌ inquetpa uman e Dios tuaꞌ uyubꞌien inxin inchecsu uyojroner e Dios tama e corpesiaj tut e gente axin. Pues jax e Dios xeꞌ cay patna tamaren tacar ucꞌotorer tuaꞌ uyajqꞌuen tunor nicꞌampibꞌir era.
8 Y motor que nen más chuchu nicꞌampibꞌir que tunor tin e tuobꞌ e Dios, pero jax nen xeꞌ ajcꞌunen utacarsiaj e Dios tuaꞌ inxin inchꞌucsu tut tunor e gente xeꞌ majax tuobꞌ e Israel tunor e nuxi tacarsiaj que ma erer cabꞌisi xeꞌ ayan tama e Cristo.
9 Y e Dios uyajqꞌuen tuaꞌ inxin inchecsu tut tunor e gente lo que cay ubꞌijnu uche jaxir conda merato achena or e rum era. Y tunor lo que cay ubꞌijnu uche era mamajchi tut uchecsu esto coner conda cay uyajcꞌon tuaꞌ canata xeꞌ apostolon. Y jaxir xeꞌ uche cocha era jax xeꞌ uche tunor lo que ayan ubꞌan.
10 Y Cadiosir ixin uche cocha era tuaꞌ acꞌotoy unatobꞌ tunor e sian ajcꞌotorerobꞌ y tunor e sian ajcꞌamparobꞌ lo que ayan tut e qꞌuin cobꞌa e nuxi natanyaj lo que ayan tuaꞌ. Y bꞌan taca cocha era tuaꞌ acꞌotoy unatobꞌ conda axin uwirobꞌ lo que war uche Cadiosir tamaron xeꞌ ajcꞌupesiajon tamar.
11 Y Cadiosir uche tunor cocha era umen que bꞌan quetpa chꞌuwan tama uyalma que cꞌani uyajcꞌon e corpesiaj tama e Cristo Jesús xeꞌ jax Cawinquirar.
12 Y tamar era non xeꞌ turon tama e Cristo Jesús xeꞌ war cacꞌupseyan tamar machi ixto tuaꞌ cabꞌacta tuaꞌ cacꞌajti taca Catata Dios porque coner ayan cacꞌupesiaj que jaxir turix tuaꞌ uyubꞌion conda cacꞌajti tacar.
13 Y tamar era cꞌani inwareox que ira ixjayjayran tama iwalma umen que nen war innumse nibꞌa tara tama e cárcel. Porque nen turen tama e cárcel umen que cay intacriox tunorox, y lo que war innumse nibꞌa era acꞌampa tuaꞌ itattzꞌi ucꞌabꞌa Cadiosir tamar umen que jaxir war ucojcuen motor que tara turen tama e cárcel.
Uyajta coit Cawinquirar Jesucristo
14 Y tamar era nen incotuan tut Catata Dios tuaꞌ intattzꞌi ucꞌabꞌa tama tunor lo que war uche.
15 Porque Cadiosir jax e Tatabꞌir tuaꞌ tunor tin e war acꞌupseyanobꞌ tamar, motor jay turobꞌ tut e qꞌuin o motor jay turobꞌ tara tor e rum. Y tamar era tunoron caquetpa intera familía tamar jaxir.
16 Y war incꞌajti taca Catata Dios xeꞌ ayan meyra utawarer que jaxir axin uyajcꞌox ucꞌotorer y que axin uqꞌuecꞌojsiox tama iwalma taca utacarsiaj Unawalir.
17 Y war incꞌajti taca e Dios tuaꞌ aturuan e Cristo tama iwalma umen que war ixcꞌupseyan tamar, y que erer ixqꞌuecꞌo tama ucꞌunersiaj e Cristo y que tunor era erer awiri bien macuir iwalma ubꞌan,
18 y que tamar era erer ixqꞌuecꞌo tuaꞌ uyubꞌiox ixcꞌotoy inata taca tunor e inmojr ajcꞌupesiajobꞌ tama e Cristo cobꞌa nuxi cꞌunersiaj lo que ayan tuaꞌ e Cristo. Porque nojta ucꞌunersiaj e Cristo este que mamajchi xeꞌ erer ubꞌisi cobꞌa unojir y nien cobꞌa utamir, y mamajchi xeꞌ erer ubꞌisi esto tiaꞌ axin tichan tunor ucꞌunersiaj e Cristo era.
19 Y war incꞌajti taca e Dios que erer ixcꞌotoy inata cobꞌa e cꞌunersiaj era que nojta este que mamajchi uyubꞌi ubꞌisi cobꞌa ucꞌunersiaj e Cristo era. Porque tamar era erer axin abꞌutcꞌa iwalma tunorox taca tunor ubꞌutꞌurir e Dios.
20 Pues catattzꞌic ucꞌabꞌa Cadiosir xeꞌ uyubꞌi uche meyra tujor tunor lo que erer cacꞌajti tacar, y xeꞌ uyubꞌi uche meyra tujor tunor lo que erer cabꞌijnu tuaꞌ uche tacar ucꞌotorer xeꞌ war apatna macuir cawalma.
21 Y catattzꞌic ucꞌabꞌa Cadiosir tama tunor e grupo ajcꞌupesiajobꞌ y tama e Cristo Jesús iraj iraj y ejcꞌar ejcꞌar. Amén.