17
Awiric tuaꞌ machi ixcucrema tama e mabꞌambꞌanir
Mateo 18:6-7, 21-22; Marcos 9:42-43
1 Entonces e Jesús uyare uyajcanuarobꞌ y che:
—Pues ayan ixto lo que upejca uyalmobꞌ e gente tuaꞌ uchiobꞌ e mabꞌambꞌanir, pero tzajtaca ut tin e axin uche acucrema e gente tama e mabꞌambꞌanir cocha era.
2 Más ani bueno tuaꞌ acajcha inteꞌ chaꞌ tama unuc y tuaꞌ atobꞌesna axin tama e jaꞌ tiaꞌ intam tuaꞌ achamay macu jaꞌ tuaꞌ machi uche acucrema inteꞌ xeꞌ wartocto acꞌupseyan tamaren.
3 Iwiric tama tunor era.
’Jay inteꞌ awet ajcꞌupesiajir tamaren uche e mabꞌambꞌanir apater, aren cora tuaꞌ uyacta y jay bꞌan uche, cꞌumpen tacar otronyajr.
4 Y motor jay uche e mabꞌambꞌanir apater este siete veces tama inteꞌ taca día pero jay watar siete veces toit ubꞌan tuaꞌ uyaret y che: “Cꞌumpen tacaren tama tunor era, machi cꞌani insutpa inche otronyajr”, che uyaret, entonces cꞌumpen tacar siete veces ubꞌan, che e Jesús.
E cꞌotorer lo que ayan tama e cꞌupesiaj tama e Dios
5 Pues entonces ojronobꞌ e apostolobꞌ taca Cawinquirar y che:
—Non imbꞌijc taca war cacꞌupseyan tamaret coner, pero tacrenon tuaꞌ cacꞌupseyan más tamaret, chenobꞌ e apostolobꞌ era.
6 Entonces e Jesús che:
—Jay nox ayan icꞌupesiaj tamaren xeꞌ chuchu bꞌan cocha ut e mostaza xeꞌ chuchu ut ubꞌan pero xeꞌ axin achꞌiꞌ, erer icꞌampes icꞌupesiaj tuaꞌ itzacre e teꞌ era y che: “Paxqꞌuen tara, quiqui pactzꞌen macuir e jaꞌ”, y e teꞌ era tuaꞌ ucꞌupsiox, che e Jesús.
Lo que ucꞌani tuaꞌ uche inteꞌ man tuaꞌ e Dios
7 Entonces ojron e Jesús y che:
—Jay ayan inteꞌ tijam xeꞌ ayan uman xeꞌ war apatna tama e chor o xeꞌ war ucojco cora wacax, conda asutpa acꞌotoy toꞌtot ¿aware ca y che: “Ochen turen tor e mesa tuaꞌ iweꞌ?”
8 Machi, porque lo que cꞌani oꞌjron e patrón jax era: “Ustes e comida wacchetaca porque nen cꞌani inweꞌ. Conda acꞌapa incꞌuxi tunor lo que incꞌani nen, net erer iweꞌ”, che e patrón uyare uman.
9 Y conda acꞌapa aweꞌ e patrón era ¿cꞌani ca utattzꞌi uman umen que uche lo que tzacarna? Machi.
10 Y bꞌan ixto nox ubꞌan, conda acꞌapa iche tunor lo que arobꞌnox tuaꞌ iche umen e Dios, nox ucꞌani tuaꞌ iware cocha era y che: “Non manon tuaꞌ e Dios xeꞌ imbꞌijc taca cacꞌampibꞌir tut porque majax meyra war cache, ajtaca lo que arobꞌnon tuaꞌ cache war cache non”, che e Jesús.
Conda e Jesús utzꞌacpes e diez winicobꞌ
taca e sian chec
11 Pues warto axin e Jesús tama e bꞌir tuaꞌ acꞌotoy tama e chinam Jerusalem, y tamar era war unumse e departamento Samaria y e departamento Galilea.
12 Y conda war acꞌotoy tama utiꞌ inteꞌ aldea, locꞌoy tajwina umen diez winicobꞌ xeꞌ ajmuacobꞌ taca e sian chec xeꞌ ucꞌabꞌa lepra, pero machi cꞌotoyobꞌ tut e Jesús sino que
13 cay aruobꞌ taca inteꞌ nuxi nuc y chenobꞌ:
—Jesús Oo, Ajcanseyajet, yajtan coit, che e winicobꞌ era.
14 Y conda irnobꞌ umen e Jesús ojron jaxir y che:
—Quiqui irsenic ibꞌa tut e sacerdote tama e chinam Jerusalem, che e Jesús.
Y conda warto axiobꞌ tama e bꞌir cay ojri ixin e chec tutobꞌ y tzꞌacpesnobꞌ inyajrer.
15 Entonces inteꞌ tujamobꞌ cay uwira que cꞌapa ojri tunor e sian chec tut, y tamar era sutpa ixin tut e Jesús y war utattzꞌi ucꞌabꞌa e Dios taca inteꞌ nuxi nuc.
16 Y ixin cotuan tut e Jesús y pacwan esto tut e rum tuaꞌ uyajcꞌu gracias. Y e winic era tuaꞌ e departamento Samaria.
17 Entonces ojron e Jesús y che:
—¿Ma ca jax diez ani xeꞌ tzꞌacpesnobꞌ? ¿Y tiaꞌ quetpobꞌ e inmojr nueve winicobꞌ xeꞌ tzꞌacpesnobꞌ ubꞌan?
18 Ajtaca e choquem winic era xeꞌ sutpa yopa tuaꞌ utattzꞌi ucꞌabꞌa e Dios tamar lo uche tamarobꞌ. Y e inmojr nueve xeꞌ tzꞌacpesnobꞌ, ¿tiaꞌ quetpobꞌ jaxirobꞌ? che e Jesús.
19 Entonces e Jesús uyare e winic y che:
—Achpen quiqui era, porque tzꞌacpesnet umen que war icꞌupseyan tamaren, che e Jesús.
Conda watar Uyunen e winic tuaꞌ acꞌotori
tara tor e rum
Mateo 24:23-28, 36-41
20 Pues entonces e fariseobꞌ cay uyubꞌiobꞌ tuaꞌ e Jesús que tucꞌa día tuaꞌ watar Catata Dios tuaꞌ acꞌotori tara tor e rum. Y jaxir uyare y che:
—Machi tuaꞌ iwira e seña tama e día conda watar Catata Dios tuaꞌ acꞌotori tara tor e rum.
21 Mamajchi tuaꞌ oꞌjron y che: “Tara turu uchinam e Dios”, o que: “Yajaꞌ turu uchinam e Dios”, porque ya turu uchinam e Dios tiut nox, che e Jesús.
22 Entonces e Jesús uyare uyajcanuarobꞌ y che:
—Cꞌani acꞌotoy e día conda nox tuaꞌ iyusre iwiren nen xeꞌ Uyunenen e winic bꞌan cocha war iwiren coner era, pero machi tuaꞌ uyubꞌiox iwiren.
23 Y ayan tin e cꞌani ayopa tiut xeꞌ tuaꞌ uyareox cocha era y che: “Tara turu Uyunen e winic war acꞌotori tujor tunor e gente”, o que: “Yajaꞌ turu Uyunen e winic war acꞌotori.” Pero ira ixixin iwira, y nien machi tuaꞌ ixixin tupatobꞌ.
24 Porque bꞌan cocha iwira eijbꞌi ut e qꞌuin xeꞌ ujanchꞌacnes axin tunor ut e qꞌuin, bꞌan ixto tuaꞌ iwiren nen xeꞌ Uyunenen e winic conda acꞌotoy e día tuaꞌ insutpa waten otronyajr.
25 Pero era ucꞌani tuaꞌ innumse nibꞌa meyra taca e cꞌuxner y cꞌani axejbꞌna niut umen tunor e gente xeꞌ turobꞌ tara tor e rum.
26 Bꞌan cocha numuy tama e onian tiempo conda turu ani e Noé y bꞌan tuaꞌ anumuy tama e día conda cꞌani insutpa waten nen xeꞌ Uyunenen e winic otronyajr.
27 Porque tama utiempo e Noé e gente war awiobꞌ, war oychꞌiobꞌ, war anujbꞌiobꞌ, y war anujbꞌiobꞌ taca otronteꞌ, y war ubꞌijnuobꞌ que imbꞌutz tunor este que cꞌotoy e día conda e Noé ixin ochoy tama e nuxi barco, y cay cꞌaxi e jajar y cay tꞌabꞌay e jaꞌ este que bꞌutcꞌa tunor or e rum y e gente war aruobꞌ, y war anujxiobꞌ y cꞌoyobꞌ muctzꞌa ixiobꞌ chamayobꞌ.
28 Y bꞌan numuy tama e onian tiempo conda turu ani inteꞌ winic xeꞌ ucꞌabꞌa Lot; e gente war awiobꞌ, war oychꞌiobꞌ, war amanuobꞌ, war achonmobꞌ, war apacmobꞌ, y war uche uyototobꞌ.
29 Pero tama e día conda locꞌoy e Lot tama e chinam Sodoma tiaꞌ chena meyra mabꞌambꞌanir cay cꞌaxi e cꞌajc tari tut e qꞌuin taca e tun xeꞌ ayan e cꞌajc tar xeꞌ ojri tujor tunor e gente, y cꞌapa puruy chamay tunorobꞌ.
30 Y bꞌan ixto tuaꞌ anumuy tama tunor e gente tama tunor or e rum conda acꞌotoy e día conda inchecta waten nen xeꞌ Uyunenen e winic otronyajr.
31 ’Y tama e día yajaꞌ tunor e gente ucꞌani tuaꞌ alocꞌoy aꞌjni tut e nuxi qꞌuijnar xeꞌ tuaꞌ watar tama ujorobꞌ. Y tamar era jay ayan inteꞌ winic xeꞌ war apatna tujor uyotot machix tuaꞌ ecmay oꞌchoy tama uyotot tuaꞌ ulocse lo que ayan macu. Y jay ayan inteꞌ winic xeꞌ war apatna tama uchor machix tuaꞌ asutpa acꞌotoy tama uyotot.
32 Bꞌijnunic tamar uwixcar e Lot xeꞌ motor que arobꞌna tuaꞌ alocꞌoy aꞌjni y que machi ani tuaꞌ asutpa achꞌujcsan tupat, pero cocha bꞌan uche jaxir sutpa tun y atzꞌam y chamay.
33 Tin e cꞌani ucorpes ucuxtar axin asatpa, pero tin e axin usati ucuxtar cꞌani acorpesna.
34 Cꞌani inwareox era que tama e acbꞌar yajaꞌ bꞌajcꞌat chꞌar chateꞌ gente tama inteꞌ chꞌacteꞌ, inteꞌ tuaꞌ aqꞌuejcha axin tut e qꞌuin y inteꞌ tuaꞌ aquetpa.
35 Bꞌajcꞌat chateꞌ ixictac war oychꞌuobꞌ, inteꞌ tuaꞌ aqꞌuejcha axin tut e qꞌuin, y inteꞌ aquetpa.
36 Bꞌajcꞌat war apatnobꞌ chateꞌ winicobꞌ tama inteꞌ chor, inteꞌ tuaꞌ aqꞌuejcha axin tut e qꞌuin, y inteꞌ aquetpa, che e Jesús.
37 Pero conda uyajcanuarobꞌ uyubꞌiobꞌ tunor era, upejcobꞌ Cawinquirar y che:
—¿Y tiaꞌ tuaꞌ anumuy tunor era? che uyajcanuarobꞌ.
Y jaxir che:
—Cꞌani anumuy tunor era bꞌan cocha e ojroner tama e usij, que tiaꞌ chꞌar inteꞌ chamen, y ya war umorojse ubꞌobꞌ e sian usij, che e Jesús.