19
Conda e Jesús canseyan tama tin e cꞌani utijres unujbꞌiar
Marcos 10:1-12; Lucas 16:18
1 Pues conda cꞌapa ojron e Jesús tama tunor era locꞌoy tama e departamento Galilea y ixin esto tama e departamento Judea y esto tama einxejr lugar xeꞌ turu tuyejtzꞌer e xucur Jordán tiaꞌ atobꞌoy watar e qꞌuin.
2 Y meyra sian gente cay xanobꞌ tupat y jaxir cay utzꞌacpes tunor tin e ajmuac.
3 Entonces cꞌotoyobꞌ cora fariseobꞌ xeꞌ war usicbꞌobꞌ cocha tuaꞌ umajresobꞌ e Jesús tuaꞌ uyubꞌi utuchꞌiobꞌ tut e ley, y tamar era cay uyubꞌiobꞌ tuaꞌ y chenobꞌ:
—¿Uyajcꞌon ca lugar uley e Moisés tuaꞌ catijres canujbꞌiar motor que matucꞌa war uche cawixcar? che e fariseobꞌ era.
4 Y che e Jesús:
—¿Machi ca iche leer tama uyojroner e Dios que tama ucajyesnibꞌir or e rum conda wartocto achena tunor era umen e Dios que jaxir uche inteꞌ winic y inteꞌ ixic?
5 Y che jaxir: “Y tamar era inteꞌ winic ucꞌani tuaꞌ uyacta utuꞌ y utata tuaꞌ axin uchꞌami uwixcar, y conda uchꞌami ubꞌobꞌ aquetpobꞌ intera”, che e Dios.
6 Y tamar era mixto jax chateꞌ yaꞌ sino que aquetpobꞌ intera taca. Y tamar era lo que e Dios unutꞌi ma erer atijresna umen inteꞌ winic, che e Jesús.
7 Y de allí e fariseobꞌ cay uyubꞌiobꞌ tuaꞌ otronyajr y chenobꞌ:
—Y jay bꞌan, entonces ¿tucꞌa tuaꞌ uyareon e Moisés que: “Tin e cꞌani uyacta uwixcar tuaꞌ utijres unujbꞌiar ucꞌani tuaꞌ uyajcꞌu inteꞌ jun xeꞌ che que tijresbꞌir e nujbꞌiar era”, y tamar era erer uyacta inyajrer? che e fariseobꞌ era.
8 Y e Jesús che:
—Umen taca que nox machi cꞌani iwacta ibꞌa tuaꞌ ixarobꞌna umen e Dios tucꞌa tuaꞌ iche y tamar taca era e Moisés ixin uyareox que erer itijres inujbꞌiar. Pero tama ucajyesnibꞌir tunor era ma ani jax bꞌan.
9 Y cꞌani inwareox era que tin e axin uyacta uwixcar tuaꞌ utijres unujbꞌiar y asutpa anujbꞌi taca otronteꞌ war acꞌaxi tama e mabꞌambꞌanir. Pero jay uwixcar inteꞌ war axana taca otronteꞌ winic erer ani uyacta, che e Jesús.
10 Entonces arobꞌna umen uyajcanuarobꞌ y chenobꞌ:
—Jay unatanic ani que bꞌan tuaꞌ unumse ubꞌa inteꞌ winic más ani bueno tuaꞌ machi anujbꞌi, che uyajcanuarobꞌ.
11 Y che e Jesús:
—Majax tunor e winicobꞌ xeꞌ erer uchꞌamiobꞌ e ojroner era tuaꞌ aturuanobꞌ ubꞌajner sino que ajtaca tin e ajcꞌunobꞌ umen e Dios tuaꞌ aquetpobꞌ ubꞌajner que erer uchꞌamiobꞌ e ojroner era.
12 Ayan e winicobꞌ xeꞌ cuxpobꞌ tacar lo que ayan tamarobꞌ que machi uyusre tuaꞌ anujbꞌiobꞌ. Y ayan e winicobꞌ xeꞌ machi cꞌani anujbꞌiobꞌ umen que chichbꞌana umen uyet winiquirobꞌ. Y ayan e winicobꞌ xeꞌ ubꞌijnuobꞌ que machi cꞌani anujbꞌiobꞌ tuaꞌ erer uturbꞌa ubꞌobꞌ más tama e Dios tuaꞌ utacre e gente oꞌchoyobꞌ tama uchinam e Dios. Pues tin e erer uchꞌami e ojroner era, uchꞌamic, che e Jesús.
Conda e Jesús uchojbꞌes ut e maxtac
Marcos 10:13-16; Lucas 18:15-17
13 Pues ayan tin e cay utaresobꞌ cora maxtacobꞌ tut e Jesús tuaꞌ erer upacbꞌu ucꞌabꞌ tamarobꞌ tuaꞌ ucꞌajti taca e Dios tamarobꞌ. Pero uyajcanuarobꞌ cay ucꞌayobꞌ tin e war utares e maxtacobꞌ era.
14 Pero e Jesús uyare uyajcanuarobꞌ y che:
—Actanic ayopobꞌ taniut tunor e maxtac y ira iquete iwabꞌuobꞌ, porque tunor tin e axin acꞌupseyanobꞌ tamaren bꞌan cocha war uchiobꞌ e maxtacobꞌ era cꞌani oꞌchoyobꞌ tama uchinam e Dios, che e Jesús.
15 Entonces upacbꞌu ucꞌabꞌ tujor e maxtacobꞌ y de allí locꞌoy tama e lugar era.
Conda inteꞌ chꞌom sitz xeꞌ meyra ayan utumin ojron taca e Jesús
Marcos 10:17-31; Lucas 18:18-30
16 Pues ayan inteꞌ chꞌom sitz xeꞌ meyra ayan utumin xeꞌ cꞌotoy tuyejtzꞌer e Jesús xeꞌ cay uyubꞌi tuaꞌ y che:
—Niwajcanseyajet xeꞌ erachet, ¿tucꞌa erer inche xeꞌ imbꞌutz tuaꞌ erer inchꞌami e cuxtar xeꞌ machi tuaꞌ acꞌapa? che e chꞌom sitz era.
17 Y che e Jesús:
—Net war awaren que erachen. Pero jax taca e Dios xeꞌ erach. Y tamar era war awaren que Diosen nen ubꞌan. Pero jay cꞌani achꞌami e cuxtar xeꞌ machi tuaꞌ acꞌapa, ucꞌani tuaꞌ icꞌupseyan tut uley e Moisés, che e Jesús.
18 Y che e chꞌom sitz:
—¿Y tucꞌa ojroner xeꞌ chꞌar tzꞌijbꞌabꞌir umen e Moisés que ucꞌanto tuaꞌ incꞌupseyan tut? che e chꞌom sitz.
Y che e Jesús:
—Ira ichamsan, ira iꞌxin taca inteꞌ ajnajtir ixic, ira ixujchꞌian, ira imajresian,
19 cꞌupsen atata y atuꞌ, y yajtan ut apiarobꞌ bꞌan cocha acꞌani tuaꞌ ayajtanwa oit umen apiarobꞌ era, che e Jesús.
20 Y che e chꞌom sitz:
—Inchix tunor era desde chuchuento. ¿Tucꞌa más ucꞌani tuaꞌ inche? che e chꞌom sitz.
21 Y che e Jesús:
—Jay acꞌani tuaꞌ aquetpa erach tunor awirnar quiqui chono lo que ayan tabꞌa y ajcꞌun tin e tzajtaca ut. Y tamar era axin aquetpa meyra atuanibꞌir tichan tut e qꞌuin, y de allí lar incoꞌ tacaren, che e Jesús.
22 Pero conda e chꞌom sitz uyubꞌi tunor era quetpa tzajtaca uwirnar porque jaxir meyra ayan lo que ayan tuaꞌ.
23 Entonces e Jesús uyare uyajcanuarobꞌ y che:
—Cꞌani inwareox era que intran tuaꞌ oꞌchoyobꞌ tama uchinam e Dios tin e ayan meyra utumin.
24 Pues cꞌani inwareox otronyajr que más ani uyubꞌi oꞌchoy inteꞌ nuxi arac xeꞌ ucꞌabꞌa camello tama uchꞌenar inteꞌ aguja, pero más intran tuaꞌ oꞌchoy tama uchinam e Dios inteꞌ xeꞌ meyra war ucojco tama utumin xeꞌ meyra ayan tuaꞌ, che e Jesús.
25 Pues conda uyajcanuarobꞌ uyubꞌiobꞌ tunor e ojroner era cay bꞌactobꞌ y cay ojronobꞌ jaxobꞌ taca y chenobꞌ:
—Y jay inteꞌ xeꞌ meyra ayan utumin cocha era machi uyubꞌi acorpesna, ¿chi tuaꞌ acorpesna? che uyajcanuarobꞌ.
26 Entonces e Jesús uchꞌujcu uwira utobꞌ y che:
—Mamajchi tuaꞌ acorpesna tamar taca utumin, pero tunor era intran tut e winicobꞌ. Pero tut Cadiosir matucꞌa intran tuaꞌ uche, che e Jesús.
27 Entonces che e Pedro:
—Niwinquiraret, non era cꞌapa cawacta tunor lo que ayan ticabꞌa tuaꞌ caxin tacaret. ¿Y tucꞌa tuanibꞌir tuaꞌ cachꞌami non? che e Pedro.
28 Y che e Jesús:
—Cꞌani inwareox era lo que tuaꞌ ichꞌami nox xeꞌ cay xanox tacaren, porque tama e tiempo xeꞌ watar conda achecta or e rum xeꞌ imbꞌutz conda nen xeꞌ Uyunenen e winic incay inturuan tor niturtar xeꞌ ayan meyra utawarer, nox tuaꞌ ixturuan tama e doce turtar xeꞌ tuaꞌ aquetpa tibꞌa. Y tamar era nox tuaꞌ iche juzgar tunor e doce grupo gente lo que ayan tama e Israel.
29 Y tunor tin e axin uyacta lo que ayan tuaꞌ bꞌan cocha inteꞌ uyotot, o usacunobꞌ, o uwijtzꞌinobꞌ, o uwijtanobꞌ, o utuꞌ, o utata, o uwixcar, o umaxtac, o ucꞌopot tuaꞌ taca uche lo que ucꞌani e Dios cocha war iche nox era, cꞌani uchꞌamiobꞌ cien veces lo que uyactobꞌ era bꞌan cocha inteꞌ utuanibꞌir, y de allí cꞌani uchꞌamiobꞌ e cuxtar xeꞌ machi tuaꞌ acꞌapa.
30 Y tama e tiempo xeꞌ watar era tin e nuxi winic tara tor e rum cꞌani aquetpa inteꞌ xeꞌ majax nuxi winic yajaꞌ, y tin e majax nuxi winic tara axin aquetpa inteꞌ nuxi winic yajaꞌ, che e Jesús.