A Ch'an̈ Libro
JOB
Job sb'i jun libro tic, yujto a d'ay tz'ib'ab'ilcan yab'ixal jun vin̈ scuchan Job. A vin̈aj Job chi' te vach' sb'eyb'al vin̈, te b'eyum pax vin̈, man̈ jantacoc yuninal vin̈ yed' yisil, nivan yelc'och vin̈ d'a scal eb' sc'ab'yoc. Palta axo ix aji, ix javi juntzan̈ nivac yaelal d'a yib'an̈ vin̈. Junn̈ej c'ual ix lajviel masanil tastac ay d'a vin̈. Ix laj cham eb' yuninal vin̈ yed' eb' ix yisil chi'. Ix lajvi chi' ix och val jun yab'il d'a snivanil vin̈, aton tic syalcot capítulo 1 yed' 2.
Axo d'a capítulo 3 masanto d'a capítulo 37, syalcot tas ix aj stelan sb'a vin̈aj Job yed' juntzan̈ eb' vin̈ yamigo. A snaan juntzan̈ eb' vin̈ yamigo vin̈ chi' to sc'och eb' vin̈ yac' snivanil sc'ol vin̈, palta axo ix aji ton̈ej stelaj sb'a eb' vin̈ yed' vin̈. A snaan eb' vin̈ yamigo vin̈ chi' to yuj smul vin̈ sjavi juntzan̈ yaelal d'a yib'an̈ vin̈ yuj Dios. Palta ix yalan vin̈ to vach' sb'eyb'al vin̈, te tojol spensar vin̈. Max schalaj yab' eb' vin̈ yamigo vin̈ chi', a yalan eb' vin̈ to ay val smul vin̈ sc'ub'ejeli.
Yuj chi' stec'b'ej val sb'a vin̈aj Job chi' yalani to man̈ yujoc smul vin̈ icha chi' sjavi d'a yib'an̈ vin̈. Ix sc'anan vin̈ d'a Dios to syab' tas syal vin̈, yujto man̈ smojoc tz'ac'ji juntzan̈ yaelal chi' d'a vin̈. Yuj chi' snib'ej vin̈ to sch'oxel Dios d'a yichan̈ eb' anima, to yel vach' sb'eyb'al vin̈, ayn̈ejoch sc'ol vin̈ d'a Dios. Axo ix aji, ix lolon Dios d'a vin̈, ix syamanoch sc'anb'an juntzan̈ tastac d'a vin̈, yic syojtaquejel vin̈ to te ay spoder Dios, te jelan, tojol syutej sch'olb'itan yaln̈ej tastac. Ata' ix nachajel yuj vin̈ to ay juntzan̈ tas ya ix yal vin̈ d'a Dios. A d'a capítulo 38 versículo 1 masanto d'a capítulo 42 versículo 6 tz'ilchaj juntzan̈ tic.
Axo d'a capítulo 42 versículo 7 masanto d'a versículo 17, ata' syalcoti to ix sna sb'a vin̈aj Job chi' yuj tas ix yala', ix b'oxi pax sc'ol vin̈. Man̈xo jantacoc tastac ix ajxi d'a vin̈, ec'b'alto pax ix ajxi d'a yichan̈ juntzan̈ satnaquel d'a vin̈ chi'. Ix tumaj juntzan̈ eb' vin̈ yamigo vin̈ chi' yuj Dios, yujto maj nachajel yuj eb' vin̈ tas yuj sjavi juntzan̈ nivac yaelal d'a yib'an̈ vin̈. Palta a vin̈aj Job chi' yojtac vin̈ sic'lab'il to te nivan yelc'och Dios d'a yib'an̈ masanil sc'ayb'ub'al eb' anima sc'ayb'ej d'a yol yico'.
1
A yaelal ix javi d'a yib'an̈ vin̈aj Job
1 A d'a yol smacb'en Uz ec'nac jun vin̈ vinac scuchan Job. Te tojol spensar vin̈, te vach' sb'eyb'al vin̈, te ay yelc'och Dios d'a sat vin̈. Sya'ilej val sb'a vin̈, max yac'och sb'a vin̈ d'a scal chucal.
2 A vin̈aj Job chi' ay ucvan̈ yuninal vin̈ yed' oxvan̈ yisil.
3 Ay 7 mil noc' scalnel vin̈, 3 mil noc' scamello vin̈, 500 moj noc' vacax smunlaji yed' 500 noc' b'uru. Man̈ jantacoc eb' schecab' vin̈. An̈ej val vin̈ te b'eyum d'a yichan̈ eb' cajan d'a stojolal b'aj sjavi c'u.
4 A eb' vin̈ yuninal vin̈ chi', c'ajan eb' vin̈ yoch q'uin̈ d'a spat junjun. Stzolal yec' q'uin̈ chi' d'a eb' vin̈, syavtan eb' ix oxvan̈ yanab' eb' vin̈ chi' vael yed'oc.
5 Ayic slajvi yec'chaj q'uin̈ chi' d'a eb' vin̈ d'a stzolal, tz'avtajcot eb' vin̈ yuj vin̈aj Job chi'. Ac'valto sq'ue vaan vin̈, sn̈usan silab' vin̈ yuj junjun eb' vin̈, yic sacb'itan sb'a eb' vin̈ d'a sat Dios, talaj tz'och smul eb' vin̈, syalan chuc eb' vin̈ d'a Dios d'a spensar snaan vin̈. Icha chi' sc'ulej vin̈ d'a juntac el.
Ix stelaj sb'a Dios yed' vin̈ Satanás
6 Ay jun c'u ix smolb'ej sb'a eb' ángel tz'ac'an servil Jehová d'a yichan̈ d'a satchaan̈. A d'a scal eb' chi', ix c'ochpax jun ángel ajc'ool, aton vin̈ Satanás.
7 Ix sc'anb'an Jehová d'a vin̈ Satanás chi' icha tic:
—¿B'ajtil ach coti? xchi. Ix yalan vin̈:
—In cot d'a yolyib'an̈q'uinal, yujto tzec' voymitej lum smasanil, xchi vin̈.
8 Ix yalanxi Jehová d'a vin̈ icha tic:
—¿Tzam il tas yaj vin̈ in checab' aj Job? Malaj junocxo mach d'a yolyib'an̈q'uinal icha vin̈ chi', te tojol spensar vin̈, te vach' sb'eyb'al vin̈, ay velc'och d'a yol sat vin̈, sya'ilej val sb'a vin̈, max yac'och sb'a vin̈ d'a scal chucal, xchi Jehová chi'.
9 Ix tac'vi vin̈ Satanás chi' icha tic:
—Man̈ nab'an̈ejoc vach' syutej sb'a vin̈ d'a ichan̈.
10 Yujto max yal a c'ol to ay junoc mach tz'ic'anec' junoc tas d'a vin̈, ma tastac ay d'a yol spat vin̈ yed' masanil tastac ay d'a vin̈. A ach tzac'n̈ej a vach'c'olal d'a yib'an̈ masanil tastac sc'ulej vin̈, yuj chi' ec'b'al sb'isul noc' smolb'etzal noc' vin̈ yed' sb'eyumal.
11 Palta q'uinaloc a ticnaic tziq'uec' masanil tas ay d'a vin̈ chi', ol ilani tato man̈ ol yal chuc vin̈ d'ayach, xchi vin̈.
12 Ix tac'vi Jehová d'a vin̈ icha tic:
—Ichocab' ta', ol xo ila' tas tza c'ulej yed' masanil tastac ay d'a vin̈ chi', an̈ej to malaj tas tzutej snivanil vin̈, xchi.
Ix lajvi chi' ix el vin̈ Satanás chi' d'a yichan̈ Jehová.
13 Ay jun c'u, ayic van sva eb' vin̈ yuninal yed' eb' ix yisil vin̈aj Job chi' d'a spat vin̈ b'ab'el vinac,
14 ix javi jun vin̈ checab' b'aj ayec' vin̈aj Job chi', ix yalan vin̈ icha tic:
—Van co munlaj yed' noc' vacax, axo noc' b'uru van sva noc' d'a co lac'anil chi'.
15 Axo ix aji, ix javi eb' vin̈ sabeo, ix miljicancham eb' vin̈ munlajvum chi' yuj eb' vin̈. Ix yelc'anb'at noc' vacax chi' eb' vin̈. A inxon̈ej ix yal vel lemnajoc yic tzul valan ab'i, xchi vin̈.
16 Manto val lajvilaj yalan jun vin̈ chi', ix javi junxo vin̈, ix yalan vin̈ icha tic:
—Ix cot c'ac' d'a satchaan̈ yuj Dios, ix cham masanil eb' vin̈ tan̈vum calnel yed' noc' calnel chi'. A inxon̈ej ix yal vel lemnajoc yic tzul valan ab'i, xchi vin̈.
17 Manto val lajvilaj yalan junxo vin̈ chi', ix javi junxo vin̈ yoxil, ix yalan vin̈ icha tic:
—A eb' vin̈ caldeo, ox macan̈ val ix aj eb' vin̈ yac'an oval d'ayon̈. Ix smilancham masanil eb' vin̈ stan̈van noc' a camello eb' vin̈, ix yelc'anb'at noc' eb' vin̈. A inxon̈ej ix yal vel lemnajoc yic tzul valan ab'i, xchi vin̈.
18 Manto val lajvilaj yalan junxo vin̈ chi', ix javi junxo vin̈, ix yalan vin̈ icha tic:
—A eb' vin̈ uninal yed' eb' ix isil, van sva eb', syuc'an vino eb' d'a spat vin̈ b'ab'el uninal,
19 axo ix aji, ix javi jun tzijtumal ic' d'a stojolal lum taquin̈ luum. Ix em lan̈naj spat eb' uninal chi' d'a yib'an̈ yuj jun ic' chi', ix cham eb' smasanil. A inxon̈ej ix yal vel lemnajoc yic tzul valan ab'i, xchi vin̈.
20 Yuj chi' ix q'ue vaan vin̈aj Job chi', ix te cus vin̈ sic'lab'il. Ix sn̈ic'chitan spichul vin̈, ix stzucanel xil sjolom vin̈, ix em n̈ojan vin̈ ejmelal d'a Dios.
21 Ix yalan vin̈ icha tic:
—Malaj jab'oc tas ved'nac in alji d'a yolyib'an̈q'uinal tic, malaj pax jab'oc tas ol vic'b'ati ayic ol in meltzajxoc. A Jehová ix ac'an masanil tas d'ayin, an̈eja' pax tz'ic'anxieq'ui. Alchajocab' vach' lolonel d'ay, xchi vin̈.
22 Vach'chom nivan yaelal ix ec' d'a yib'an̈ vin̈aj Job chi', palta maj ochlaj smul vin̈ yujto maj yal-laj chucal vin̈ d'a spatic Dios yuj tas ix utaj chi'.