☰ EFESIOS 1
Ri carta ri xutz'ibaj ri apóstol San Pablo chique ri kach'alal ri ec'o pan Éfeso
1
Ri Pablo nuchop tzij
1 Yin Pablo, ru-apóstol ri Jesucristo roma jari' ri rurayibel ri Dios. Y ninben c'a el re carta re' chive rix lok'olej tak vach'alal, ri ixc'o pa tinamit Éfeso; rix ri can cukul-vi ic'u'x* riq'uin ri Cristo Jesús. 2 Y ja ta c'a ri utzil y ri uxlanen ri petenek riq'uin ri Katata' Dios y ri Ajaf Jesucristo xtic'oje' pa tak ivánima† chi'ivonojel.
Roma jun kabanon riq'uin ri Cristo, ri Dios nuya' ronojel rutzil chike
3 Tikaya' c'a ruk'ij ri Dios,‡ ri Rutata' ri Kajaf Jesucristo. Y roma jun kabanon riq'uin ri Cristo, ri Dios nuya' ronojel utzil richin chila' chicaj chike. 4 Jari' ri nuya' chike roma xojrucha'. Tok man jani c'o ta re ruvach'ulef jari' tok xuch'ob yan chi yojrucha'.§ Xojrucha' roma ri Cristo; queri' xuben ri Dios roma nrajo' chi oj ch'ajch'oj ta chuvech rija'.* Y man jun ta etzelal c'o pa tak kac'aslen. 5 Can roma c'a ri ajovabel ri c'o riq'uin ri Dios romari' tok xojrucha' richin xojoc ralc'ual.† Can ja vi c'a ri' ri rurayibel,‡ chi ri Jesucristo nuben chike chi yojoc ralc'ual rija'. 6 Ri Dios can janíla vi nrajo' ri Ruc'ajol, y roma roj can jun c'a kabanon riq'uin ri Ruc'ajol rija', can nim vi c'a ri rutzil ri ruyo'on chike.§ Y xojrucha' c'a roma nrajo' chi nikaya' ruk'ij-ruc'ojlen* roma ri utzil ri kac'ulun riq'uin. 7 Ri Ruc'ajol xquen (xcom) koma roj y xbiyin ruquiq'uel richin xutoj y xucuy ri kamac.† Jebel c'a nik'alajin ri nimalej rutzil ri Dios; roma xutek-pe ri Cristo chikacolic. 8 Y chuka' ri nimalej rutzil ri Dios nik'alajin, roma nuya' q'uiy etamabel chike y nuya' chuka' q'uiy kana'oj.‡ 9 Can xuk'alajirisaj-vi c'a chikavech ri man jun bey k'alajirisan ta jebel;§ y re' can pa ránima vi rija' xpe-vi. Re' can rurayibel vi c'a rija' y can que vi ri' ruch'obon chi nuben.* 10 Rija' ruch'obon-pe chi chupan re ruq'uisibel tiempo richin re ruvach'ulef xtuya' ronojel pa ruk'a' ri Cristo.† Ronojel ri c'o chila' chicaj y ronojel ri c'o vave' chuvech re ruvach'ulef xqueruya' pa ruk'a'. Y xa jun xtiquiben pa ruk'a'.
11 Can roma vi c'a ri Cristo tok c'o kichinan‡ roj ri oj cha'on roma ri Dios. Xojrucha' roma jari' ri ruch'obon chi nuben; can ronojel vi c'a ri ruch'obon chi nuben, can ja vi ri' ri rurayibel.§ 12 Xojrucha'* roma nrajo' chi koma roj ninimirisex rubi' y nuc'ul ruk'ij-ruc'ojlen. Queri' nrajo' chike roj ri can pa nabey koyoben-pe ri utzil ri xtuya' ri Cristo chike. 13 Y rix chuka' xivac'axaj ri ruch'abel ri Dios. Can kitzij vi c'a ri ch'abel ri xivac'axaj, y ja utzilej ch'abel ri' ri xc'amon-pe colotajic chive. Rix xinimaj c'a ri Cristo, y ri Dios xuya' ri Lok'olej Espíritu chive,† roma queri' rubin-pe. Y ri Lok'olej Espíritu retal chi ix richin chic ri Dios. 14 Y roma ri Lok'olej Espíritu c'o kiq'uin,‡ cukul kac'u'x chi c'o más xtikichinaj chila' chicaj. Ri Lok'olej Espíritu can xtic'oje-vi c'a kiq'uin c'a tok xkojcolotej-el chuvech ri mac, roj ri oj richin chic ri Dios. Y nic'oje' c'a kiq'uin richin chi koma roj ri Dios ninimirisex rubi' y nuc'ul ruk'ij-ruc'ojlen.
Ri Pablo nuc'utuj chi ri Dios nuya' ta etamabel chique ri kach'alal aj-Éfeso
15 Yin vac'axan chi rix can cukul-vi ic'u'x riq'uin ri Ajaf Jesús. Y chuka' vac'axan chi janíla ye'ivajo' conojel ri ch'aka' chic lok'olej tak kach'alal.§ 16 Y romari' benek-ruvech yimatioxin* chire ri Dios ivoma rix roma q'uiy utzil ic'ulun chire ri Dios, y chuka' jari' tok ninben orar ivoma: 17 Ninc'utuj chire ri Dios chi ri Lok'olej Espíritu ri niyo'on ri na'oj, can ta xtuya' pa ruq'uiyal chive.† Ri Lok'olej Espíritu q'uiy ta xtuk'alajirisaj chivech roma ivetaman ruvech ri Dios. Jare' ri ninc'utuj chire ri Tata'ixel ri c'o ruk'ij-ruc'ojlen; ri Dios ri richin ri Kajaf Jesucristo. 18 Ninc'utuj c'a chire ri Dios chi tusakirisaj más ri inojibal. Queri' ninc'utuj roma ninvajo' chi nik'ax ta chivech ri utzil ri koyoben. Y can ja ri Dios ri xojoyon, richin chi nikoyobej ri utzil ri'. Ninc'utuj c'a roma ninvajo' chi nik'ax chivech chi ri xtekichinaj‡ chila' chicaj yalan utz y yalan jebel. Y can xtekichinaj-vi quiq'uin conojel ri lok'olej tak kach'alal. 19 Ninc'utuj c'a chuka' roma ninvajo' chi rix xtik'ax ta chivech chi can janíla nim ri ruchuk'a'§ ri Dios c'o kiq'uin roj ri kaniman. Ri ruchuk'a' ri c'o kiq'uin roj junan riq'uin ri ruchuk'a' ri xrucusaj 20 tok xuc'asoj* ri Cristo chiquicojol ri caminaki' y xuben chire chi xbetz'uye' chila' chicaj pa rajquik'a' rija'.† 21 Ri Cristo xban c'a chire chi ja rija' ri más nim que chiquivech ri ángeles.‡ Más nim que chiquivech ri k'atoy tak tzij, y ri ch'aka' chic ri c'o uchuk'a' pa quik'a' y ri c'o janíla quik'ij.§ Rija' más nim chiquivech conojel;* man xe ta chupan re tiempo re', xa can que chuka' ri' chupan ri tiempo petenek. 22 Ri Dios xuya' ronojel pa ruk'a' ri Cristo,† y can ja vi c'a rija' ri xoc jolomaj (vi'aj) pa kavi' konojel roj ri kaniman, ri nibix iglesia chike. 23 Can ja vi c'a roj ri oj oquinek ruch'acul rija'. Can jun chic kabanon riq'uin.‡ Xaxe re quere' tz'aket kabanon. Rija' can ronojel c'a lugar c'o-vi, y runojisan ronojel.
* 1:1 Col. 1:2. † 1:2 Tit. 1:4. ‡ 1:3 Sal. 72:17. § 1:4 1 P. 1:2. * 1:4 Lc. 1:75; 1 P. 1:20. † 1:5 Jn. 1:12; Ro. 8:29. ‡ 1:5 Lc. 12:32. § 1:6 Ro. 3:24. * 1:6 Is. 43:21. † 1:7 Ro. 3:24; He. 9:12. ‡ 1:8 Col. 2:3. § 1:9 Col. 1:26. * 1:9 2 Ti. 1:9. † 1:10 Ef. 1:22. ‡ 1:11 Ro. 8:17. § 1:11 Is. 46:10. * 1:12 2 Ts. 2:13. † 1:13 Jl. 2:28; 2 Co. 1:22. ‡ 1:14 Hch. 20:28; Ro. 8:23; 2 Co. 5:5. § 1:15 Col. 1:3, 4. * 1:16 Ro. 1:8. † 1:17 Col. 1:9. ‡ 1:18 Hch, 26:18. § 1:19 Col. 1:29. * 1:20 Hch. 2:24. † 1:20 Sal. 110:1; Col. 3:1. ‡ 1:21 He. 1:4. § 1:21 Col. 2:10. * 1:21 Fil. 2:9. † 1:22 Mt. 28:18; He. 2:7. ‡ 1:23 Ro. 12:5.
☰