Ri C'ac'ac' Testamento pa Kach'abel 1 JUAN 2

Ri Jesucristo nuc'utuj utzil pa kacuenta riyoj chuwech ri Dios

1 Wach'alal, riyix ri can yix achi'el tak walc'ual, ntz'ibaj c'a el ronojel re' chiwe riche (rixin) chi queri' ma quixmacun ta chic. Pero wi c'o jun chiwe ri xtimacun, c'o Jun* ri nic'utun utzil chare ri Tata'ixel riche (rixin) chi nicuyutej kamac. Y ri Jun ri' ya ri Jesucristo, ri can choj wi. 2 Ya Riya' ri xcamisex kuma, riche (rixin) chi nicuyutej ri kamac.† Y ma xu (xe) ta wi ruma ri kamac riyoj, xa can ruma chuka' quimac quinojel‡ ri winek ri yec'o chuwech re ruwach'ulef.

3 Y wi riyoj nikaben§ ri nubij ri rupixa' ri Dios, can nik'alajin c'a chi ketaman chic ruwech Riya'. 4 Wi c'o jun ri nibin: Riyin wetaman ruwech ri Dios, nicha', pero wi xa ma nuben ta ri nubij ri rupixa' ri Dios, ri nibin queri' can jun aj tz'ucuy tzij,* y ri kitzij xa man c'o ta pa ránima ri winek ri'. 5 Yac'a ri winek ri nuben ri nubij ri rupixa' ri Dios, kitzij chi can tz'aket ri ajowabel riche (rixin) ri Dios c'o riq'ui. Y wi queri' nikaben, ketaman chi xa jun chic kabanon riq'ui Riya'.† 6 Y wi c'o jun nibin chi xa jun chic rubanon riq'ui ri Jesucristo, c'o chi nuc'uaj jun c'aslen achi'el ri c'aslen ri xuc'uaj ri Jesucristo.‡

Ri rubanic ri c'ac'ac' pixa'

7 Wach'alal, riyin ma ntz'ibaj ta c'a jun c'ac'ac' pixa' chiwe.§ Ruma re pixa' re' xa can c'o chic ri ojer ca, y re ch'abel re' can xiwac'axaj yan pe riyix ri pa rutiquiribel tek xinimaj ri Dios. 8 Pero ma riq'ui wi ri', riyin nbij chi re pixa' re' c'ac'ac'* chiwe riyix. Ruma ma jane ojer ta tik'alajsex ca ruma ri Jesucristo. Y xa c'a juba' tinimaj riyix. Y ma jane ojer ta chuka' tuchop chi niq'uis el ri k'eku'm y queri' chuka' ma jane ojer ta tuchop nisakirisan ri kitzij sakil.†

9 Pero wi c'o jun ri nibin chi c'o pa sakil, y xa nretzelaj ri rach'alal, nik'alajin chi xa c'a c'o na pa k'eku'm. 10 Y ri jun ri can nrajo' ri rach'alal, can c'o c'a pa sakil, y majun c'a ri xtibano chare chi nitzak ta pa mac.‡ 11 Yac'a ri netzelan ri rach'alal, can pa k'eku'm c'a c'o wi, y can chupan c'a ri' nibiyin wi. Y ma retaman ta acuchi (achique) benak wi,§ ruma ya ri k'eku'm ri banayon chare chi moyirnek.

12 Riyix ri achi'el tak walc'ual, ntz'ibaj ronojel re' chiwe, ruma riq'ui ri xuben ri Jesucristo, wacami cuyutajnek chic ri imac.* 13 Riyix ri can yix tata'aj chic, ntz'ibaj ronojel re' chiwe ruma iwetaman chic ruwech ri Cristo ri can c'o chic pe† tek ma jane c'o ta re ruwach'ulef. Y riyix c'ajola' ntz'ibaj re' chiwe ruma yix ch'aconek chic chrij ri itzel winek. Y riyix ri achi'el tak walc'ual, ntz'ibaj chuka' chiwe ruma iwetaman chic ruwech ri Tata'ixel. 14 Riyix ri can yix tata'aj chic, ntz'ibaj c'a chiwe ruma can iwetaman wi chic ruwech ri Cristo ri can c'o chic pe tek c'a ma jane c'o ta re ruwach'ulef. Riyix c'ajola' ntz'ibaj c'a chiwe ruma c'o iwuchuk'a',‡ y ri ruch'abel ri Dios c'o pa tak iwánima,§ y can yix ch'aconek wi chrij ri itzel winek.

15 Y chiwe iwonojel nbij wi: Man c'a tibe ta iwánima chrij re ruwach'ulef, ni chrij ronojel ri ye riche (rixin) re ruwach'ulef. Ruma wi xtibe iwánima chrij re ruwach'ulef,* nik'alajin chi xa ma niwajo' ta ri Tata'ixel. 16 Ruma ronojel ri c'o chuwech re ruwach'ulef, xa ya ri itzel tak raybel riche (rixin) ri ch'aculaj, ri itzel tak raybel riche (rixin) ri runak' tak kawech, y ri nikanimirisaj ki'. Y ronojel ri' xa ma riche (rixin) ta ri Katata' Dios, xa ye riche (rixin) re ruwach'ulef. 17 Y re ruwach'ulef xa xtik'ax, y chuka' ronojel ri itzel tak raynic riche (rixin) re ruwach'ulef xa xtiq'uis. Yac'a ri winek ri can nuben ri ruraybel ri Dios, can xtic'oje' ruc'aslen riche (rixin) xtibe k'ij xtibe sek.†

Ri ye'etzelan riche (rixin) ri Cristo

18 Riyix ri can yix achi'el tak walc'ual, yojc'o chic c'a chupan ri ruq'uisbel tak k'ij.‡ Y riyix iwac'axan chic chi xtipe jun k'olonel ri netzelan riche (rixin) ri Cristo§ y nuben chi can ya riya' ri Cristo. Y wacami ye q'uiy chic ri ye queri'. Y rumari' ketaman chic chi yojc'o chupan ri ruq'uisbel tak k'ij. 19 Xec'oje' kiq'ui, pero ma ye kachibil ta. Ruma wi ta ye kachibil, can ta xec'oje' kiq'ui jurayil. Y xe'el c'a el kiq'ui, riche (rixin) chi xek'alajin* chi xa ma quinojel ta chi ye kachibil.

20 Pero riyix can ya'on chic ri Lok'olaj Espíritu† chiwe ruma ri Lok'olaj‡ Cristo, y rumari' c'o chic etamabel iwuq'ui chi'iwonojel. 21 Ronojel re' ntz'ibaj chiwe, pero ma ruma ta chi ma iwetaman ta ri kitzij, ma que ta ri', xa ruma chi iwetaman ri kitzij y chuka' iwetaman chi majun tz'ucun tak tzij petenak ta riq'ui ri kitzij.

22 ¿Y achique cami c'a ri aj tz'ucuy tzij? ¿La ma ya ta cami ri nibin chi ri Jesús ma Cristo ta, chi ma takon ta pe ruma ri Dios? Ri nibin queri', can nretzelaj wi ri Cristo y nuben chi can ya riya'§ ri Cristo. Can nubij wi c'a chi ri Tata'ixel ma kitzij ta. Y queri' chuka' nubij chrij ri C'ajolaxel. 23 Xabachique winek ri nibin chi ri C'ajolaxel ma kitzij ta, ya winek ri' ri man c'o ta ri Tata'ixel riq'ui. Yac'a ri winek ri nik'alajsan chi ri C'ajolaxel can kitzij wi y chuka' can nuc'ul pa ránima, ya winek ri' ri can c'o chuka' ri Tata'ixel* riq'ui.

24 Rumac'ari' riyix, can tic'oje' pa tak iwánima ri ch'abel ri iwac'axan pe tek xinimaj ri Dios.† Y wi ri ch'abel ri' can xtic'oje' pa tak iwánima, can xquixc'oje' c'a riq'ui ri C'ajolaxel y ri Tata'ixel. 25 Y ya c'a ri' ri rutzujun (rusujun) ca ri Jesucristo chake. Ri rutzujun (rusujun) c'a ca Riya', ya ri c'aslen riche (rixin) xtibe k'ij xtibe sek.‡

26 Riyin xintz'ibaj c'a el ronojel re' chiwe, xa cuma ri winek ri nicajo' yixquik'ol. 27 Yac'a ri Lok'olaj Espíritu ri ic'ulun riyix ri ya'on chic chiwe ruma ri Jesucristo can c'o wi pa tak iwánima. Y ma nic'atzin ta c'a chi c'o ta jun chic nitijon iwuche (iwixin), ruma ri Lok'olaj Espíritu yixrutijoj chare ronojel.§ Y ri nuc'ut Riya' chiwech, can kitzij wi. Majun ri nuc'ut ri man ta kitzij. Y can achi'el ruc'utun Riya' chiwech, can queri' tibana'; can quixc'oje' riq'ui ri Cristo.

28 Y wacami riyix ri can yix achi'el tak walc'ual, can quixc'oje' c'a riq'ui ri Jesucristo. Riche (rixin) chi tek xtipe chic jun bey,* can cukul ta apo kac'u'x riq'ui. Y man ta xkojq'uixbitej el† chuwech tek xtapon ri k'ij ri'. 29 Y riyix iwetaman chi ri Jesucristo can choj wi.‡ Rumari' iwetaman chuka' chi xabachique winek ri ruc'uan jun c'aslen choj, ri winek ri' can ruc'uan chic ri c'ac'ac' alaxic ruma can ralc'ual chic ri Dios.

* 2:1 Ro. 8.34; 1 Ti. 2.5; He. 7.25. † 2:2 Jn. 1.29; Ro. 3.25; 1 Jn. 4.10. ‡ 2:2 Jn. 4.42; 1 Jn. 4.14. § 2:3 Jn. 14.15. * 2:4 1 Jn. 1.6. † 2:5 1 Jn. 4.13. ‡ 2:6 Mt. 11.29. § 2:7 1 Jn. 3.11; 2 Jn. 5. * 2:8 Jn. 13.34. † 2:8 Jn. 1.9; 8.12; Ro. 13.12; Ef. 5.8; 1 Ts. 5.5. ‡ 2:10 2 P. 1.10. § 2:11 Jn. 12.35. * 2:12 Lc. 24.47. † 2:13 1 Jn. 1.1. ‡ 2:14 Ef. 6.10; Fil. 4.13; Col. 1.11. § 2:14 Sal. 119.11; Jer. 31.33. * 2:15 Stg. 4.4. † 2:17 Sal. 125.1. ‡ 2:18 He. 1.2. § 2:18 Mt. 24.5; 2 Ts. 2.3. * 2:19 1 Co. 11.19. † 2:20 Is. 44.3; Jn. 14.26; 16.13. ‡ 2:20 Mr. 1.24. § 2:22 1 Jn. 4.3; 2 Jn. 7. * 2:23 Jn. 14.7. † 2:24 2 Jn. 6. ‡ 2:25 Jn. 17.3. § 2:27 Jn. 14.26; 16.13. * 2:28 1 Jn. 3.2. † 2:28 1 Jn. 4.17. ‡ 2:29 Hch. 22.14.