☰ Ébéru 5
5
Wo Padué na e ne ten a penem den
1 Pa *apwoâpwailo ubwo, ke pa apulie na pipégalieng, beme pa apipépwooti hadenii ni apulie me Padué. Be e ne te Padué ni âpipati me ni âpwailo, beme pineuhi ni ta pwo te ni apulie. 2 Ke [te pa apulie] pwohewiilé, ke e temehi a bwo tice niihe ni apulie. Ke bwala nang ne kolé, ke e pipwoééhelé, heme lé piâ ité, mu ko a bwo time uce temehi nen delé. 3 +Ke, é ha a benaamwon na e pwo a âpwailo me pineuhi ni ta pwo te a puapulie, ke e pwo a âpwailo me den mwo, mu ko ana te pa apulie mwo na tice niihen, pwohewiilé.
4 +Be te tice pace apulie celi me e te picaamada mu kon, beme pa apwoâpwailo. Be a penem na te nihe pwonaado ne kon. Kehe te icehi Padué na jan ne kon me e pipégali pace apulie, pwohewii a bwopwonen den ne ko *Aarona.
5 Piwien ne ko Kériso. Be time e uce pipaunueng mwo. Ke te wo Padué na e neeng me pa apwoâpwailo ubwo. Be e pii ten pie:
É jenaa, ke é pii beetihi:
Wogo pa Naîng,
ke woéo pa caa tem.
Psaume 2.7
 
6 +Ke genye pine [ne ha a céiu niide a tii ne he ni tii iitihi] ana e pii wo Padué pie: Wogo pa apwoâpwailo dieli mwo, âcehi a bwopwonen de Melkisédek*. Psaume 110.4
E piténedehi wo Kériso he ni picani
7 +É he e mwo mulie ne éni pwo bwohemwo wo Iésu, ke pwo a benaamwon na e é me toii da céii Padué pie, me e celuimieng [koja a bwo mele ten]†. Ke e téne a pwopwoiitihi ten wo Padué. Be wo Iésu, ke e te nihe paciitieng ke e piténedeeng.
8 Ke te pa *Naî Padué, kehe icehi ana jan me e picaa a bwo piténedehi, ko a bwo mu he ni picani ten. 9 Ke [e piténedehi die ha anebwén kon, ke] e caa panebwénihi ati‡ ni penem den. Ke é mu ko anaa kuti, na o caa pa aceluimi ati lépwona lé piténedeeng. Ke e ne telé *a ju mulip ne pelen. 10 Ke e etieng wo Padué, me pa apwoâpwailo ubwo pwohewii Melkisédek.
A bwo paténe lépwo acéihi
11 Hiwon ni naado na nimung me é§ pii tewé ne ko [a bwo piwie Iésu me Melkisédek]. Kehe icehi ana time geé uce temehi, be wogewé lépwo apwoemaan, ke time geé uce pininim ehi* [ne ko ni céihi tewé].
12 +Caa bwolihi [na geé céihi, kehe icehi ana mwo te junihe wahin ni bwo temehinaado tewé, ne ko a pwooti te Padué. Ke mepie geé te cumang] ke me geé caa ko pacémuni lépwo béén. Kehe wogewé, ke mwo te lépwo acémun, ke mwo time geé uce nihe ân.
Geé pwohewii ni cuwo nahi ewa na lé mwo dile. Be mwo time lé uce wii ce wiinaado celi mwoiu. 13-14 Ke wo pa [acéihi] na e wonaa, ke mwo time uce jan me e pineitééhi ana juuju me ana ta†. Kehe wo pana e cumang [ne ha a céihi] ke e temehi, be e caa mulie hen, ke e picaa. Ke jan me e wii a wiinaado na mwoiu.
+ 5:3 Lévitique 9.7, 16.6 + 5:4 Exode 28.1 + 5:6 Psaume 110.4; Ébéru 6.20, 7.1 * 5:6 Melkisédek—Wo pa daame, me pa céiu apwoâpwailo te a céiu bele, ha a benaamwon de Abérama, pa caa te a bele Isaraéla. Omehi pwahamii tii 7, me Genèse 14.17−24. + 5:7 Mataio 26.36−46; Filipi 2.6−8 † 5:7 1re phrase—ai Pwo a benaamwon na e é, ke to da céii Padué, beme e celuimieng. Be pwojunuu Padué na e celuimikenye koja a mele. Wo pana e tii a tii ce, ke e niimihi a pwopwoiitihi te Iésu ne Getsémané. Omehi Mataio 26.36−46. Wieli e niimihi mwo ni béé benaamwon na e é hen wo Iésu, pwohewiin alecehe a bwo mele te Lazare. Omehi Ioane 11.35. ‡ 5:9 Ke…e caa panebwénihi ati ni penem den—ai E neeng wo Padué, beme pa apwoâpwailo ubwo ten. Grek: Ke me e caa pwo me e hején. § 5:11 É—Grek: Geme. A bwopwonen de ni apulie ânebun, na lé tii pie: Wogeme; ke a bwopiinen pie: Woéo. Omehi note ko 2 Korénit 1.6. * 5:11 Wogewé lépwo apwoemaan, ke time geé uce pininim ehi—Grek: Caa bwéjé gewé. + 5:12 1 Korénit 3.1−3 † 5:13-14 Pineitééhi ana juuju me ana ta—ai Temehi a pwooti na juuju.
☰