19
Nyebi ko piwéden ne he miiden
1 É alecehe ni naado naa, ke é téne a éénaado na pwohewii ni pwocihe te nina te junihe hiwon jélé, ne jeda he miiden. Lé toii da pie:
«Pwonyebi pipaunu Padaame!
Be e caa celuimikenye!
A den a wâé me a pipwojunuun!
2 Juuju ke mwomwon
ni tautinaado ten.
E pwocuhinaado
te ê toomwo pwopwaaden
na e pwo me alili a bwohemwo,
ko ni huô ten na ta.
Ke e pwocuhinaado ten wo Padué,
be e taunu ni eabwé ten!»
3 Ke lé toii daamwo ne nina te junihe hiwon jélé pie:
«Pwonyebi pipaunu Padué!
Be tee taa dieli mwo a muu a miû
na e cini a pwomwo ubwo!»
4 Ke wo lépwo 24 ukéiu, me ni âcélo na paa jélé na lé pwohewii ni wota, ke lé miibule, ke tidihi jililé he pwahamii Padué ne pwo a atebwo he daame ten, ke lé toii da pie: «Amen! Pwonyebi pipaunu Padaame!»
5 Pwo a pwocihe, na e âbé mu pwo a atebwo he daame, na e pii pie:
«Pwonyebi pipaunu Padué,
wogewé ati ni eabwé ten,
na geé pipaciitieng,
me céihi ne kon,
na ubwo gewé ke wahin gewé!»
E piaten wo pa Nahi Muto
6 Ke é téne a éénaado na pwohewii ni pwocihe te ce apulie celi te junihe hiwon jélé. Te junihe ubwo a tihin, pwohewii a éé a tabe pwobwaatéép, me a pwohuu te a tikekele heme e huu me ubwo, he lé ko pii pie:
«Aléluia! Aléluia!
E pihuô wo Padué,
Padaame henye!
Te junihe pwo niihen
ne ko ati ni naado!
7 Genye tai pipwodéén
me pituume,
ke genye pipaunueng!
Be, é jenaa, ke e piaten
wo pa *Nahi Muto.
Ke e pipwopweeng
ê toomwo na e pipégalieng
me ê mwoden.
8 Caa ne ten a epwénen,
na a mwaanu elélowo
na pwomelaan,
na tice alili hen.»
A mwaanu elélowo, ke ni penem na wâé, na lé muko pwo ne ni apulie te Padué.
9 Ke e pii tong wo pali *âcélo pie: «Go tii pie: “*Adéi nina todelé ne ko a piwiinaado ko piaten de pa Nahi Muto.”»
Ke e pii mwo pie: «Juuju ni pwooti naa, be ni pwooti te Padué.»
10 Ke é tidihi jiling he pwahamii pali âcélo beme é pipaunueng. Ke e pii tong pie: «Ûhu! Go nemwo wonaa, be wogenyu, ke tai lupwo eabwé te Padué, pwohewii ni béénye na lé *pajuujuhi pie, woélé ni apulie te Iésu. Te wo Padué cehi na me go pipaunueng. Éa, ati lépwona lé pajuuju Iésu, ke e mu kolé a *Jenen Iitihi na e mu ko lépwo péroféta, ke e ne me lé patemehi a pwooti te Padué.»
pwonehi a bwohemwo: @ 7 naado na e alihi wo Ioane <η>
(Pwahamii tii: 19.11―21.8)
1 <η> Pa atebwo pwo a haricaan pwojo
11 É alecehen, ke é alihi a miiden he tehi, ke é alihi a haricaan na pwojo. Ke pwo pa apulie na e tebwo pwon, na pii kon pie ‘Mwomwon ke Juuju’. Be mwomwon ke juuju a bwo tauti ne ni apulie ten. Ke e tauti ke e pwopa ko a mwomwon.
12 Ni naamiin, ke pwohewii ni duwele miû, ke hiwon ni kuron pwo punin. Pwo a nii apulie na tii ne kon, na te tice pace apulie celi e temehi. Te weeng cehi na e te temehi.
13 Ke e cuwohe a epwén na timi ko cewéle. Ke a niin pie: ‘Pwooti te Padué’.
14 Lé âcéin ne ni mwocoda he miiden, pwo ni haricaan na pwojo. Ke te ju elélowo ni epwénelé, ke te ju pwojo ehi.
15 E wie pwon a teua na te junihe ânyee, beme pwocuhinaado te ni bele. Ke e bo pihuô me mwoiu ko a bwaja toki. Ke e bo caagetilé pwohewii a bwo caageti ne ni ace tabe megele. Weengaa a pwo-okéé ko Padué, na te junihe pwojunuun.
16 Ke é pwo a epwénen, ke é pwo a pan, ke tii ne pwon pie:
Pa Apihuô te ni apihuô,
ke e Daame he ni daame.
2 <η> A meni bwaaoléé me a pa
17 Ke é ali pa âcélo, na e cuwo ha a téale. Ke e ko toii da céii ni meni bwaaoléé, na lé ko téé ko miiden pie: «Geé âbé ne ko a piwiinaado ubwo na e piwâamihi wo Padué me dewé.
18 Geé âbé, beme geé wii a mehi ni daame, ke a mehi ni caa te coda, ke a mehi nina pwo niihelé, ke a mehi ni haricaan, me nina lé tebwo pwon. Geé wii a mehi ni apulie ati: ni *apenem tice ja kon me nina time uce ni apenem tice ja kon; ni apulie na piubwo jélé me nina piwahin jélé.»
3 <η> Imwi pa iténaado me pa péroféta agele
19 Ke é ali pa iténaado me ni daame pwo bwohemwo, he lé ko pitapitihi ni mwocoda telé, beme lé pipwopa ne ko pali e tebwo pwo ali haricaan pwojo, me a mwocoda ten.
20 Ke imwi pali iténaado me pali péroféta agele. Weeng kuti pali e pwo li *pipwojunuun me de pali iténaado, beme e pipwohuô te li apulie, li lé hegi a ine pali iténaado, ke lé pipaunuhi a démen.
Ke lé tahilu ne ha a jié miû, he lu mwo teko mulie, beme e cinilu na a dep na éle.
21 Ke tai taunu ati lépwoli apwopa telu, ko ali teua li e wie mu pwo pali e tebwo pwo ali haricaan pwojo. Ke ni bwaaoléé, ke lé tai wii, ke pwoluu jélé ko ni mehi li apulie.